Ibhoksi Leembuzo

◼ Kufuze sithathe isikhathi eside kangangani sifunda nomfundi weBhayibhili othuthukako?

Kungcono ukuragela phambili sifunda nomfundi weBhayibhili othuthukako bekube kulapho aqeda iincwadi eembili—Khuyini Kwamambala Okufundiswa YiBhayibhili? nethi ‘Hlalani Ethandweni LakaZimu.’ Lokhu liqiniso ngitjho nanyana umfundi angabhabhadiswa ngaphambi kobana aqede iincwadi eembili. Ngemva kokubhabhadiswa kwakhe singaragela phambili sibika isikhathi, amabuyelo nesifundo. Nengabe umrhuweleli ukhamba nathi begodu uyahlanganyela esifundweni, naye angasibala isikhathi.—Qala INkonzo Yethu YoMbuso, yakaMatjhi 2009 ikhasi 2.

Kuqakathekile bona abantu abatjha babe nesisekelo esihle eqinisweni ngaphambi kobana silise ukufunda nabo. Kufuze ‘badzimelele’ kuKrestu begodu ‘baqine ekukholweni’ bona bakghone ukujamelana neenlingo abazokuqalana nazo. (Khol. 2:6, 7; 2 Thi. 3:12; 1 Pit. 5:8, 9) Ngaphezu kwalokho, ukufundisa abanye ngokuphumelelako, kufuze “balazi iqiniso.” (1 Thi. 2:4) Ngokuqeda iincwadi eembili nabafundi bethu, sibarhelebha bona badzimelele ‘endleleni eya ekuphileni.’—Mat. 7:14.

Ngaphambi kobana umuntu avunyelwe ukubhabhadiswa, abadala kufuze baqiniseke bona uzizwisisa kuhle iimfundiso zeBhayibhili eziyihloko begodu uphila ngokuvumelana nazo. Abadala kufuze batjheje khulu nebacangela umfundi ongakayiqedi incwadi yokuthoma. Nengabe umuntu akakakulungeli ukubhabhadiswa, abadala bazokuqinisekisa bona ufumana irhelebho alitlhogako bonyana afanelekele ukubhabhadiswa esikhathini esizako.—Qala incwadi ethi, Ukuhlelelwa Ukwenza Intando KaJehova, amakhasi 217-218.

[Umkhangiso osekhasini 2]

Kuqakathekile bona abantu abatjha babe nesisekelo esihle eqinisweni