Ungakghona Na UkuHlanganyela ESimini YaNtambama?
1. Ngokwesinye isazi, umpostoli uPowula bekatjhumayela nini umuzi nomuzi?
1 Ngokwencwadi ethi, Daily Life in Bible Times ngokuvamileko umpostoli uPowula wahlanganyela kwamambala ekonzweni yomuzi nomuzi “kusukela ngo-4 ntambama bekube sebusuku.” Asazi bona leli bekulihlelo lakaPowula elijayelekileko, kodwana siyazi bonyana uPowula bekazimisele ‘ukwenza koke lokhu ngebanga levangeli.’ (1 Kor. 9:19-23) Lokhu bekuhlanganisa nokuhlela izinto zakhe bonyana aye emzini nomuzi lapho angakghona ukukhuluma nabantu abanengi khona.
2. Kubayini iinkhathi zantambama kuziinkhathi ezihle bona sihlanganyele ekonzweni?
2 Abarhuweleli eendaweni ezinengi sebajayele ukungena umuzi nomuzi ekuseni phakathi neveke. Nokho, kusesesikhathi esihle lesi endaweni yangekhenu? Elinye iphayona likhuluma ngesimu yangakilo lithi: “Kubudisi ukufumana abantu emakhaya emini. Kodwana abantu abanengi bakhona ntambama.” Ukutjhumayela ntambama kungasinikela ithuba elihle bona sifikelele amadoda ngokukhethekileko, ngeendaba ezimnandi. Kanengi abaninimuzi vane baphumulile begodu bazimisele ukucoca. Nengabe kuyazuzisa ukwenza njalo, abadala kufuze bahlele imihlangano yekonzo yesimini yantambama.
3. Singakutjengisa njani ukulemuka nesitjhumayela ntambama?
3 Sebenzisa IKghono LokuLemuka: Nesitjhumayela ntambama, kuqakathekile ukulemuka. Ngokwesibonelo, nekwenzeka ukhuluma nothileko ngesikhathi esingasisihle, njengesikhathi sokudla kwantambama, kungcono ukumtjela bona uzokubuya ngokukhamba kwesikhathi. Nengabe kumnyama, jama lapho umninimuzi angakubona khona, begodu msinyana uzazise utjho nomnqopho wokuvakatjha kwakho. Godu kukuhlakanipha ukusebenza ngababili namtjhana ngeenqhema begodu nibe lapho kunamalampa endleleni la ningasi nodwa khona. Ningafiki sekulada bona nithikazise abaninimuzi balungiselela ukulala. (2 Kor. 6:3) Nengabe indawo enikiyo ayikaphephi nesele kurhwaqele, tjhumayelani lapho kungakabi mnyama khulu.—IzA. 22:3.
4. Ngiziphi iimbusiso ezifumaneka ngokutjhumayela ntambama?
4 IimBusiso: Ikonzo ithabisa khulu nesifumana abantu esingafakaza kibo. Begodu nesikghona ukutjhumayela ngokungeziweko, aba manengi amathuba wokusiza abanye bona “baphuluswe balazi iqiniso.” (1 Thi. 2:3, 4) Ungakghona na ukuhlela ubujamo bakho bona uhlanganyele ekutjhumayeleni kwantambama?