UDanyela Ngemgodini Wamabhubezi

Enye ikosi yeBhabhiloni ibizo layo bekunguDariyasi, wesitjhaba sama-Mede. UDariyasi wabeka uDanyela esikhundleni esikhethekileko. Wamnikela isikhundla esikhethekileko kunesamanye amadoda enarheni. Amadoda lawo amfela umona uDanyela afuna nokumbulala. Bewazi ukuthi uDanyela vane athandaze kuJehova kathathu qobe langa. Yeke atjela uDariyasi bonyana: ‘Ikosi kufuze ikhiphe umyalo othi nanyana ngubani owenza isibawo kinanyana ngimuphi uzimu ngaphandle kwakho, kufanele aphoselwe ngemgodini wamabhubezi.’ Kwamkara uDariyasi lokho, watlikitla nomthetho loyo.

UDanyela nakaqeda ukuzwa ngomthetho omutjha loyo, waya emzinakhe, wafese waguqa phambi kwefesdiri elivulekileko wathandaza kuJehova. Amadoda lawo atheleka ngendlinakhe amthola asathandaza. Aphuma ngebelo aya kuDariyasi athi: ‘UDanyela akakuhloniphi. Uthandaza kuZimakhe kathathu ngelanga.’ UDariyasi bekamthanda khulu uDanyela, bekangafuni nokuthi afe. Bekacabanga iqhinga lokuthi uDanyela angabulawa. Kodwana nekosi bengeze yatjhugulula umthetho esele utlikitliwe. Besekufanele itjele amabuthwayo bonyana aphosele uDanyela ngemgodini wamabhubezi anelaka.

Ubusuku bamhlokho uDariyasi wabhalelwa kulala, bekatshwenyeke khulu ngoDanyela. Nakusako wagijimela emgodinapho warhuwelela uDanyela wathi: ‘UZimakho ukusindisile na?’

UDanyela wamphendula angemgodinapho wathi: ‘UZimami uthumele ingilozakhe yavala imilomo yamabhubezi. Akhange angilimaze.’ UDariyasi wathaba khulu! Wathi uDanyela akhutjhwe ngemgodini loyo, nakaphuma ngapho bekanganasibazi ngitjho nesincani. Ngemva kwalokho ikosi yathi: ‘Amadoda lawo abanjwe kuphoselwe wona ngemgodini wamabhubezi.’ Amabhubezi ababhudungela kwangasali litho.

UDariyasi wathumela umyalo naku ebantwini: ‘Woke umuntu kufuze asabe uZimu kaDanyela. Umsindise emabhubezini.’

Uyathandaza na kuJehova qobe langa?