Isikolo Sekonzo Sezulwini—UbuFakazi BeThando LakaJehova

UJEHOVA, “uMbumbi wethu Omkhulu.” (Isa. 30:20) Ithando limenza afundise begodu abandule abanye. Ngokwesibonelo, atjhukunyiswa lithando elidephileko, uJehova watjengisa uJesu ‘koke akwenzileko.’ (Jwa. 5:20) Ithando ngathi, aboFakazi bakhe, litjhukumisela uJehova bona asiphe ‘ilimi labafundisiweko,’ njengombana senza imizamo yokumdumisa nokusiza abanye.—Isa. 50:4.

Ilingisa umtlhala kaJehova wethando, iKomidi yokuFundisa yesiHlopha esiBusako isebenzisa iinkolo ezilitjhumi ezingokwezulwini bona ibandule labo abanakho kokubili isifiso begodu nobujamo bubavumela bona bafake isibawo. Uqala iinkolwezi njengobufakazi bethando lakaJehova?

Thabela imininingwana yeenkolo ezingokwezulwini zagadesi, begodu phawula okutjhiwo ngilabo abakhe baya kizo. Ngemva kwalokho zibuze, ‘Ngingazuza njani efundisweni kaZimu le?’

ZUZA EBANDULWENI ELINGOKWEZULWINI

‘NjengoZimu wethando,’ uJehova unikela ibandulo elenza ukuphila kwethu kube nomnqopho, elisilungiselela bona sihlule iintjhijilo, begodu lisisize sibe nethabo elikhulu ekonzwenethu. (2 Kor. 13:11) Njengabafundi bangekhulu lokuthoma, sihlomele ukusiza abanye, ‘sibafundise ukwenza koke’ esiyalwe ngakho.—Mat. 28:20.

Nanyana singekhe sikghone ukuya kizo zoke iinkolwezi, singazuza kesinye namtjhana kezingeziweko zazo. Begodu singasebenzisa isinqophiso esisekelwe eBhayibhilini esifumaneka kizo. Godu singandisa ukuphumelela kwethu ekonzweni ngokusebenzelana eduze neenceku zakaJehova ezibandulwe kuhle.

Zibuze, ‘Ubujamo bami buyangivumela bona ngifikelele ukuya kunanyana ngisiphi seenkolwezi?’

Abakhulekeli bakaJehova bakuqala njengelungelo ukusekela iinkolo eziqakathekilekwezi nokufundiswa lapho. Kwanga ibandulo olifumeneko lingakutjhideza eduze begodu likuhlomisele ukuzalisa izabelo akunikele zona, khulukhulu umsebenzi orhabileko wokutjhumayela iindaba ezimnandi.

UKUHLATHULULWA OKUFITJHANI KWEENKOLO EZINGOKWEZULWINI

IsiKolo SeKonzo EsingokweZulwini

Umnqopho: Kubandula abarhuweleli bona babe batjhumayeli nabafundisi abaphumelelako beendaba ezimnandi.

Isikhathi Esithathwako: Ifundo eragela phambili.

Indawo: EWolweni lomBuso langekhenu.

Iimfanelo: Boke abazihlanganisa qobe nebandla, abavumelana neemfundiso zeBhayibhili, nalabo abaphila ngokuvumelana neenkambisolawulo zobuKrestu.

Ukutlolisa: Khuluma nombonisi wesiKolo seKonzo seZulwini.

USharon, owarholophazwa yi-amyotrophic lateral sclerosis (ALS), wathi: “IsiKolo seKonzo seZulwini singifundise ukwenza irhubhululo nokunikela ukwaziswa ngendlela enengqondo. Godu ngifunde nokudzimelela eentlhogweni ezingokomoya zabanye—ingasi zami kwaphela.”

U-Arnie, onesikhathi eside ambonisi obhodako uyaphawula: “Ngakhula ngingingiza begodu ngingakghoni ukuqala abantu ngemehlweni. Isikolwesi singisize ngaba nokuzithemba begodu ngazibona ngiqakathekile. Ngesizo lakaJehova ngebandulweli, ngifunde iindlela zokulawula ukuphefumula kwami nokulalelisisa. Ngithokoza khulu ngekghono lokudumisa uZimu ebandleni nekonzwenami.”

IsiKolo Sabasanduk’fika EBethel

Umnqopho: Isikolwesi senzelwe ukusiza abafikako bona baphumelele ekonzwenabo yeBethel.

Isikhathi Esithathwako: Imizuzu ema-45 qobe veke, iimveke ezi-16.

Indawo: EBethel.

Iimfanelo: Kufuze kube malunga womkhaya weBethel wesikhathi esizeleko namtjhana iinsebenzi zokuzithandela zesikhatjhana ezamukelwe ukukhonza eBethel umnyaka munye nofana ngaphezulu.

Ukutlolisa: IBethel ngiyo efaka abafanelekako.

UDemetrius, owakhe waya esikolwenesi ngabo-1980, uthi: “Ifundo le ithuthukise imikghwami yokufunda yangilungiselela nokobana ngihlale isikhathi eside eBethel. Abafundisi, izinto ezifundwako neenluleko ezilisizo kwangiqinisekisa ngokukhathalela kwethando lakaJehova nesifiso sakhe sokungisiza bona ngiphumelele ekonzweni yami yeBethel.”

UKaitlyn uthi: “Ngasizwa bona ngidzimelele kokuqakathekileko—ngibe mumuntu ongokomoya. IsiKolwesi sithuthukise ukuthokoza kwami ngoJehova, indlwakhe, nehlanganwakhe.”

IsiKolo SeKonzo SomBuso

Umnqopho: Kubandula ababonisi ababhodako, abadala ngezinye iinkhathi neenceku ezikhonzako bona bakwazi ukutlhogomela nokungamela umthwalwabo webandla. (IZe. 20:28) Kulungiswa ubujamo banjesi neentlhogo ezirhabileko zamabandla. Isikolwesi sibanjwa qobe ngemva kweemnyaka embalwa njengombana sihlelwa siHlopha esiBusako.

Isikhathi Esithathwako: Eemnyakeni yamva nje, isikolwesi besiba malanga amabili kuya kwamabili nengcenye kubabonisi ababhodako, sithatha ilanga nesiquntu kubadala bese eencekwini ezikhonzako sithatha ilanga elilodwa.

Indawo: Ngokuvamileko siba seWolweni lomBuso namtjhana eWolweni lomHlangano.

Iimfanelo: Kufuze kube mbonisi obhodako, umdala namtjhana inceku ekhonzako.

Ukutlolisa: Abadala neenceku ezikhonzako bafumana isimemo kumbonisi wesifunda. I-ofisi legatja limema ababonisi ababhodako.

“Isikolwesi, nanyana sifundisa izinto ezinengi ngesikhathi esifitjhani, sivuselela abadala begodu sibasize babulunge ithabo begodu ‘baragele phambili njengamadoda’ ekonzweni kaJehova. Kokubili abadala abasanduk’uthoma nalabo esele banesikhathi eside bafunda ukwalusa ngokuphumelelako begodu babumbane ‘babe nombono munye.’”—UQuinn.

“Ibandulweli lisifundisa ukwakha ukwazisa okungokomoya, lisiyelelisa ngeengozi, lasinikela neemphakamiso ezisebenzako zokutlhogomela umhlambi. Qala bona uJehova unomusa kangangani bona asisize.”—UMichael.

IsiKolo SeKonzo SamaPhayona

Umnqopho: Kusiza amaphayona ‘aphelelise koke akwenzako njengeensebenzi zakaZimu.’—2 Thi. 4:5.

Isikhathi Esithathwako: Iimveke eembili.

Indawo: Ikhethwa yi-ofisi legatja; ngokuvamileko kuba seWolweni lomBuso.

Iimfanelo: Kufuze kube liphayona lesikhathi esizeleko okunganani umnyaka owodwa nofana ngaphezulu.a

Ukutlolisa: Amaphayona afanelekako ayatloliswa esikolwenesi begodu amenywa mbonisi wesifunda.

ULily uthi, “Isikolwesi sangisiza bona ngikghone ukuqalana neentjhijilo ekonzweni nekuphileni kwami. Indlela engifunda ngayo, ngifundisa begodu ngisebenzisa ngayo iBhayibhili ithuthuke khulu. Ngikulungele khulu ukusiza abanye, ukusekela abadala, nokuba nengcenye ekuthuthukeni kwebandla.”

UBrenda owaya esikolwenesi kabili, uthi: “Sangenza ngadzimelela ngokupheleleko eentweni ezingokomoya, ngaqinisa isazelo sami, ngadzimelela nekusizeni abanye. Kwamambala, uJehova unomusa!”

a Nengabe akunamaphayona aneleko bona enze iklasi, amanye amaphayona akhe aya esikolweni eemnyakeni emihlanu edlulileko angamenywa bona abe khona godu.

IsiKolo SabaDala BeBandla

Umnqopho: Kusiza abadala bona batlhogomele iimthwalwabo ebandleni nokudephisa ingokomoya labo.

Isikhathi Esithathwako: Amalanga amahlanu.

Indawo: Ikhethwa yi-ofisi legatja; ngokuvamileko siba seWolweni lomBuso namtjhana eWolweni lomHlangano.

Iimfanelo: Kufuze kube mdala obekiweko.

Ukutlolisa: Abadala bamenywa yi-ofisi legatja.

Akhe uzwe amazizo wabanye egade baseklasini lama-92 e-United States:

“Isikolwesi singizuzise khulu, singisize bona ngizihlole begodu ngibone indlela engingatlhogomela ngayo izimvu zakaJehova.”

“Ngikulungele ukuba sikhuthazo ngokungeziweko kibo boke ngokugandelela amaphuzu ayihloko emiTlolweni.”

“Ngizokusebenzisa ibandulweli ukuphila kwami koke.”

IsiKolo SabaBonisi AbaKhambako NabaFazi Babo

Umnqopho: Kusiza ababonisi besifunda nebesigodi bona baphumelele ngcono ekukhonzeni amabandla ‘nekusebenzeni budisi ekutjhumayeleni nekufundiseni.’—1 Thi. 5:17; 1 Pit. 5:2, 3.

Isikhathi Esithathwako: Iinyanga eembili.

Indawo: Ikhethwa yi-ofisi legatja.

Iimfanelo: Kufuze kube mbonisi wesifunda namtjhana wesigodi.

Ukutlolisa: Ababonisi besifunda abafanelekako nabafazi babo bamenywa yi-ofisi legatja.

“Ukuthabela kwethu ubuhloko bakaJesu phezu kwehlangano kwathuthuka. Sibone itlhogeko yokukhuthaza abanakwethu esibakhonzako begodu siqinise ubunye bebandla ngalinye. Ifundo le yadzimelelisa eengqondweni zethu ukuthi nanyana umbonisi obhodako anikela iinluleko ngitjho nokusola ngezinye iinkhathi, umnqophwakhe oyihloko kusiza abazalwana babone bona uJehova uyabathanda.”—UJoel, weklasi loku-1, laka-1999.

IsiKolo SeBhayibhili SabaZalwana AbangakaTjhadi

Umnqopho: Kulungiselela abadala neenceku ezikhonzako ezingakatjhadi bona batlhogomele imithwalo engeziweko ehlanganweni kaJehova. Inengi labafumene iziqu lizokwabelwa ukukhonza lapho kunetlhogeko khona enarheni yekhabo. Abanye bangabelwa kezinye iinarha nengabe bazenza bafumaneke. Abanye abafumene iziqu bangakhonza njengamaphayona akhethekileko wesikhatjhana bona bathome begodu bandise umsebenzi eenarheni ezikude.

Isikhathi Esithathwako: Iinyanga eembili.

Indawo: Ikhethwa yi-ofisi legatja; ngokuvamileko siba seWolweni lomBuso namtjhana eWolweni lomHlangano.

Iimfanelo: Abazalwana abangakatjhadi abahlangana neemnyaka ema-23 nema-62 abaphile kuhle abafuna ukukhonza lapho kunetlhogeko ekulu khona. (Mar. 10:29, 30) Kufuze bona sebakhonze njengamaphayona wesikhathi esizeleko okunganani iimnyaka eembili begodu nanjengabadala namtjhana iinceku ezikhonzako iimnyaka eembili ngaphandle kokujama.

Ukutlolisa: Umhlangano walabo abafisa ukwenza isibawo uba semhlanganweni wesifunda ukunikela labo abanekareko ukwaziswa okungeziweko.

URick, weklasi lama-23 e-United States uthi, “Ukuba sesikolwenesi kwavumela umoya kaJehova bona wenze amatjhuguluko ngaphakathi kimi. UJehova nekakunikela isabelo, uyakusekela esabelweneso. Ngafunda bona nengidzimelela entandweni kaZimu ingasi keyami, uzongisekela.”

U-Andreas, okhonza eGermany uthi, “Ngafunda ukuzwisisa bona indlela ihlangano kaZimu esebenza ngayo namhlanje iyakarisa. Ibandulweli lingisize langilungiselela umsebenzi ozako. Godu iimbonelo ezinengi eziseBhayibhilini zingifundise iqiniso eliyihloko: Ukukhonza abanakwethu noJehova kudosela ethabweni lamambala.”

IsiKolo SeBhayibhili SamaKrestu ATjhadileko

Umnqopho: Kunikela amaKrestu atjhadileko ibandulo elikhethekileko bona asetjenziswe nguJehova nehlanganwakhe ngokuzeleko. Inengi labafumene iziqu lizokwabelwa ukukhonza lapho kunetlhogeko ekulu khona enarheni yekhabo. Amanye anganikelwa isabelo kenye inarha nengabe azenza bafumaneke. Abafumene iziqu bangakhonza njengamaphayona akhethekileko wesikhatjhana ukuthoma nokwandisa umsebenzi eenarheni ezikude.

Isikhathi Esithathwako: Iinyanga eembili.

Indawo: Isikolwesi sibanjelwa e-United States, begodu sizokuthoma ngoSeptemba 2012, godu sizokubanjelwa emagatjeni akhethiweko ephasini mazombe, ngokuvamileko eWolweni lomBuso namtjhana eWolweni lomHlangano.

Iimfanelo: AmaKrestu atjhadileko ahlangana neemnyaka ema-25 nema-50 aphile kuhle nanobujamo obuwavumela bona akhonze nanyana kukuphi lapho kunetlhogeko ekulu khona, nanomoya wokuthi: “Nangu mina! Thuma mina.” (Isa. 6:8) Kufuze bona selatjhade okunganani iimnyaka eembili begodu asekonzweni yesikhathi esizeleko okunganani iimnyaka eembili ngaphandle kokujama. Indoda kufuze bona ikhonza njengomdala namtjhana inceku ekhonzako okunganani iimnyaka eembili elandelanako.

Ukutlolisa: Umhlangano walabo abanekareko uba semhlanganweni wesigodi ukubanikela ukwaziswa okungeziweko. Nengabe awukho umhlangano lo emihlanganweni yesigodi enarheni yekhenu begodu ungathanda ukufaka isibawo, ungatlolela i-ofisi legatja bona ufumane imininingwana engeziweko.

“Qala bona iimveke ezibunane ziyitjhentjhe njani ipilo nethuba elihle labatjhadi abafuna ukwenza okunengi! Sizimisele ukubulunga ukuphila okulula ukwenzela bona sisebenzise isikhathi sethu ngokuhlakanipha.”—U-Eric noCorina, beklasi loku-1, laka-2011.

IsiKolo SeBhayibhili SeGiliyadi

Umnqopho: Kubandula abafundi bona babe ziinthunywa zevangeli eendaweni ezinabantu abanengi, babe babonisi ababhodako, namtjhana iinkhonzi zeBethel. Umnqopho kuqinisa isimu nokwenza izinto zihleleke kuhle egatjeni.

Isikhathi Esithathwako: Iinyanga ezihlanu.

Indawo: EWatchtower Educational Center, ePatterson, eNew York, e-U.S.A.

Iimfanelo: AmaKrestu atjhadileko esekasehlobeni elithileko lekonzo ekhethekileko yesikhathi esizeleko—kungaba ziinthunywa zevangeli ezingakayi esikolweni, amaphayona akhethekileko, ababonisi ababhodako, namtjhana iinkhonzi zeBethel. Kufuze bona basekonzweni enjalo okunganani iimnyaka emithathu ngaphandle kokujama. Kufuze bakwazi ukukhuluma, ukufunda nokutlola isiNgisi kuhle.

Ukutlolisa: Abantu abatjhadileko bangamenywa yiKomidi yeGatja bona bafake isibawo.

ULade noMonique abavela e-United States kwanje bakhonza e-Afrika. ULade uthi, “IsiKolo seGiliyadi sasilungiselela bona siye nanyana kukuphi ephasini, sizimisele, begodu sisebenze nabanakwethu abathandekako.”

UMonique uyangezelela: “Njengombana ngisebenzisa engikufunde eliZwini lakaZimu, ngifumana ithabo elikhulu esabelweni sami. Ngibona ithabwelo njengobufakazi obungeziweko bethando lakaJehova.”

IsiKolo SamaLunga WeKomidi YeGatja NabaFazi Babo

Umnqopho: Kusiza labo abasemaKomidini weGatja bona banqophise amakhaya weBethel, batjheje iindaba zamabandla, ukungamela iimfunda neengodi. Godu bafunda nangomsebenzi wokutjhugulula, ukugadangisa nokukhambisa iincwadi.

Isikhathi Esithathwako: Iinyanga eembili.

Indawo: EWatchtower Educational Center, ePatterson, eNew York, e-U.S.A.

Iimfanelo: Umzalwana kufuze abe lilunga leKomidi yeGatja namtjhana leKomidi yeNarha.

Ukutlolisa: Abazalwana nabafazi babo bamenywa siHlopha esiBusako.

ULowell noCara, beklasi lama-25, bakhonza eNigeria. ULowell uthi, “Ngakhunjuzwa bona kungakhathaliseki bonyana ngimajadu kangangani nofana ngabelwe muphi umsebenzi, isilodlhelo sokuthabisa uJehova kukwenza izinto ngendlelakhe. Ifundo le yagandelela bona indlela esiphatha ngayo abanye kufuze ifane nendlela uJehova atjengisa ngayo iinceku zakhe ithando.”

UCara ungezelela uthi, “Elinye iphuzu engakhe ngacabanga ngalo ngileli, nengingakghoni ukubeka iphuzu elithileko ngendlela elula, kutlhogeka ngilifunde ngaphambi kokulinga ukulifundisa abanye.”