Uzolisebenzisa Na Ithubeli?
IsiKhumbuzo Esizokuba Naso Sisivumela Bona Sitjengise Ukuthokoza
1. Ngiliphi ithuba elikhethekileko isiKhumbuzo elisinikela lona?
1 IsiKhumbuzo esizokuba ngo-Apreli 14 sizosinikela ithuba elikhethekileko lokutjengisa ukuthokoza ngobuhle uJehova asenzele bona. Ukulandisa okukuLukasi 17:11-18 kutjengisa indlela uJehova noJesu abakuqala ngayo ukuthokoza. Ngokudanisako, munye kwaphela kwabalitjhumi abalatjhwa ikhwekhwe owathokozako. Esikhathini esizako, isipho sesihlengo sizokulapha koke ukugula ngokupheleleko, sikwenze kube ngokwamambala ukuphila okungapheliko! Asizazi bona sizokuthokoza uJehova qobe langa ngeembusiso ezinjalo. Kodwana singakutjengisa njani ukuthokoza kwethu eemvekeni ezizakwezi?
2. Singakuhlawulela njani ukuthokoza ngesihlengo?
2 Hlawulela Ukuthokoza: Amazizo wokuthokoza akhiwa micabango. Bona sakhe ukuthokoza ngesihlengo, singasizwa lihlelo elikhethekileko lokufundwa kweBhayibheli ngesiKhumbuzo elifumaneka eendaweni ezimbalwa, ezinjengekhalanda, UkuHlolisisa ImiTlolo Qobe Langa. Kubayini ningacoci ngokwazisokhu njengomndeni? Ukwenza njalo kuzokwandisa ukuthokoza kwethu isihlengo. Lokhu, kuzokuba nomthelela omuhle endleleni esiziphatha ngayo.—2 Kor. 5:14, 15; 1 Jwa. 4:11.
3. Singakutjengisa ngaziphi iindlela ukuthokoza kwethu ngesikhathi sesiKhumbuzo?
3 Tjengisa Ukuthokoza: Ukuthokoza kufakazelwa zizenzo. (Kol. 3:15) Umuntu obekanekhwekhwe wenza imizamo yokobana afumane uJesu begodu amthokoze. Akunakuzaza bona wacocela abanye ngesimangaliso sokulatjhwa kwakhe nguJesu. (Luk. 6:45) Ukuthokoza kwethu isihlengo kuzositjhukumisa na bona sihlanganyele ngetjiseko ejimeni lokukhangisa isiKhumbuzo? Ubuphayona besigiyani namkha ukuhlanganyela ngokungeziweko ekonzweni hlangana nesikhathi sesiKhumbuzo kungenye yendlela ehle yokutjengisa ukuthokoza. Ihliziyo ethokozako izositjhukumisela bona samukele iimvakatjhi ngentambama yesiKhumbuzo, begodu izosenza sifumaneke bona siphendula imibuzwabo.
4. Singenza njani bona singazisoli isiKhumbuzo nasele sidlulile?
4 Inga-kghani isiKhumbuzwesi sizokuba ngesamaswaphelo? (1 Kor. 11:26) Asazi. Kodwana siyazi bona nange singadlula, lizabe lidlulile ithuba elikhethekileko lokutjengisa ukuthokoza. Uzolisebenzisa? Kwanga amezwethu wokuthokoza nokuzindla kweenhliziyo zethu kungaletha ithabo kuJehova, uMuphi wesihlengo.—Rhu. 19:15 [19:14, NW]