Lithande Ilungelo Lakho Lekonzo
1. Abanengi ephasini baliqala njani ilungelo lethu lomsebenzi wokutjhumayela?
1 Abanengi ephasini lakaSathana baqala umsebenzi wethu wokutjhumayela ‘njengobudhlayela.’ (1 Kor. 1:18-21) Nesingakatjheji, umbono ofipheleko lo ungabangela bona siphelelwe mamandla bewufiphaze netjisakalo yethu. (Iziy. 24:10; Isa. 5:20) Ngimaphi amabanga esinawo wokuthanda ilungelo esinalo njengaboFakazi bakaJehova?—Isa. 43:10.
2. Kubayini ikonzo ibizwa ngokuthi ‘msebenzi ocwengileko’?
2 “Umsebenzi Ocwengileko”: Umpostoli uPowula waqala ikonzo ‘njengomsebenzi ocwengileko.’ (Rom. 15:15, 16, NW) Ikonzo ‘iimsebenzi ocwengileko’ ngayiphi indlela? Ukuhlanganyela kiyo kusenza iinsebenzi ‘ezibambisene’ ‘noCwengileko,’ uJehova, begodu kudlala indima ekucwengisweni kwebizo lakhe. (1 Kor. 3:9; 1 Pit. 1:15) UJehova uqala ukutjhumayela kwethu ‘njengeenthelo esinikela ngazo,’ ngalokho ikonzo isithelo esihle sokukhulekela kwethu.—Heb. 13:15.
3. Khuyini okwenza ukutjhumayela iindaba ezihle kube yilungelo elikhulu kangaka?
3 Ukutjhumayela iindaba ezihle yilungelo elikhulu elithatjelwa ngabambalwa. Iingilozi bezingakuthabela ukwenza umsebenzi lo begodu akunakuzaza bona bezizowenza kuhle. (1 Pit. 1:12) Nanyana kunjalo, uJehova ukhethe thina, abantu abanesono, “izitja zomdaka” bona sibe nelungelo lokwenza umsebenzi okarisako lo!—2 Kor. 4:7.
4. Singatjengisa njani bona siyayithanda ikonzo?
4 Umsebenzi Oza Maqangi: Ngebanga lokobana silithabela kwamambala ilungelo lethweli, siqala ikonzo njengenye ‘yezinto eziqakatheke khulu’ emaphilwenethu. (Fil. 1:10, NW) Ngalokho, qobe veke sizibekela isikhathi sokuba nengcenye kiyo. Umbhini oqala ilungelo lokudlala i-okhestra edume njengeyigugu ephasini, angalungiselela kuhle isikhathi ngasinye ngaphambi kokuyokudlala, godu alwele nokuthuthukisa ikghono lakhe. Ngokufanako, nathi sizokulungiselela ngaphambi kokuya ekonzweni, khona sizokwazi ukusingatha “ilizwi [leqiniso] ngokutjhejisisa okukhulu,” begodu sizokusebenzela ekuthuthukiseni “nekghono lokufundisa.”—2 Thi. 2:15; 4:2.
5. Bobani abathabela ikonzwethu?
5 Ungavumeli imibono yabanye abantu ikuqede amandla. Khumbula nokuthi basesebanengi abantu abangathabela bona sibavakatjhele emasimini wethu. Nokho, asifuni ukwamukelwa babantu. Okuqakatheke khulu yindlela uJehova azizwa ngayo, nokuthi uyithabela khulu imizamo yethu yokuzikhandla.—Isa. 52:7.