Qala Abaphorofidi Njengesibonelo—U-Amosi
1. Kubayini isibonelo saka-Amosi singaba mthombo wesikhuthazo kithi?
1 Wakhe wazizwa ungakufanelekeli ukutjhumayela ngebanga lokobana uvela emndenini ophasi nofana awukafundi? Nengabe kunjalo, ungafumana isibindi esibonelweni saka-Amosi. Bekangumelusi wezimvu begodu asebenza iinkhathi ezithileko zomnyaka, nanyana kunjalo uJehova wamqinisa bona atjhumayele umlayezo oqakathekileko. (Amo. 1:1; 7:14, 15) Ngokufanako, esikhathini sethu uJehova usebenzisa abathobileko. (1 Kor. 1:27-29) Ngiziphi ezinye iimfundo esingazifunda kumphorofidi u-Amosi malungana nekonzwethu?
2. Kubayini singakghona ukudzimelela nesiqalene nokuphikiswa ekonzweni?
2 Hlala Udzimelele Newuqalene Nokuphikiswa: U-Amaziya, umphristi omkhulekeli wekonyana wangetlhagwini yombuso weentjhaba ezilitjhumi zakwa-Israyeli, nekezwa u-Amosi aphorofida, kwaba ngasuthi uthi: ‘Khamba uye ekhenu! Akhe usilise! Sinekolo yethu!’ (Amo. 7:12, 13) U-Amaziya wahlanekela amezwi womphorofidi esibaweni sakhe asenza eKosini uJerobhowamu sokujamisa umsebenzi ka-Amosi. (Amo. 7:7-11) Kodwana u-Amosi khenge kumthuse lokho. Namhlanjesi, abanye abafundisi bafuna isekelo lezepolotiki emizamwenabo yokutjhutjhisa abantu bakaJehova. Nokho, uJehova uyasiqinisekisa bona akunasikhali esenzelwe thina esizokuphumelela unomphela.—Isa. 54:17.
3. Ngimuphi umlayezo oneengcenye eembili esiwutjhumayelako namhlanjesi?
3 Tjhumayela Isahlulelo SakaZimu Neembusiso Ezizako: Nanyana u-Amosi aphorofida ngesahlulelo esimalungana nombuso weentjhaba ezilitjhumi zakwa-Israyeli, waphetha incwadi yeBhayibheli enebizo lakhe nesithembiso sakaJehova sokubuyisela neembusiso ezinengi. (Amo. 9:13-15) Nathi sikhuluma ‘ngelanga lakaZimu lokugwetjwa’ elizako, kodwana le kuphela kwengcenye ‘yevangeli lombuso’ okufuze silitjhumayele. (2 Pit. 3:7; Mat. 24:14) Ukutjhabalalisa kwakaJehova abambi e-Amagedoni kuzokuvula indlela eya epharadesi ephasini.—Rhu. 37:34.
4. Ngisiphi isiqinisekiso esinaso sokobana singakghona ukwenza intando kaJehova?
4 Ukutjhumayela umlayezo womBuso ephasini elinabaphikisi abanengi kulinga ukuzimisela kwethu ukuphila ngokuvumelana nokuzinikela kwethu nokwenza intando kaJehova. (Jwa. 15:19) Nokho, siyaqiniseka bona uJehova uzokuragela phambili asinikela esikutlhogako bona senze intando yakhe, njengombana enza ku-Amosi.—2 Kor. 3:5.