IJima LokuMemela AbaNtu EsiKhumbuzweni LiThoma NgoMatjhi 1
1. Sizokuthoma nini ukukhambisa iimemo zesiKhumbuzo, begodu kubayini ijimeli lilide umnyaka lo?
1 NgeLesihlanu, ngoMatjhi 1, sizokuthoma ijima lethu laqobe mnyaka lokumema abanye bona babekhona esiKhumbuzweni. IsiKhumbuzo sizokuba ngoMatjhi 26, okutjho bona ijimeli lizokuba lide kuneminyakeni egadungileko. Lokhu kuzonikela abantu abanengi ithuba lokufumana iimemo, khulukhulu nengabe ibandla lendawo abahlala kiyo inesimu ekulu.
2. Ngimaphi amalungiselelo azokwenziwa wokufumana iimemo nokuhlanganisa isimu?
2 UkuHleleka: Abadala bazokunikela isinqophiso sokobana isimu izokuhlanganiswa njani, kuhlanganise nokobana iimemo zitjhiywe na emizini enganabantu. Nengabe iimemo zisele ngemva kwesimu yomuzi nomuzi, zingakhanjiswa ngokufakaza tjhatjhalazi. Umbonisi wekonzo uzokuqinisekisa bona iimemo zibekwa etafuleni leencwadi nofana labomagazini ukwenzela bona abarhuweleli bazithathe, kodwana iimemo angekhe zibekwe zoke ngesikhathi sinye. Kufuze sithathe inani esilitlhogako kwaphela ngeveke.
3. Khuyini okufuze siyikhumbula nesikhambisa iimemo?
3 Khuyini Esizokutjho? Kuhle bona sirhunyeze, njengombana lokho kuzosivumela ukufikelela abantu abanengi ngendlela esingakghona ngayo. Ikhasi 4 linetjumayelo esibonelo esingayisebenzisa ekonzwenethu. Liqiniso, akutlhogeki bona sirhabele ukukhamba nengabe umninimuzi unekareko nofana unemibuzo. Nesihlanganyela ekukhambiseni iimemo ngeempelaveke, kufuze godu sikhambise nabomagazini nekufanelekako. UMatjhi 2, lilanga eliKhethekileko LakamaGazini, ngalokho sizokudzimelela khulu ekukhambiseni abomagazini kuhlanganise neememo kunokobana sithomise iimfundo zeBhayibhili, njengombana sijayele ukwenza ngoMgqibelo wokuthoma wenyanga.
4. Kubayini kufuze sihlanganyele ngetjiseko ejimeneli?
4 Sithemba bona abanengi bazokuhlanganyela nathi esiKhumbuzweni. Ikulumo izokuhlathulula bona uJesu ngubani kwamambala. (1 Kor. 11:26) Izokuveza indlela ukufa kwakhe okungasisiza ngayo. (Rom. 6:23) Begodu izokuveza bonyana kubayini kuqakathekile bona simkhumbule. (Jwa. 17:3) Kwanga singahlanganyela ngetjiseko ejimeneli!