Zifundise Ukurhawukela “Woke Umuntu”
NGESIKHATHI uJesu afundisa abafundi bakhe ukutjhumayela, wabatjela zibekwa bona iindaba ezimnandi zomBuso kaZimu angekhe zimukelwe ngiwo woke umuntu. (Luk. 10:3, 5, 6) Kunjalo nanamhlanjesi, nathi singathi nasisesimini abanye abantu basiphathe kumbi. Lokho-ke kusenze singasabarhawukeli abantu esibatjhumayezako.
Umuntu onesirhawu uyazi bona abantu batlhogani, uyayazi nemirarwabo, yeke uyabazwela, afune ukubasiza. Kodwana nasingathoma silise ukurhawukela abantu esibatjhumayezako, isimu izokuthoma ukudondisa, isiqede amandla. Ngakelinye ihlangothi nasingazifundisa ukurhawukela abantu, sizokukhuthala sivuthe umlilo esimini.—1 Thes. 5:19.
Alo, sizifundisa njani ukurhawukela abantu nanyana kubudisi kangaka? Akhesikhulume nganapa abantu abathathu esingabalingisa—uJehova, uJesu nompostoli uPowula.
IBA NESIRHAWU NJENGOJEHOVA
Sekuziinkulungwana zeminyaka uJehova abekezelela abantu bamhlazisa. Nanyana kunjalo “unomusa kwabangathokoziko nabangakalungi.” (Luk. 6:35) Umusakhe lo, uwubona endleleni abekezela ngayo. Ufisa ngathana “yoke imihlobo yabantu” ingasindiswa. (1 Thim. 2:3, 4) Ukuzondile tle ukukhohlakala, kodwana abantu baligugu kuye kangangobana akafuni bafe.—2 Pit. 3:9.
UJehova uyazwisisa bona uSathana ubakhohlise kangangani abantu abangakholwako. (2 Kor. 4:3, 4) Qala nje, abantwaba bafunzwa amala basesebancani, lokho kwenza kube budisi ukwamukela iqiniso. Ngikho uJehova azimisele ukubasiza nje. Sikwazi njani lokho?
Akhucabange ngendlela uJehova ebekaqala ngayo abantu beNiniva. Nanyana bebanesihluku, uJehova wathi kuJona: “Alo-ke mina bengingakameli bonyana ngitshwenyekele iNiniva idorobho elikhulu kangaka elinabantu abangaphezu kweenkulungwana ezilikhulu namatjhumi amabili abangazi bonyana emuva kukuphi naphambili kukuphi?” (Jona 4:11) UJehova bekazi bona abantwaba bakhohlisiwe, yeke wabarhawukela, wathumela uJona bona abayelelise.
Abantu kufuze babe ligugu kithi sibaqale ngendlela uJehova abaqala ngayo. Lokho sikwenza ngokobana sizimisele ukusiza nanyana ngubani olalelako, nanyana adondisa.
IBA NESIRHAWU NJENGOJESU
UJesu ufana noYise nakuziwa endabeni yokurhawukela abantu abangalaziko iqiniso. “Uthe nakabona iinqubuthu, wazirhawukela, ngombana bezihlukumezekile, zilahliwe njengezimvu ezinganamelusi.” (Mat. 9:36) Bekazwisisa kuhle tle bona abantu ebebazomlalela bafundiswa amala ahlaza tlapa, nokuthi abarholi bekolo yamaJuda bebabahlukumeza. Nanyana bekazi nje ukuthi zinengi izinto ezingabenza bangamlaleli, kodwana ‘wabafundisa izinto ezinengi.’—Mar. 4:1-9.
Ungatshwenyeki khulu nange umuntu angakulaleli nawuthoma ukucoca naye
Ipilo ilivili, umuntu angatjhuguluka amukele iqiniso
Nathi kufuze sizwisise bona kunezinto ezingenza abantu bangasilaleli. Abanye kungenzeka abalithandi iBhayibheli, namkha abawathandi amaKrestu ngebanga lezinto ezimbi ezenziwa babantu abathi bamaKrestu. Abanye batjelwe amala ngathi nekolwethu. Abanye basaba ukuthi nabangasamukela umphakathi uzobahleka, baninwe naziinhlobo zabo.
Abanye kungenzeka bangasilaleli ngebanga lokuthi bakhe bavelelwa zizehlakalo ezibuhlungu ezabatjhiya balimele emmoyeni. UKim ongudade osithunywa sevangeli uthi: “Kwezinye iindawo esiminethu, abantu abanengi babongazimbi bepi, koke abebanakho kwalahleka. Yeke abanalo ithemba ngengomuso. Bahlala batshwenyekile bangathembi muntu. Ngebanga lalokho-ke banengi abasiphikisako. Kwesinye isikhathi ngakhe ngasahlelwa ngitjhumayela.”
Alo, uKim ukghona njani ukuzwela abantu nanyana bamphatha ngalendlela? Uthi: “Nabangiphatha kumbi, ngilinga ukukhumbula izAga 19:11 ezithi: ‘Ohlakaniphileko ubuthaka ekusilingekeni.’ Nangikhumbula ukuthi babuyaphi kungenza ngibarhawukele. Nokho bakhona abalalelako ngombana khona endaweni leyo ngineempindelo ezihle kangangani!”
Singazibuza-ke, ‘Thana bekungimi bengizowamukela na umlayezo womBuso kaZimu?’ Khesithi thana bekungithi ebesisolo sitjelwa amala ngaboFakazi, besingabalalela na nabazositjhumayeza? Kungenzeka ukuthi nathi besizokwenza njengabo, sifune umuntu ozosizwela. Singathomi sikhohlwe bona uJesu wathi siphathe abanye ngendlela ebesingathanda ukuphathwa ngayo. Lokho kuzosikhuthaza bona sibarhawukele abanye nanyana kubudisi.—Mat. 7:12.
IBA NESIRHAWU NJENGOPOWULA
Umpostoli uPowula bekabarhawukela abantu abamtlhorisako. Kubayini? Ngombana naye wakhe wabatlhorisa abanye. Uthi: “Ngaphambilini bengimhlambalazi, ngimhlunguphazi begodu ngiyindoda ehlaza. Nanyana kunjalo, ngatjengiswa isirhawu ngombana ngenza ngokungazi nokungabi nokukholwa.” (1 Thim. 1:13) Ufundile bona uJehova noJesu bamrhawukele khulu. Bekathi nakaqala abantu abatjhumayezako azibone yena.
Kesinye isikhathi bekahlangana nabantu abaqine iinhloko ngokukholelwa emangeni. Bekazizwa njani? IzEnzo 17:16 zithi ngesikhathi uPowula ase-Athene “wasilingeka emmoyenakhe nakabona idorobheli lizele iinthombe.” Wasilingeka bewabeka phasi, wagcina sele atjhumayeza abantwaba. (IzE. 17:22, 23) Bekatjhumayela ngokuya ngokwemihlobo yabantu ‘bona ngazo zoke iindlela asindise abanye.’—1 Kor. 9:20-23.
Nathi singamlingisa uPowula ngokuzwisisa ikolo yabantu esibatjhumayezako namabanga abenza bangasilaleli, sibe nekghono lokubeka “iindaba ezimnandi.” (Isa. 52:7) Udade ibizo lakhe elinguDorothy uthi: “Esiminethu, abantu bazi uZimu alikhuni agweba abantu. Ngiyawuthokoza umbonwabo, bese ngivula iBhayibheli ngiveze bona uJehova ulithando, ngibatjele nalokho azosenzela khona ngomuso.”
“RAGELA PHAMBILI UHLULA OKUMBI NGOKUHLE”
Njengombana ‘imihla yokuphela’ ifinyelela esiphethweni sayo, abantu esibatjhumayezako ‘bazokusuka kokumbi baye kokumbi khulu.’ (2 Thim. 3:1, 13) Kodwana thina asifuni bona lokho kusiqedele ithabo nesirhawu. UJehova angasinikela amandla ‘wokuhlula okumbi ngokuhle.’ (Rom. 12:21) Udade oliphayona uJessica uthi: “Abantu evane ngihlangane nabo ukuthobeka do, nomlayezwethu lo bawuthathela phasi. Iyasilinga into leyo. Kodwana ngiyayithandazela kuJehova, ngibawe isizo lokuqala umuntu ngendlela amqala ngayo. Nangenze njalo ukusilingekokha kuyakhamba, ngisale ngicabanga ngendlela yokusiza umuntu.”
Sizokuragela phambili sifuna abantu abazimisele ukufumana ukuphila okungapheliko
Abanye bangagcina sebasilalela nababona silinga ngamandla ukubasiza balotjhe uZimu
Nabantu esisebenza nabo esimini kufuze sicabange indlela yokubakhuthaza. UJessica uthi: “Nangabe umfowethu akhenge aphathwe kuhle esimini, ngise ngiyithalalise indaba leyo ngikhulume ngento eyakhako, njengezinto ezihle esizithola esimini nanyana bangasilaleli.”
UJehova uyazazi iintjhijilo esiqalana nazo esimini. Uthaba kangangani nasimlingisa ngokurhawukela abanye! (Luk. 6:36) Kuliqiniso bona uJehova akarhawukeli umuntu mlibe. Siyaqiniseka bona uyasazi isikhathi esifaneleko sokuqeda iphasi elimbeli. Thina asirhabe sitjhumayele bekufike ilangelo. (2 Thim. 4:2) Asirageleni phambili sikhuthale, sirhawukele “woke umuntu.”