UJehova Wakhetha UJotjhuwa

Ngemva kokudosa phambili isitjhaba sama-Israyeli iminyaka eminengi, uMosi besele azokuhlongakala. UJehova wathi kuMosi: ‘Akusuwe ozokungenisa ama-Israyeli eNarheni yesiThembiso. Kodwana ngizokwenza uyibone inarha le.’ Ngalokho uMosi wabawa uJehova ukuthi akhethe umrholi omutjha ozokutlhogomela isitjhaba. UJehova wathi kuye: ‘Thatha uJotjhuwa umtjele bona ngimkhethile.’

UMosi watjela isitjhaba bona uzokuhlongakala ingasi kade begodu uJehova ukhethe uJotjhuwa njengomdosi phambili ozabangenisa eNarheni yesiThembiso. Ngemva kwalokho uMosi wathi kuJotjhuwa: ‘Ungesabi. UJehova uzokusiza.’ Msinyana ngemva kwalokho, uMosi watjhinga eNtabeni iNebo, okukulapho uJehova amtjengisa khona inarha ayithembisa u-Abrahama, u-Isaka, noJakopo. UMosi bekaneminyaka eli-120 nakahlongakalako.

UJehova wathi kuJotjhuwa: ‘Yama iJordani, ungene eKanana. Ngizokusiza njengombana ngenzile ngoMosi. Qiniseka bona ufunda imiThethwami qobe. Ungesabi. Yiba nesibindi. Khamba uyokwenza lokho engikuyala bona ukwenze.’

UJotjhuwa wathumela iinhloli ezimbili edorobheni leJerikho. Endabeni elandelako, sizokufunda ukuthi yini eyenzeka lapho. Nazibuyako, zabika bona sikhathi esihle sokungena eKanana. Ngelanga elilandelako, uJotjhuwa wathi isitjhaba asibhince amatende. Wathumela abaphristi ebebaphethe umfaji wesivumelwano bona batjhinge eMlanjeni weJordani qangi. Umlambo bewuphuphuma kodwana kwathi lokha iinyawo zabaphristi nazithinta amanzi, amanzi aphunguka! Abaphristi bajama phakathi nomlambo isitjhaba sakwa-Israyeli nasiyamela ngaphetjheya komlambo. Awucabangi bona ikarisomraro le kufuze bona yabakhumbuza lokho uJehova abenzela khona eLwandle eliBomvu?

Ekugcineni, ngemva kwayo yoke iminyaka leyo, ama-Israyeli angena eNarheni yesiThembiso. Besekangakghona ukuzakhela izindlu namadorobho. Atjale amasimu neemvande ngombana bekuyinarha egeleza ibisi neliju.