Amabanga Alitjhumi Nambili Wokutjhumayela

Kubayini sitjhumayela begodu sifundisa abantu iindaba ezimnandi? Kghani kungombana sifuna ukusiza abantu abaneenhliziyo ezithembekileko bona bangene endleleni eya ekuphileni? (Mat. 7:14) Libanga lokuthoma lelo elibalwe ngenzasi, kodwana akusilo eliyihloko. Ucabanga bona ngiliphi ibanga eliqakatheke khulu hlangana nali-12 alandelako wokutjhumayela?

1. Kusisiza ekuphuluseni ukuphila kwabantu.—Jwa. 17:3.

2. Kusisiza ekuyeleliseni abantu abambi.—Eze. 3:18, 19.

3. Kuzalisa isiporofido seBhayibhili.—Mat. 24:14.

4. Kutjengisa ukulunga kwakaZimu. UJehova ngeze asolwa ngokobana utjhabalalise abantu abambi angakabanikeli ithuba lokuphenduka.—IZe. 17:30, 31; 1 Thi. 2:3, 4.

5. Kuyasitjhaphulula esikolodweni sokunikela abantu abathengwe ngeengazi zakaJesu isizo elingokomoya.—Rom. 1:14, 15.

6. Kwenza bona singabi nomlandu wokubulala.—IZe. 20:26, 27.

7. Yifuneko yokuphuluswa kwethu.—Eze. 3:19; Rom. 10:9, 10.

8. Kutjengisa ithando lethu ngabomakhelwana.—Mat. 22:39.

9. Kutjengisa ukulalela uJehova neNdodanakhe.—Mat. 28:19, 20.

10. Kuyingcenye yokukhulekela kwethu.—Heb. 13:15.

11. Kutjengisa ithando lethu ngoZimu.—1 Jwa. 5:3.

12. Kunomthelela ekucwengisweni kwebizo lakaJehova.—Isa. 43:10-12; Mat. 6:9.

Kuliqiniso, la akusimabanga wokobana sihlanganyele ekonzweni kwaphela. Ngokwesibonelo, ukutjhumayela kuqinisa ikholo lethu begodu kusinikela ilungelo lokuba ziinsebenzi ezikunye noZimu. (1 Kor. 3:9) Nokho, ibanga eliqakatheke khulu lokuhlanganyela ekonzweni ngileli le-12. Kungakhathaliseki bona abantu basabela njani, ikonzo inomthelela ekucwengisweni kwebizo lakaZimu begodu uJehova unikela ipendulo kiloyo omthukako. (Iziy. 27:11) Kwamambala, sinamabanga amahle khulu ‘wokuragela phambili sifundisa ngaphandle kokuliselela sitjhumayela iindaba ezimnandi.’—IZe. 5:42.