Ukufakaza Endleleni Okuphumelelako
1. Ngiyiphi enye indlela esingalingisa ngayo uJesu?
1 Ekonzwenakhe yephasini, uJesu khange azaze ukukhuluma nabantu ahlangana nabo endleleni neendaweni ezinye zomphakathi. (Luka 9:57-61; Jwa. 4:7) Gade afuna ukuhlanganyela umlayezo oqakathekileko nabantu abanengi ngendlela okungakghoneka ngayo. Namhlanjesi, ukufakaza endleleni yindlela ehle khulu yokusiza abantu bafumane ukuhlakanipha kwakaZimu. (Iziy. 1:20) Ukuphumelela kwethu kuzokwanda nesithatha igadango sisebenzisa nokwahlulela okuhle.
2. Igadango libandakanyeka bunjani newenza umsebenzi wendleleni?
2 Thatha Igadango: Kuba ngcono khulu ukuya emntwini ngamunye kunokujama namtjhana uhlale endaweni eyodwa ulindele abadlulako beze kuwe. Momotheka, mqale ngemehlweni, yiba nomoya ophasi begodu ube nobungani. Nengabe usebenza nabanye abarhuweleli, kungcono khulu ukuya ebantwini ngokuhlukana. Igadango godu liyatlhogeka bona ulandelele ikareko oyifumeneko. Nekufanelekako, ngemva kwengcoco, ngomusa mbuze bona ningathintana njani godu. Abanye abarhuweleli benza umsebenzi wendleleni endaweni eyodwa qobe, okubenza bakghone ukukhuluma nabantu abafanako ngokubuyelelweko begodu bakhe ikareko.
3. Singakusebenzisa njani ukwahlulela okuhle nesifakaza endleleni?
3 Sebenzisa Ukwahlulela Okuhle: Sebenzisa ukwahlulela okuhle ekuqunteni bona uzokujama kuphi endleleni begodu uzokuya kibobani. Akutlhogeki bona ufakaze kiwo woke umuntu odlulako. Tjhejisisa. Isibonelo, nengabe umuntu urhabile, kungaba kuhle umlise adlule. Nengabe ufakaza phambi kwendawo yebhizinisi, tjheja bona ubalekele ukubangela ukunghonghoyila okungatlhogekiko okuvela kumphathi webhizinisi leyo. Kanengi kubangcono ukufakaza ebantwini nabaphuma ngebhizinisini kunalokha nebangenako. Iya ebantwini ngendlela engekhe ibathuse. Godu, tjheja newukhambisa iincwadi. Nengabe umuntu utjengisa ikareko encani, ungamnikela iphetjhana esikhundleni sabomagazini.
4. Kubayini ukufakaza endleleni kuzuzisa begodu kulihlobo lokufakaza okuthabisako?
4 Ukufakaza endleleni kusenza sikwazi ukurhatjha imbewu yeqiniso enengi ngesikhathi esincani. (Mtj. 11:6) Abanye abantu esihlangana nabo kungenzeka kube ngilabo esingakghoni ukubathola emakhaya nesenza umsebenzi wendlu nendlu. Kubayini ungenzi amalungiselelo wokuhlanganyela emsebenzini wokufakaza endleleni, okuyikonzo ethabisako nephumelelako?