UJesu Wapha Iinkulungwana Ukudla

Ngaphambi kokudlula komnyanya wePhasika lomnyaka ka-32 C.E. abapostoli babuyela ekhambweni labo lokutjhumayela. Bebadinwe, uJesu wabalayitjha ngomkhumbi baya eBhethe-Sayida bayokuphumula. Umkhumbi nawufika hlanu kwelwandle, uJesu wabona iinkulungwana zabantu ebezimlandele ngemva. Nanyana uJesu bekafuna ukuba yedwa nabapostoli bakhe kodwana wabamukela ngomusa abantwabo. Walapha ebebagula wabe wabafundisa. Wabafundisa imini yoke ngomBuso kaZimu. Nakurhwalalako abapostoli beza kuye bathi: ‘Kufuze ukuthi abantwaba sebalambile kwanjesi. Batjele bakhambe bakwazi ukuzitholela okuya ngendeni.’

UJesu wathi: ‘Akutlhogeki ukuthi abantwaba bakhambe. Banikeleni okudliwako.’ Abapostoli bambuza bathi: ‘Kghani ufuna siyobathengela ukudla na?’ UFlebhe ongomunye wabapostoli wathi: ‘Sengitjho nanyana bekuthiwa sibathengele uburotho, bengeze banele boke.’

UJesu wambuza wathi: ‘Kunengi kangangani ukudla esikuphetheko?’ U-Andrisi wathi: ‘Siphethe uburotho obuhlanu neemfesana ezimbili, kuncani khulu ukudlokhu.’ UJesu wathi: ‘Ngilethelani uburothobo nemfesezo.’ Watjela iwoma labantweli bona lihlale phasi etjanini lizabe ngeenqhema. UJesu wathatha uburotho nemfesi waqala ezulwini wathandaza. Ngemva kwalokho, wanikela abapostoli ukudlokho baphakela abantu. Amadoda azii-5 000, abafazi nabantwana badla basutha. Abantu nasele badlile, abapostoli babutha iinsalela zokudla ukwenzela bona kungamoroswa, kwazala abomantji abali-12. Indaba le iyakarisa tle!

Abantwaba bathaba kangangokuthi babe bafuna nokwenza uJesu ikosabo. Kodwana uJesu bekazi kuhle ukuthi bekungakabi sikhathi sokobana uJehova amenze ikosi. Watjhaphulula iwoma labantu lakhamba, watjela nabapostoli ukuthi baye ngaphetjheya kweLwandle leGalile. Bakhwela umkhumbi bakhamba, uJesu wakhuphuka intaba ayedwa. Kubayini enza njalo? Bekafuna ithuba lokuthandaza kuYise. Bekubhala nanyana bekangaba majadu, bekahlale aba nesikhathi sokuthandaza.