‘Hlalisanani Kuhle NaBanye’
1. Ngisiphi isiluleko seBhayibhili okufuze sisisebenzise nesihlangana nabaninimuzi abasilingekileko?
1 Abantu bakaJehova bathanda ukuthula, nekozwethu ngeyokuthula. (Isa. 52:7) Nokho, ngezinye iinkhathi sihlangana nabantu abasilingwa kufika kwethu emizinabo. Khuyini ezosisiza bona sibe nokuthula ebujamweni obunjalo?—Rom. 12:18.
2. Kubayini kuqakathekile ukuba nelemuko?
2 Yiba NeLemuko: Nanyana abanye basabela ngokukwata ngombana baphikisa iqiniso, kungenzeka abanye vane badinwe zizinto ezingahlobani nomlayezo wethu wokutjhumayela. Mhlamunye sifike ngesikhathi esimbi. Kungenzeka umninimuzi ukwatiswe mirarwakhe. Ngitjho nanyana kuziindaba ezimnandi ezimenze wakwata, kufuze sikhumbule bona ukusabela kwakhe kungenzeka kubangelwa kukobana uphambukisiwe. (2 Kor. 4:4) Ukuba nelemuko kuzosisiza sihlale sinomoya opholileko begodu singakuthatheli ehloko lokho akutjhwileko.—IzA. 19:11.
3. Singayitjengisa njani ihlonipho kumninimuzi?
3 Tjengisa IHlonipho: Abanengi esimini babambelele ngokuqinileko eenkolelweni zabo. (2 Kor. 10:4) Banelungelo lokuzikhethela bona bazokulalela nofana awa. Angekhe sifune ukunyaza iinkolelo zomninimuzi namtjhana sitjengise ubujamo bengqondo bokuzenza abazi khulu. Nebasibawa bona sikhambe, kufuze sikuhloniphe lokho.
4. Kutjho ukuthi ukukhuluma ngomusa?
4 Khuluma NgoMusa: Ngitjho nanyana siphathwa kumbi, ipendulwethu kufuze ibe nomusa. (Khol. 4:6; 1 Pit. 2:23) Kunokobana uvuse ipikiswano, linga ukufumana enivumelana ngakho. Mhlamunye singalinga ngomusa ukufumana iinzathu ezenza umninimuzi aphikise. Nokho, bona sibalekele ukuphikisana naye khulu, kungaba kuhle bona ngezinye iinkhathi singarageli phambili nengcoco.—IzA. 9:7; 17:14.
5. Ngiziphi iinzuzo ezifumaneka ngokuba nokuthula ekonzweni?
5 Nesinokuthula, kungenzeka umninimuzi akhumbule indlela esasabela ngayo bese alalele lokha omunye alinga ukufakaza kuye ngesinye isikhathi. (Rom. 12:20, 21) Ngitjho nanyana abonakala aphikisa ngokuqinileko, angaba mnakwethu langelinye. (Gal. 1:13, 14) Kungakhathaliseki bona uzokugcina anekareko eqinisweni nofana awa, sizokudumisa uJehova begodu sikghabise ifundiswethu nengabe sibulunga ukuzibamba begodu siba nokuthula.—2 Kor. 6:3.