ISIFUNDO 14

Amaphuzu Ayihloko Agandelelwe

Hebheru 8:1

ISIRHUNYEZO: Siza abakulaleleko bakhambisane nawe nawubeka ikulumakho, begodu hlathulula indlela iphuzu ngalinye eliyihloko elihlobana ngayo nomnqophwako nesihloko.

INDLELA ONGAKWENZA NGAYO:

Yiba nomnqopho. Cabanga ngokuthi umnqopho wekulumakho uyini, kghani kudlulisa ilwazi, kukholisa, namkha kukhuthaza abakulaleleko, bese ulungiselela ikulumakho ngokuya komnqophwako. Qiniseka bona woke amaphuzu ayihloko akusiza bona ufikelele umnqophwakho.

Zibuze: ‘Ngimiphi imibuzo namkha ukuphikisa abantu abangilaleleko abangaba nayo ngesihlokwesi? Imibuzo namkha ukuphikisokho bangakuveza njani?’ Ngemva kwalokho, hlela amaphuzwakho ngokulandelana ukwenzela bona abakulaleleko bakhambisane nawe, bazwisise begodu bawamukele umlayezo.
Gandelela isihloko sekulumakho. Ekulumenakho, khuluma ngesihloko sayo ngokubuyelela amagama aqakathekileko wesihloko namkha ngokusebenzisa amagama afanako nalawo asetjenziswe esihlokweni.
Yenza amaphuzwakho ayihloko azwakale begodu abe lula. Khetha amaphuzu ayihloko ahlobana nesihloko sakho begodu ongawafundisa kuhle ngesikhathi onikelwe sona. Ungabi namaphuzu ayihloko amanengi, veza iphuzu eliyihloko ngalinye ngokuzwakalako, hlaba ikhefu hlangana nawo, begodu udlulele ngokutjhelelako ephuzwini elilandelako eliyihloko.

Ungawaveza amaphuzu ayihloko ekuthomeni kwekulumakho bona usize abakulaleleko bakhambisane nawe, namkha uwabuyelele nawuphethako bona usize abakulaleleko bawakhumbule.