Ingcenye 13
Ukubusa KwamaKhosi Alungileko NamaKhosi Angakalungi
U-Israyeli uhlukene phakathi. Njengombana kukhamba isikhathi, kuba namakhosi amanengi abusa kwa-Israyeli, begodu amanengi wawo awakathembeki. IJerusalema litjhatjalaliswa yiBhabhiloni
NJENGOMBANA uJehova atjho, u-Israyeli wahlukana phakathi ngemva kokuhlahlatha kwakaSolomoni ekukhulekeleni okucwengileko. Indodanakhe eyabusa ngemva kwakhe, uRehobhowamu, gade anelunya. Imiphumela yaba kukobana iintjhaba ezilitjhumi zakwa-Israyeli zavukela begodu zakha umbuso wetlhagwini yakwa-Israyeli. Kodwana iintjhaba eembili zahlala zithembekile ebukhosini bomndeni kaDavidi eJerusalema, zakha umbuso wakwaJuda wesewula.
Yomibili iimbuso le yaba nomlando ongakanzinzi nonemiraro eminengi, khulukhulu ngebanga lokutlhoga ikholo nokungalaleli kwamakhosi wakhona. U-Israyeli waqalana nobudisi obukhulu kunoJuda, ngombana amakhosi wakhona gade athuwelelisa ukukhulekela kwamanga. Ngitjho namtjhana abaphorofidi u-Elija no-Elitjha benza immangaliso—bobabili bavusa abafileko—u-Israyeli gade alokhu abuyela emikghweni yakhe emimbi. Emaswapheleni, UZimu wavumela bonyana i-Asiriya itjhabalalise umbuso wetlhagwini.
UJuda wahlala isikhatjhana esingaphezu kweminyaka elikhulu kuno-Israyeli, kodwana nabo basithola isijeziso esivela kuZimu. Ambalwa kwaphela amakhosi akwaJuda alalela iinyeleliso ezivela kubaphorofidi bakaZimu begodu balinga ukubuyisela isitjhaba ekukhulekeleni uJehova. Ngokwesibonelo, iKosi uJosaya yathoma ukususa ukukhulekela kwamanga kwaJuda begodu yavuselela itempeli lakaJehova. Lapho kufumaneka ikhophi yamambala yoMthetho kaZimu owadluliselwa ngoMosisi, uJosaya wathaba khulu ngalokho okutlolwe kiyo, begodu ngemva kwalokho waqinisa ijima lokubuyisela ukukhulekela okuhlanzekileko.
Kodwana ngokudanisako, ababusa ngemva kwakaJosaya khenge balandele isibonelo sakhe esihle. Ngalokho uJehova wavumela isitjhaba seBhabhiloni bonyana sithumbe uJuda, sitjhabalalise iJerusalema netempeli lalo. Abasindako bayiswa ekuthunjweni eBhabhiloni. UZimu wabikezela bona ukuthunjwa gade kuzokuthatha iminyaka eyi-70. Inarha yakwaJuda gade imarubhi soke isikhatheso—bekwabasikhathi lapho isitjhabeso savunyelwa khona ukubuyela enarheni yaso njengombana uZimu athembisa.
Nokho, awasekho amakhosi womndeni kaDavidi egade azokubusa bekube sikhathi sokubusa koMtjhaphululi owathenjiswako, uMesiya owabikezelwako. Amanengi wamakhosi abusa ngemva kwakaDavidi eJerusalema atjengisa bona abantu abanesono abakufanelekeli ukubusa. NguMesiya kwaphela obezokufanelekela ukubusa. UJehova wathi kowamaswaphela owabusa emndenini wobukhosi bakaDavidi: “Thula umqhele. . . . Ngekhe ube ngowomunye umuntu bekufike loyo onelungelo elingokomthetho, ngikunikele yena.”—Ezekiyeli 21:26, 27.
—Isekelwe ku-1 kuya ku-2 Amakhosi; 2 Imilando izahluko 10 kuya ku-36; Jeremiya 25:8-11.
◼ Yini eyabangela u-Israyeli ahlukane, begodu kwaba namiphi imiphumela emibusweni emibili le?
◼ Khuyini okwenzeka emakhosini womndeni kaDavidi, begodu kubayini?
◼ Indaba kaJona isifundisani ngoJehova? (Qala ibhoksi.)
[Ibhoksi elisekhasini 16]
INCWADI KAJONA
Phakathi nesikhathi semibuso ehlukeneko, uZimu wathuma uJona bona akhambe ayokutjhumayela umlayezo wokuyelelisa abantu benarha yakude iNiniva abanenturhu. Kunalokhu uJona wakhwela isikepe esiya kwenye indawo ekude neNiniva. Isenzweso sadosela esimangalisweni—uZimu wabangela ifesi ekulu bona iginye uJona. Angaphakathi kwefesi, uJona wathandaza kuJehova, owabangela bona ifesi leyo imhlanzele ngaphandle ehlabathini eyomileko. Ngemva kwalokho uJona wakhamba wayokutjhumayela eNiniva.
Ngemva kobanyana uZimu afundise uJona isifundo sokulalela, kwavela umraro wesibili: UJona watjhumayeza bantu beNiniva, kodwana wasilingeka khulu lapho uZimu abonisa umusa nesirhawu ngokungabatjhabalalisi ngombana gade sele baphendukile. Sibawa ufunde incwadi kaJona ekarisako, khona uzokufumana bona uZimu wasiberegisa njani isimangaliso sesibili ukufundisa uJona bona abe nesirhawu.
[Itjhadi ekhasini 16]
Genesisi
Eksodosi
Lefitikosi
Numeri
Duteronomi
Joshuwa
Abahluleli
Rude
1 Samuweli
2 Samuweli
● 1 Amakhosi
● 2 Amakhosi
1 Imilando
● 2 Imilando
Ezra
Nehemiya
Esta
Jobhi
AmaRhalani
Iziyema
Umtjhumayeli
Irhubo lamarhubo
Isaya
Jeremiya
Isililo
Ezekiyeli
Danyela
Hosiya
Juweli
Amosi
Obadiya
● Jona
Mika
Nahumi
Habakuki
Zefaniya
Hagayi
Zakariya
Malaki