“Ukunikela Ubufakazi Obupheleleko” NgoMbuso KaZimu
1. Khuyini esizokucabangela eSifundweni seBhayibhili Sebandla ngeveke ethoma ngoMatjhi 14?
1 Hlangana neveke kaMatjhi 14, 2011, sizokuthoma ukufunda incwadi ethi, “Ukunikeza Ubufakazi Obuphelele” NgoMbuso KaNkulunkulu eSifundweni seBhayibhili Sebandla. Incwadi le ihlanganisa incwadi yeZenzo ngendlela yokobana umfundi angezwa ithabo lezehlakalo ezikhamba ngokurhabako ezitlolwe kiyo. Esikhundleni sokukhulumela ivesi nevesi, incwadi ethi, Ukunikeza Ubufakazi inikela iimfundo ezisencwadini yeZenzo begodu isirhelebha sibone indlela esingazisebenzisa ngayo ekuphileni.—Rom. 15:4.
2. Hlathulula okhunye kokumumethwe yincwadi ethi, Ukunikeza Ubufakazi.
2 Okumumethwe Yincwadi Le: Isingeniso esisekhasini 2 yincwadi enomuzwa ofuthumeleko evela eSihlopheni Esibusako etjengisa indlela esifuna uzuze ngayo encwadini le. Ukuthoma kusahluko 2, kunomuda ohlathulula indlela isahluko ngasinye esinamandla ngayo noMtlolo oveza ingcenye yeZenzo okuzokukhulunywa ngazo. Izahluko ezinengi zinamabhoksi wemininingwana anikela ukwaziswa ngabantu, ngeendawo namtjhana izehlakalo. Iinkhala ezingeqadi zenzelwe bona sitlole amaphuzu. Kiyo incwadi le kuneenthombe ezinengi eziveza izehlakalo zeBhayibhili ezisirhelebha sibone izehlakalo eziqakathekileko, bese ekhasini lamaswaphelo kunekomba elirhelebho ehlathulula okwenzeka eenthombeni ngokuhlukahlukana kwazo. Ngaphakathi kwekhava yangaphambili neyangemva kunemebhe ezosirhelebha ukulandela ituthuko yabakhulekeli bekhulu lokuthoma njengombana bathoma ukurhatjha iindaba ezihle “emaqintelweni wephasi.”—IZe. 1:8.
3. Ngimiphi iimbuzo eqakathekileko isifundo sethu sencwadi yeZenzo esizoyiphendula?
3 Iimpendulo Zeembuzo Eqakathekileko: Ukucabangela incwadi le kuzosirhelebha sizibone ngokukhanyako iimpendulo eziqakathekileko zeembuzo emalungana nekonzo yobuKrestu. Isibonelo, ngimuphi umlayezo nomsebenzi otjengisa abalandeli bakaJesu Krestu bamambala? Ngubani onqophisa umsebenzi wokutjhumayela wephasi loke, begodu uwunqophisa njani? Ngimaphi amathuba itjhutjhiso nokuphikiswa okuwenzela iinkhonzi? Ngiyiphi indima edlalwa mumoya ocwengileko ekonzwenethu?
4. Singazuza njani ngokuzeleko ekucabangeleni incwadi le?
4 Bona uzuze ngokuzeleko, lungiselela kusesenesikhathi begodu uhlele ukuba nengcenye engcocweni yebandla. Yiba khona komunye nomunye umhlangano, bewutjengise indlela ongakusebenzisa ngayo okufundileko ekonzwenakho wedwa. Kwanga ukucabangela kwethu incwadi le kungathuthukisa ukunikela kwethu ubufakazi obupheleleko ngoMbuso kaZimu!—IZe. 28:23.