Ibhoksi Lemibuzo
◼ Ngiziphi iinkambisolawulo zeBhayibhili esingazilandela ekusebenziseni ufunjathwako nesisemihlanganweni yobuKrestu nekonzweni?
“Yoke Into InesiKhathi Ebekelwe Sona.” (Mtj. 3:1): Ufunjathwako wenza abantu bona bakghone ukuthumelana imilayezo namtjhana bakhulume nabanye pheze nanyana kunini. Nokho, kuneenkhathi lapho amaKrestu angafuni ukuthikaziswa khona bofunjathwako babo. Ngokwesibonelo, imihlanganwethu sikhathi sokukhulekela uJehova, sokufumana iinqophiso ezingokomoya nokuthabela iingcoco ezikhuthazako. (Dut. 31:12; Rha. 22:22; Rom. 1:11, 12) Singabacima na abofunjathwako bethu nesifikako begodu siphendule imilayezo ngemva komhlangano? Nekunobujamo oburhabako obutlhoga bona silise ufunjathwako ahlale avuliwe, kufuze simenze bona angathikazisi abanye.
‘Yenza Koke NgeBanga LeVangeli.’ (1 Kor. 9:23): Ngezinye iikhathi, kuba namabanga azwakalako wokusebenzisa ufunjathwako ekonzweni. Ngokwesibonelo, umzalwana odosa phambili angawusebenzisa ukuthinta abanye abatjhumayela kwenye ingcenye yesimu. Ngezinye iinkhathi, abarhuweleli basebenzisa abofunjathwako babo bona bathinte umuntu onekareko namtjhana isifundo seBhayibhili ngaphambi kobana baye kuye, khulukhulu nengabe umuntu lowo uhlala kudanyana. Nengabe siphethe ufunjathwako, kufuze sitjheje bona ungasithikazisi nesicoca nomninimuzi. (2 Kor. 6:3) Kunokobana sithinte abangani bethu ngomtato nofana sibathumele imilayezo njengombana silindele abanye abarhuweleli, bekungeze kwabangcono na ukudzimelela ekonzweni nakilabo esisebenza nabo?
Cabangela Abanye. (1 Kor. 10:24; Fil. 2:4): Akukafaneli bona sizigedle ukufika ngesikhathi emihlanganweni yekonzo yesimini sinomnqondo wokobana sizokuthinta abanye ngomtato namtjhana ngokubathumelela umlayezo sizwe bonyana isiqhema sisebenza yiphi isimu. Nesifika lada, kanengi kutlhogeka bona isiqhema sabiwe kabutjha. Liqiniso, ngezinye iinkhathi kungavela ubujamo esingeze sakghona ukubulawula obungasenza bona sifike lada. Nokho, nengabe sikwenza umukghwa ukufika ngesikhathi, sibonisa ukucabangela amalungiselelo kaJehova, umzalwana odosa phambili nabanye abarhuweleli.