Isifundo 10

Imikgwa UZimu Ayihloyako

Kufuneka uzizwe njani ngezinto uZimu athi zimbi? (1)

Ngiziphi iinhlobo zomseme ezimbi? (2)

UmKrestu kufuneka akuqale njani ukukhuluma amanga? (3) ukubheja? (3) ukweba? (3)ukuba nenturhu? (4) ukuba nemimoya? (5) ukudakwa? (6)

Umuntu angatjhaphuluka njani emikgweni emimbi? (7)

1. Iinceku zikaZimu zithanda okuhle. Kodwana kufuneka bafunde nokuhloya okumbi. (AmaRhalani 97:10) Lokhu kutjho bonyana balise imikgwa uZimu ayihloyako. Ngiyiphi eminye yemikgwa le?

2. Ukuhlobonga: Umseme ngaphambi komtjhado, ubuhlola, ukulala nesibandana, ukulala nesihlobo, ukulalana kwabantu bobulili obufanako zoke lezi zizono ezimbi khulu kuZimu. (Lefitikosi 18:6; KwebeRoma 1:​26, 27; 1 kwebeKorinte 6:​9, 10) Nengabe iinthandani zihlala ndawonye zingakatjhadi, kufanele zihlukane namatjhana zitjhade ngokomthetho.​—⁠KumaHebheru13:⁠4.

3. Amanga, Ukubheja, Ukweba: UJehova akawakhulumi amanga. (KuTitosi 1:⁠2) Abantu abafuna ukwamukelwa nguye kufuneka balise amanga. (Iziyema 6:​16-19; KwebeKholose 3:​9, 10) Zoke iinhlobo zokubheja zibangelwa ukuba marhamaru. Ngakho amaKrestu awahlanganyeli ekubhejeni, ilotho, kumjarho weempera, nebhingo. (Kwebe-Efesu 5:​3-5) AmaKrestu akebi. Abathengi izinto abaziko bonyana zetjiwe namtjhana bathathe into ngaphandle kwemvumo.​—⁠Eksodosi 20:15; Kwebe-Efesu 4:⁠28.

4. Ukukwata khulu, Inturhu: Ukukwata ngokudluleleko kungabangela inturhu. (Genesisi 4:​5-8) Umuntu onenturhu angeze aba mngani kaZimu. (AmaRhalani 11:5; Iziyema 22:​24, 25 ) Akukalungi ukuzibuyiselela namtjhana ukubuyisela okumbi ngokumbi abanye abangasenza khona.​—⁠Iziyema 24:29; KwebeRoma 12:​17-21.

5. Imilingo Nemimoya: Abanye abantu babiza amandla emimoya ekulingeni ukupholisa amalwelwe. Abanye babangela amanaba wabo bonyana agule namtjhana afe ngokuwaphosa. Amandla wokwenza imikgwa le abangelwa nguSathana. Ngakho amaKrestu akufuneki ahlanganyele emikgweni le. (Duteronomi 18:​9-13) Ukuhlala hlanu kwakaJehova kusivikelo esibhedere kubantu abafuna ukusiphosa.​—⁠Iziyema18:⁠10.

6. Ukudakwa: Akusikumbi ukurhamula iwayini elincani, ibhiya, namtjhana ezinye izinto ezidakako. (AmaRhalani 104:15; 1 kuThimothi 5:23) Ukurhamula khulu nokudakwa ngikho okumbi emehlweni kaZimu. (1 kwebeKorinte 5:​11-13; 1 kuThimothi 3:8) Ukurhamula khulu kungona ipilo yakho kuphadlhalaje nomndeni wakho. Kungakubangela bonyana uliselele msinyana nawuqalene nesilingo.​—⁠Iziyema 23:​20, 21, 29-35.

7. Abantu abanemikgwa uZimu athi mimbi “abazoligoma ilifa lephasi.” (KwebeGalathiya 5:​19-21) Nawumthanda kwamambala uZimu begodu ufuna nokumthabisa, ungakwazi ukutjhaphuluka emikgweni le. (1kaJwanisi 5:⁠3) Funda ukuhloya izinto uZimu athi zimbi. (KwebeRoma 12:⁠9) Zihlanganise nabantu abaphila ngemithetho kaZimu. (Iziyema 13:20) Ukuba mngani wamaKrestu akhulileko kungaba mthombo werhelebho kuwe. (KaJakobosi 5:14) Ngaphezu kwakho koke, thembela erhelebhweni likaZimu ngomthandazo.​—⁠KwebeFilipi 4:​6, 7, 13.

[Iinthombe ekhasini 20, 21]

UZimu uhloya ukudakwa, ukweba,ukubheja, nezenzo zenturhu