Ipilwakho Nayibogabogako

ULinda oneminyaka ema-71 uthi: “Ngathi nangifumana ukuthi nginekankere yamaphaphu namathumbu, ngacabanga ukuthi sekuphelile ngami. Ngathi nangifika ekhaya ngibuya kwadorhodera ngazitjela ukuthi, ‘Kulungile, akusiyinto ebengiyilindele kodwana ngizokufumana indlela yokuqalana nayo.’”

U-Elise oneminyaka ema-49 uthi: “Ngiphethwe kugula okubuhlungu okubulala imizwa emhlathinami osehlangothini langesinceleni. Ngezinye iinkhathi, kuba buhlungu khulu kangangobana ngizifumana sengigandelelekile. Esikhathini esinengi, ngiba nesizungu bengicabange nokuzibulala.”

Indoda egulako ihlezi phezu kwesihlalo esisunduzwako izonjwe babantu abayithandako

NANGE ugulela ukufa namkha kugula umuntu omthandako, uyazi bona kubudisi kangangani ukuqalana nento leyo. Kuthi kusese njalo, kufuze uqalane namazizo atjhugulukako alethwa kugulokho. Ukubonana nabodorhodera, ubudisi bokufumana imitjhoga ezokulapha mhlamunye nemali yokuyibhadela, nokhunye ukugula okuseqadi okubangwa kusela imithi kungakuthusa bekukugandelele. Ukugandeleleka emkhumbulweni lokha nawugulako kungakuqeda amandla.

Singalifumanaphi isizo? Abantu abanengi bafumene ukuthi ukuthembela kuZimu, ukuthandaza nokufunda iindaba eziseBhayibhelini kubaduduza khulu. Ithando nesekelo abalifumana emalungeni womndeni nebanganini libasiza khulu.

IZINTO EZISIZE ABANYE BAKGHODLHELELA

URobert oneminyaka ema-58 uthi, “Nawugulako kufuze ube nokukholwa kuZimu, uzokusiza bona ukghodlhelele. Thandaza qobe umtjele indlela ozizwa ngayo. Mbawe bona akuphe ummoya ocwengileko. Mbawe nokuthi akusize ube namandla wokukhuthaza umndenakho nokuthi ukghone ukuqalana nokugula kwakho.”

“Kududuza khulu umndenakho nawukusekela. Bangifonela qobe bangibuze bona ngizizwa njani. Boke abangani enginabo bayangikhuthaza. Bangenza ngizizwe ngcono begodu lokho kungenza ngikghone ukukghodlhelela.”

Nange uvakatjhele umuntu ogulako tjheja naku okutjhiwo nguLinda: “Umuntu ogulako ufuna ukuphila ipilwakhe yangamalanga begodu kungenzeka akakuthabeli ukukhuluma ngokugula. Yeke khuluma ngezinto enihlala nicoca ngazo.”

Amandla avela kuZimu, imiTlolo eduduzako nesekelo ozolifumana ebanganini nemndeninakho kuzokusiza ube nethemba, begodu ubone ukuthi ipilo iqakathekile ngitjho nanyana ipilwakho ibogaboga.

ImiTlolo EseBhayibhelini Engakusiza

Thembela kuZimu.

“Ngathandaza kuSomnini, wangiphendula; wangitjhaphulula kikho koke ukwesaba kwami. Nasi isihlupheki esalilako, uSomnini wasizwa.”—IRhubo 34:5, 7.

ULinda ekhesakhuluma ngaye phambilini uthi: “Akhenge ngithandazele bona uZimu angenze ngibe ongcono. Bengihlala ngithandazela bona angisize ngibe namandla begodu ngikghone ukubekezelela ukugula.”

Funda iliZwi lakaZimu bona likuphe amandla.

“Akunamhlali weJerusalema ozakuthi: ‘Ngiyagula.’”—Isaya 33:24.

Zindla ngeenthembiso zakaZimu zengomuso, lokho kuzokunikela ithemba elizokupha amandla wokukghodlhelela.

Bawa umndeni nabangani bakho bona bakusekele.

“Umngani uhlala athembekile, iye, ungumfo obelethelwe iinkhathi ezibudisi.”—IzAga 17:17.

U-Elise ekhesakhuluma ngaye ekuthomeni uthi: “Ungahlali uwedwa. Vumela abangani bakho bakusize. Kungenzeka kube neenkhathi lapho uzizwa uwedwa khona bewucabange nokuthi uZimu akakulaleli kodwana ungabi yikomo edla yodwa.”