Asitjengiseni Ukuthokoza Kwethu ISikhumbuzo Esizokugidingwa Ngo-Apreli 17
1. Ngimuphi umbono womrhalani ofaneleka khulu ngesikhathi seSikhumbuzo?
1 Atjhukunyiswa yizenzo ezinengi zakaJehova zomusa netjhaphululo, umrhalani wabuza: “Khuyini engingambuyisela ngayo uJehova ngazo zoke iinzuzo zakhe kimi?” (Rha. 116:12) Namhlanjesi, iinceku zakaZimu zinamabanga amanengi wokuthokoza. Ngemva kwamakhulu weemnyaka amezwi aphefumulelweko la atlolwa, uJehova wanikela isintu isipho esikhulu—isihlengo. Njengombana silungiselela ukukhumbula ukufa kwakaKrestu ngo-Apreli 17, sinamabanga amahle wokutjengisa ukuthokoza kwethu.—Khol. 3:15.
2. Ngimaphi amanye amabanga asenza bona sithokoze isihlengo?
2 Iimbusiso Zesihlengo: Ngesihlengo, sikghona ukufumana ‘ukulitjalelwa izono zethu.’ (Khol. 1:13, 14) Lokhu kusinikela ithuba lokukhonza uJehova ngesazelo esihlanzekileko. (Heb. 9:13, 14) Singathabela ikululeko yokukhuluma noJehova nesiya kuye ngomthandazo. (Heb. 4:14-16) Labo ababonisa ikholo esihlengweni banethemba elikhulu kangangani lokufumana ukuphila okungapheliko!—Jwa. 3:16.
3. Singakutjengisa njani ukuthokoza uJehova ngesihlengo?
3 Indlela Esingatjengisa Ngayo Ukuthokoza: Enye indlela esingatjengisa ngayo ukuthokoza okukhulu kucabangela ukufundwa kweBhayibhili kweSikhumbuzo qobe lilanga nokuzindla ngakho. INqabayokulinda ka-February 1, 2011, enesihloko esithi “Ingabe Usululungele Usuku Olubaluleke Kunazo Zonke Onyakeni?” itlanyelwe bona isirhelebhe senze lokho. Singatjela uJehova ngomthandazo osuka ehliziyweni indlela isihlengo esiqakatheke ngayo kithi. (1 Tes. 5:17, 18) Ukuba khona kwethu eSikhumbuzweni, ukulalela umyalo kaJesu kutjengisa ukuthokoza. (1 Kor. 11:24, 25) Ngaphezu kwalokho, singalingisa ithando lakaJehova elidephileko ngokumema abantu abanengi ngendlela esingakghona ngayo bona babe khona.—Isa. 55:1-3.
4. Khuyini ekufuze sizimisele ukuyenza?
4 Iinceku zakaJehova ezithokozako angekhe zithathe iSikhumbuzo njengomunye nomunye umhlangano. Mhlangano womnyaka oqakatheke khulu! Njengombana iSikhumbuzo sitjhidela, kwanga ukuzimisela kwethu kungafana nokomrhalani owatlola: “Dumisa uSokulunga, mphefumlo wami! Ungakhohlwa yoke imisebenzi yakhe yomusa!”—Rha. 103:2.