Iingoma Ezitjha Zokukhulekela!
1 Emhlanganweni waqobe mnyaka wamva nje we-Watch Tower Bible and Tract Society of Pennsylvania, owaba khona ngo-Oktoba 4, 2014, kwamenyezelwa amahlelo wokubuyekeza iculo lethu lamva nje. Kwamambala lezo bekuzindaba ezimnandi! Boke ebeba khona bakhunjuzwa ngokuqakatheka kweengoma zomBuso kunye nendawo okufuze zibe nayo ekukhulekeleni kwethu.—Rhu. 96:2.
2 Mhlamunye uyazibuza bona, ‘Kubayini kufuze kubuyekezwe iculo?’ Kuneenzathu ezimbalwa. Sokuthoma, ukuzwisisa kwethu imitlolo kuragela phambili kuthuthukiswa, yeke lokho kungathinta amezwi aseengomeni zethu. (IzA. 4:18) Elinye ibanga lokubuyekezokhu: Amezwi nemitjho asetjenziswe eculweni lethu athathwe eBhayibhelini le-New World Translation. Amezwi la atjhentjhiwe ukwenzela bona avumelane namagama weBhayibheli elibuyekeziweko. Njengombana kuzokuba nomsebenzi omnengi okufuze wenziwe bona kutjhentjhwe amezwi weengomezi, kuquntwe bonyana kungezelelwe iingoma ezitjha ezimbalwa eculweneli.
3 Kghani sizokulinda bekube kulapho kugadangiswa iculo elitjha ngaphambi kobana kusetjenziswe iingoma ezitjha? Awa. Kulithabo ukunazisa bona eenyangeni ezimbalwa ezizako, kuzokufakwa iingoma ezinengana kuZinzolwazi yethu i-jw.org. Nakutjhatjhululwa ingoma etjha, lokho kuzokwenziwa ekuphetheni komHlangano weKonzo nesaziso esithi “ingoma etjha.”
4 Indlela Yokufunda Iingoma Ezitjha: Kungaba sitjhijilo ukufunda ingoma etjha. Nanyana kunjalo, njengomrhubi, sifuna ukuvuma emihlanganweni yebandla ‘singathuli.’ (Rhu. 30:13 [30:12, NW]) Bona ufunde ingoma etjha, landela naka amagadango abulula.
Ilalele ngokuyibuyelela ingoma yepiyano erekhodiweko, ezokufakwa kuZinzolwazi yethu. Lokha nawuyilalela kanengi ingoma le, kuzokuba lula ukuyikhumbula.
Fundisisa amezwayo, ulinge ukuwakhumbula.
Vuma ingoma le kuhlanganise namezwayo. Yenza njalo bekube kulapho uyazi kuhle.
Phrakthizani iingoma ezitjhezi iinkhathi ezinengana ehlelweni lenu lokuKhulekela koMndeni bekube kulapho senizazi kuhle.
5 Nengabe eenyangeni ezizako kufakwe ingoma etjha ekuphetheni komHlangano weKonzo, ibandla lizokulalela ipiyano erekhodiweko. Abalaleli bazokuvuma ingoma bakhambisane nepiyano erekhodiweko, njengombana senza nakezinye iingoma.
6 Nasicabangisisa ngakho, ukuvuma emihlanganweni kusinikela ithabo lokuhlanganyela ngobunye ekudumiseni uJehova ngamaphimbwethu. Ngalokho-ke, kufuze silise umukghwa wokutjhiya iinhlalo zethu ngokungatlhogekiko lokha nakuthulwa ingoma emiHlanganwenethu yobuKrestu.
7 Kunenye indlela esingatjengisa ngayo ukuthokozela kwethu iingoma zethu ezicwengileko. Emihlanganweni emikhulu nemincani, kudlalwa umbhino ngaphambi kobana kuthome ihlelo lomhlangano. Kabili ngomnyaka, abazalwana nabodade abazinikeleko abavela ephasini loke bakhamba ngeendleko zabo ukuya e-Patterson, eNew York, bona bagadangise umbhino omnandi osetjenziswa ekukhulekeleni kwethu. Nakhibe usihlalo usibawa bona sihlale phasi silalele lokho okulungiselelwe siqhema sombhino, kufuze senze njalo. Ukwenza kwethu njalo kuzosisiza silungiselele iinhliziyo zethu bona zamukele ilwazi esizolizwa.—Ezra 7:10.
8 Namhlanjesi sizokuphetha umhlangano wethu, ngokuvuma enye yeengoma zethu ezitjha enesihloko esithi, “UMbuso Usumisiwe—Mawuze!” Ingoma le beyisehlelweni lomhlangano waqobe mnyaka wamva nje, beyilungiselelwe ngokukhethekileko ukutjengisa ukuthi kuhlangana iminyaka eli-100 yokubelethwa komBuso.
9 Iingoma ezitjhezi kwamambala ‘zizinto ezihle’ ezivela kuJehova. (Mat. 12:35a, NW) Akhe sizimisele ukufunda iingoma ezitjhezi, sizicule ngokusuka ehliziywenethu, sinikele uZimethu idumo nehlonipho emfaneleko!—Rhu. 147:1.