Lungiselela IsiKhumbuzo NgeHliziyo EThabileko
1. Isikhathi sesiKhumbuzo sikhathi esikhethekileko sokwenzani?
1 IsiKhumbuzo singeLesibili, ngoMatjhi 26, sinikela ithuba elihle lokuthabela ilungiselelo lakaZimu lesihlengo. (Isa. 61:10) Ngitjho nangaphambi kwesikhumbuzo esizako, ithabo lizosisiza bona silungiselele kuhle. Singakwenza njani lokho?
2. Khuyini esitjhukumisela bona silungiselele isiKhumbuzo?
2 UkuLungiselela IsiKhumbuzo: ISidlo seKosi saNtambama sisenzakalo esiqakathekileko kodwana asinazinto ezinengi. Nanyana kunjalo, sitlhoga ukulungiselelwa kusesengaphambili ukwenzela bona imininingwana eqakathekileko ingeqiselwa amehlo. (IzA. 21:5) Kufuze kukhethwe isikhathi nendawo efaneleko. Kufuze kufumaneke iwayini noburotho obufanelekako. Indawo yokuhlanganyela kufuze ihlwengiswe begodu ilungiswe kuhle. Isikhulumi esikhethiweko kufuze silungiselele kuhle, nalabo abazokukhambisa iwayini noburotho kuhlanganise nabalindi kufuze bahlophiseke. Akunakuzaza bona okunengi kwalokho sele kwenziwe. Ukuthokoza kwethu isihlengo kusitjhukumisela bona sisilungiselele kuhle isenzakalwesi esicwengileko.—1 Pit. 1:8, 9.
3. Singayilungiselela njani ihliziywethu malungana neSidlo seKosi saNtambama?
3 UkuLungiselela IHliziyo: Kuqakathekile nokulungiselela ihliziywethu bona sizwisise ngokuzeleko ukuqakatheka kwesiKhumbuzo. (Ezra 7:10) Ngebanga lalokho, kufuze sizibekele isikhathi bona sifunde iingcenye zesiKhumbuzo ezikhethekileko eBhayibhilini begodu sizindle ngeenkhathi zamaswaphela zokuphila kwakaJesu ephasini. Ukuzindla ngokuzidela kwakaJesu kuzositjhukumisela bona simlingise.—Gal. 2:20.
4. Ngiziphi iinzuzo zesihlengo ezikwenza uthabe khulu?
4 Ukufa kwakaKrestu kuphakamisa ubukhosi bakaJehova. Kusitjhaphulula esonweni nekufeni. (1 Jwa. 2:2) Kusinikela amathuba wokuba nobuhlobo obuhle noZimu nokufumana ukuphila okungapheliko. (Khol. 1:21, 22) Godu kusisiza bona sizimisele ukuphila ngokuvumelana nokuzinikela kwethu kuJehova begodu sihlale sibafundi bakaKrestu abaqinileko. (Mat. 16:24) Kwanga ungaba nethabo lamambala njengombana ulungiselela ukuba khona esiKhumbuzweni esizako!