Ufunda Koke Ongakufunda KuJehova?

1. UJehova uzizwa njani ngokufundisa?

¹ UJehova, “uMbumbi wethu Omkhulu,” ufuna sifunde. (Isa. 30:20) Wathoma ukufundisa ngemva kokubumba iNdodanakhe elizibulo. (Jwa. 8:28) Ngemva kokuhlubuka kwaka-Adamu, uJehova akhenge alise ukufundisa, kodwana ngethando wanikela abantu abanesono isinqophiso.—Isa. 48:17, 18; 2 Thi. 3:14, 15.

2. Ngiyiphi ifundo engokomoya eragela phambili nje?

² Namhlanje, uJehova unqophisa irhelo lefundo ekulu emlandweni. Njengombana u-Isaya aporofida, iingidi ephasini mazombe zithutheleka “entabeni yendlu kaJehova” engokomfanekiso. (Isa. 2:2) Kubayini zithutheleka lapho? Bona zifundiswe ngeendlela zakaZimu, iye, bona zifundiswe nguJehova! (Isa. 2:3) Phakathi nomnyaka wekonzo ka-2010, aboFakazi BakaJehova basebenza ama-awara aziingidi eziyi-1.6 bafakaza bafundisa nabantu iqiniso leBhayibhili. Ukungezelela kilokho, qobe veke ifundo engokomoya idluliselwa emabandleni angaphezu kwayi-105 000 ephasini mazombe, begodu inceku ethembekileko nehlakaniphileko ikhiqiza iincwadi zobuKrestu ezifundisako ngeenlimi ezima-500.

3. Uzuze njani efundisweni esiyilungiselelwe nguJehova?

³ Zuza Ngokuzeleko: Qala bona sizuza kangangani efundweni kaZimu le! Sifundile bona uZimu unebizo begodu uyasikhathalela. (Rha. 83:18; 1 Pit. 5:6, 7) Sifunde iimpendulo zeminye yeembuzo eqakatheke khulu ekuphileni: Kubayini sitlhaga begodu sifa? Ngingalifumanaphi ithabo lamambala? Uyini umnqopho wokuphila? UJehova godu usinikela isinqophiso esisenza sikwazi ‘ukwenza indlela yethu iphumelele.’—Josh. 1:8.

4. Ngimaphi amanye amathuba wefundo atholakalako eencekwini zakaZimu, begodu kubayini kufuze sifunde koke esingakufunda kuJehova?

⁴ Ukungezelela kilokho, uJehova wenza bona kufumaneke ifundo ekhethekileko ukusiza inengi leenceku zakhe bona zithuthukise ikonzwazo kuye. Emakhasini 4-6 kunerhelo lamathuba avulekele abanye bethu. Ngitjho nanyana ubujamo bethu bungasivimbela ukuthola ukubandulwa okuserhelweni, siwasebenzisa ngokuzeleko na amathuba wefundiso kaZimu efumanekako kithi? Siyabakhuthaza na abatjha abahlohlozelwa botitjhere babo nabanye bona bafune ifundo yephasi ephakemeko, bonyana kunalokho batjhisekele ifundo ephakemeko—ifundo kaZimu? Ukufunda koke esingakufunda ngoJehova kuzosisiza bona sithabele ukuphila nje nokuphila okungapheliko esikhathini esizako.—Rha. 119:105; Jwa. 17:3.

Amanye Amathuba Wefundo Atholakala Ehlanganweni KaJehova

Amaklasi Wabantu Abangakwaziko Ukufunda Nokubhala

• Umnqopho: Kufundisa abantu bona bakwazi ukufunda nokubhala bonyana bakwazi ukuzifundela iBhayibhili nokufundisa abanye iqiniso.

• Isikhathi Esithathwako: Kuzokuya ngetlhogeko.

• Indawo: EWolweni LoMbuso langekhenu.

• Bobani Abangaya Kiso: Boke abarhuweleli nabantu abanekareko.

• Indlela Yokwenza Isibawo: Abadala bebandla bahlela amaklasi wabangakwaziko ukufunda ngokuya ngetlhogeko yebandla, begodu bakhuthaze boke abangazuza kiso bona babe khona.

Isikole Sekonzo Sezulwini

• Umnqopho: Kubandula abarhuweleli bona babe batjhumayeli nabafundisi abaphumelelako beendaba ezimnandi.

• Isikhathi Esithathwako: Ifundo eragela phambili.

• Indawo: EWolweni LoMbuso langekhenu.

• Bobani Abangabhalisa: Boke abarhuweleli. Godu nabanye abahlanganyela nebandla ngokuzeleko, abavumelana neemfundiso zeBhayibhili nebavumelanisa amaphilwabo neenkambisolawulo zobuKrestu.

• Indlela Yokwenza Isibawo: Khuluma nombonisi Wesikolo Sekonzo Sezulwini.

Amaklasi Wokufunda Ilimi Lakezinye Iinarha

• Umnqopho: Kufundisa abarhuweleli ukutjhumayela iindaba ezimnandi ngelinye ilimi.

• Isikhathi Esithathwako: Iinyanga ezine namtjhana ezihlanu. Kanengi amaklasi la abanjwa ngaboMgqibelo ekuseni i-awara elilodwa namtjhana amabili.

• Indawo: Ngokuvamileko abanjelwa eWolweni LoMbuso eliseduze.

• Bobani Abangaya Kiso: Barhuweleli abafanelekako abathanda ukutjhumayela ngelinye ilimi.

• Indlela Yokwenza Isibawo: Amaklasi ahlelwa yi-ofisi legatja ngokuvumelana neentlhogo.

Ukwakhiwa KwamaWolo WoMbuso

• Umnqopho: Ukwakha nokulungisa amaWolo woMbuso. Lesi akusiso isikolo, kodwana ngaphasi kwelungiselelweli iinsebenzi zokuzithandela zifundiswa amakghono ahlukahlukeneko bona zikwazi ukusiza ngomsebenzi wokwakha.

• Isikhathi Esithathwako: Kuzokuya ngobujamo beensebenzi zokuzithandela.

• Indawo: Kunanyana ngiyiphi indawo lapho iKomidi Yokwakha Yesifunda yabelwe khona. Namtjhana ukusebenza nesiQhema seKomidi Yokwakha amaWolo woMbuso isikhathi esizeleko lapho kunetlhogeko khona, ngaphasi kokunqotjhiswa yigatja.

• Iimfanelo: Bafowethu nabodadwethu ababhabhadisiweko begodu nabavunyelwe sihlopha sabadala. Kungenzeka babe namakghono namtjhana bangabi nawo.

• Indlela Yokwenza Isibawo: Zalisa i-Kingdom Hall Volunteer Worker Questionnaire (S-82) efumaneka kubadala bebandla langekhenu bona usebenze neKomidi Yokwakha Yesifunda. Zalisa isibawo esithi, Application for Kingdom Hall Construction Volunteer Program (A-25-E) nengabe uzokwazi ukusiza isikhathi esizeleko inyanga eyodwa namtjhana ngaphezulu.

Isikolo Sekonzo Samaphayona

• Umnqopho: Kusiza amaphayona ‘aphelelise koke akwenzako njengeensebenzi zakaZimu.’—2 Thi. 4:5.

• Isikhathi Esithathwako: Iimveke eembili.

• Indawo: Ikhethwa yi-ofisa legatja; ngokuvamileko kuba seWolweni LoMbuso eliseduze.

• Iimfanelo: Labo ababe maphayona wesikhathi esizeleko okunganani umnyaka owodwa.

• Indlela Yokwenza Isibawo: Amaphayona afanelekako avele afakwe bese aziswa mbonisawo wesifunda.

Isikolo SeBethel Sabasanduk’fika

• Umnqopho: Isikolwesi senzelwe ukusiza abafikako bona baphumelele ekonzwenabo yeBethel.

• Isikhathi Esithathwako: I-awara elilodwa qobe veke, iimveke ezilitjhumi nesithandathu.

• Indawo: EBethel.

• Iimfanelo: Kufuze kube malunga womkhaya weBethel wesikhathi esizeleko namtjhana iinsebenzi zokuzithandela zesikhatjhana eside esingaba (mnyaka namtjhana ngaphezulu).

• Indlela Yokwenza Isibawo: IBethel ngiyo efaka abafanelekako.

Isikolo Sekonzo SoMbuso

• Umnqopho: Kubandula abadala neenceku ezikhonzako bona bakwazi ukutlhogomela nokungamela umthwalwabo webandla. (IZe. 20:28) Isikolwesi sibanjwa qobe ngemva kweemnyaka embalwa njengombana kuhlela iSihlopha eSibusako.

• Isikhathi Esithathwako: Eemnyakeni yamva nje besithatha ilanga nesiquntu kubadala bese eencekwini ezikhonzako sithatha ilanga elilodwa.

• Indawo: Ngokuvamileko kuba seWolweni LoMbuso eliseduze namtjhana eWolweni Lomhlangano.

• Iimfanelo: Kufuze kube badala namtjhana ziinceku ezikhonzako.

• Indlela Yokwenza Isibawo: Abadala abafanelekako namtjhana iinceku ezikhonzako zimenywa mbonisi wesifunda.

Isikolo Sabadala Bebandlaa

• Umnqopho: Kusiza abadala bona batlhogomele iimthwalwabo ebandleni.

• Isikhathi Esithathwako: Iimveke ezihlanu.

• Indawo: Ikhethwa yi-ofisi legatja; ngokuvamileko siba seWolweni LoMbuso eliseduze namtjhana eWolweni Lomhlangano.

• Iimfanelo: Kufuze kube badala.

• Indlela Yokwenza Isibawo: Abadala abafanelekako bamenywa yi-ofisi legatja.

Isikolo Sababonisi Abakhambako Nabafazi Babob

• Umnqopho: Kusiza ababonisi besifunda nebesigodi bona baphumelele ngcono ekukhonzeni amabandla ‘nekusebenzeni budisi ekutjhumayeleni nekufundiseni’ nokulusa labo abangaphasi kwabo.—1 Thi. 5:17; 1 Pit. 5:2, 3.

• Isikhathi Esithathwako: Iinyanga eembili.

• Indawo: Ikhethwa yi-ofisi legatja.

• Iimfanelo: Kufuze kube mbonisi wesifunda namtjhana wesigodi.

• Indlela Yokwenza Isibawo: Ababonisi besifunda abafanelekako nabafazi babo bamenywa yi-ofisi legatja.

Isikolo SeBhayibhili Sabazalwana Abangakatjhadic

• Umnqopho: Kulungiselela abadala neenceku ezikhonzako ezingakatjhadi bona batlhogomele iimthwalo engeziweko. Inengi labafumene iziqu lizokwabelwa ukukhonza lapho kunetlhogeko khona enarheni yekhabo. Abambalwa bangafumana izabelo kenye inarha nengabe bazisa i-ofisi legatja bona bangakghona ukukhonza kenye inarha.

• Isikhathi Esithathwako: Iinyanga eembili.

• Indawo: Ikhethwa yi-ofisi legatja; ngokuvamileko siba seWolweni LoMbuso eliseduze namtjhana eWolweni Lomhlangano.

• Iimfanelo: Abazalwana abangakatjhadi abahlangana neemnyaka ema-23 nema-62 abaphile kuhle abafuna ukukhonza abazalwana neenkareko zoMbuso nanyana kukuphi lapho kunetlhogeko. (Mar. 10:29, 30) Kufuze bona sebakhonze iimnyaka eembili njengabadala namtjhana iinceku ezikhonzako ngaphandle kokujama.

• Indlela Yokwenza Isibawo: Nengabe isikolwesi sikhona egatjeni lesimu yenu, umhlangano walabo abafisa ukwenza isibawo uba semhlanganweni wesifunda. Ukwaziswa okungeziweko kuyanikelwa emhlanganweni lo.

Isikolo SeBhayibhili SamaKrestu Atjhadilekod

• Umnqopho: Kusiza amaKrestu atjhadileko ngokubandulwa okukhethekileko bona asetjenziswe ngokuzeleko nguJehova nehlanganwakhe. Inengi labafumene iziqu lizokwabelwa ukukhonza lapho kunetlhogeko khona enarheni yekhabo. Abambalwa bangafumana izabelo kenye inarha nengabe bazisa i-ofisi legatja bona bangakghona ukukhonza kenye inarha.

• Isikhathi Esithathwako: Iinyanga eembili.

• Indawo: Amaklasi wokuthoma ambalwa abanjelwe eWatchtower Educational Center ePatterson, eNew York, e-U.S.A. Ngemva kwalokho, amaklasi la azokubanjelwa eendaweni ezikhethwe yi-ofisi legatja, ngokuvamileko eWolweni Lomhlangano namtjhana eWolweni LoMbuso.

• Iimfanelo: AmaKrestu atjhadileko ahlangana neemnyaka ema-25 nema-50 aphile kuhle nanobujamo obuwavumela bona akhonze nanyana kukuphi lapho kunetlhogeko nanomoya wokuthi: “Nangu mina! Thuma mina.” (Isa. 6:8) Ukuragela phambili, kufuze bona selatjhade okunganani iimnyaka eembili begodu okwanje asekonzweni yesikhathi esizeleko okunganani iimnyaka eembili ngaphandle kokujama.

• Indlela Yokwenza Isibawo: Nengabe isikolwesi sikhona egatjeni lesimu yenu, umhlangano walabo abafisa ukwenza isibawo uba semhlanganweni okhethekileko welanga elilodwa. Ukwaziswa okungeziweko kuyanikelwa emhlanganweni lo.

Isikolo SeBhayibhili SeGilead

• Umnqopho: Kubandula amaphayona nezinye iinkhonzi zesikhathi esizeleko bona babe ziinthunywa zevangeli.

• Isikhathi Esithathwako: Iinyanga ezihlanu.

• Indawo: EWatchtower Educational Center, ePatterson, eNew York, e-U.S.A.

• Iimfanelo: AmaKrestu atjhadileko aneemnyaka eemthathu abhabhadisiwe nahlangana neemnyaka ema-21 nema-38 nekathumela isibawo sawo sokuthoma. Kufuze azi iSingisi, abe selatjhade okunganani iimnyaka eembili begodu sekakhonze iimnyaka eembili ekonzweni yesikhathi esizeleko ngaphandle kokujama. Abenza isibawo kufuze babe babantu abaphile kuhle. Amaphayona akhonza kezinye iinarha (kuhlanganise nalawo aqalwa njengeenthunywa zevangeli); ababonisi abakhambako; amalunga womkhaya weBethel; nabaneziqu zeSikolo Sokubandulelwa Ikonzo, Isikolo seBhayibhili Sabazalwana Abangakatjhadi, namaKrestu Atjhadileko aneziqu zeSikolo SamaKrestu Atjhadileko nawo angafaka isibawo nengabe ayafaneleka.

• Indlela Yokwenza Isibawo: Emagatjeni ahlukahlukeneko umhlangano walabo abafisa ukuya esikolwenesi ubanjwa emhlanganweni wesigodi. Ukwaziswa okungeziweko kuyanikelwa emhlanganweni lo. Nengabe awukho umhlangano lo emhlanganweni wesigodi enarheni yekhenu begodu uthanda ukwenza isibawo, ungatlolela i-ofisi lenu legatja bona ufumane ukwaziswa okungeziweko.

Isikolo Samalunga WeKomidi YeGatja Nabafazi Babo

• Umnqopho: Kusiza labo abakhonza emaLungeni weGatja bona batlhogomele umsebenzabo wokungamela amakhaya weBethel ngcono, ukutjheja iindaba zamabandla, ukungamela iimfunda neengodi esiminabo, umsebenzi wokutjhugulula, ukugadangisa nokukhambisa iincwadi nokungamela iimnyango ehlukahlukeneko.—Luka 12:48b.

• Isikhathi Esithathwako: Iinyanga eembili.

• Indawo: EWatchtower Educational Center, ePatterson, eNew York, e-U.S.A.

• Iimfanelo: LiLunga leGatja namtjhana Lenarha.

• Indlela Yokwenza Isibawo: Abazalwana abafanelekako nabafazi babo bamenywa Sihlopha eSibusako.

[Imitlolo yaphasi]