‘Nikela UbuFakazi ObuPheleleko’
1. Umpostoli uPowula wasibekela siphi isibonelo esihle ekonzweni?
1 “Yenzisisa ikonzwakho.” (2 Thi. 4:5, Byington) Ngokuqinisekileko umpostoli uPowula gade anekululeko yokukhuluma nekanikela uThimothi isiyeleliswesi. UPowula waqeda amakhambo amathathu weenthunywa zevangeli hlangana nomnyaka ka-47 newaka-56 C.E. Incwadi yeZenzo ikhuluma ngoPowula ngokubuyelelweko anikela ‘ubufakazi obupheleleko.’ (IzE. 23:11; 28:23) Singakwenza njani lokho esikhathini sethu?
2. Singabunikela njani ubufakazi obupheleleko nesitjhumayela umuzi nomuzi?
2 EMzini noMuzi: Emzamweni wokufumana abaninimuzi abangakhenge bezwe iindaba ezimnandi, kungatlhogeka bona sibavakatjhele ngeenkhathi ezihlukahlukeneko. Kungenzeka bona indoda yekhaya ikhona ngeenkhathi zantambama namtjhana ngepelaveke. Kufuze sizimisele ukukhuluma nomuntu emzini omunye nomunye, sibuyele kilabo esingakhenge sibathole ekhaya. Kuthiwani nengabe imizamwakho yokufumana umuntu ayiphumeleli? Mhlamunye ukumtlolela incwadi nofana ukumthinta ngomtato kungaba nemiphumela emihle.
3. Ngimaphi amathuba onawo wokufakaza tjhatjhalazi nangokungakahlelwa?
3 UkuTjhumayela Tjhatjhalazi NangokungakaHlelwa: Iinceku zakaJehova namhlanjesi zikwenza kwaziwe “ukuhlakanipha kweqiniso” kibo boke abazokulalela. Ngezinye iinkhathi lokho kwenzeka “endleleni” namtjhana “tjhatjhalazi.” (IzA. 1:20, 21) Nesenza imisebenzethu yaqobe langa, siyakuphaphamela ukunikela ubufakazi? Kghani kungatjhiwo ngathi bona ‘sinikela soke isikhathi sethu ekutjhumayeleni umlayezo’? (IzE. 18:5) Nengabe kunjalo, ngalokho sizalisa isibopho sethu ‘sokunikela ubufakazi obupheleleko.’—IzE. 10:42; 17:17; 20:20, 21, 24.
4. Umthandazo nokuzindla kunamuphi umthelela ekunikeleni ubufakazi obupheleleko?
4 Nokho, ngezinye iinkhathi ngebanga lokubogaboga kwethu mathupha namtjhana ukuba kwethu neenhloni ngokwemvelo, singazibamba ekunikeleni ubufakazi. Ngokuqinisekileko, uJehova uyakwazi ukulinganiselwa kwethu. (Rha. 103:14) Nokho, nekuphakama ubujamo obunjalo, singathandaza kuye sibawe isibindi sokukhuluma. (IzE. 4:29, 31) Godu nesenza isifundo somuntu mathupha begodu sizindla ngeLizwi lakaZimu, singadzimelela ekudephiseni ukwazisa kwethu ngokuphumelela kweendaba ezimnandi. (Fil. 3:8) Lokhu kuzositjhukumisela bona sizirhuwelele ngetjiseko!
5. Singahlanganyela njani ekuzalisekeni kwesiporofido sakaJuweli?
5 Isiporofido sakaJuweli sabikezela bona ngaphambi kokufika kwelanga lakaJehova elikhulu nelisabekako, abantu bakaZimu “bazokuragela phambili” begodu bangavumeli litho libaqede amandla ekutjhumayeleni. (Juw. 2:2, 7-9) Kwanga singenza koke esingakwenza emsebenzini wokufakaza ongeze wabuyelelwa lo!