Amathuluswethu Wokufundisa
1. Abatjhumayeli abamaKrestu bafana njani nesikghwari?
1 Umuntu osikghwari usebenzisa amathulusi ahlukahlukeneko. Kanti amanye amathulusi ayatlhogeka ngezinye iinkhathi ukusetjenziselwa imisebenzi ekhethekileko, amanye amathulusi asisekelo asetjenziswa kanengi. Isikghwari esinelemuko sihlale sinawo amathulusi asisekelo ebhoksini laso lamathulusi, lawo ngiwo esiwasebenzisa khulu ngekghono. IBhayibheli likhuthaza umKrestu ngamunye ukuthi akhuthalele ikonzo begodu ‘abesisebenzi esingananhloni.’ (2 Thim. 2:15) Ngiliphi ithulusi eliqakatheke khulu emathulusinethu? liliZwi lakaZimu—ithulusi eliyihloko esilisebenzisa ‘ukwenza abafundi.’ (Mat. 28:19, 20) Yeke, kufuze silinge ngamandla bona sibe nekghono ‘ekufundiseni ilizwi leqiniso ngokutjhejisisa.’ Nanyana kunjalo, kunamanye amathulusi esiwasebenzisa kanengi emathulusinethu wokufundisa okufuze woke amaKrestu afunde ukuwasebenzisa ngekghono ukufundisa abantu iqiniso.—IzA. 22:29.
2. Ngimaphi amathuluswethu wokufundisa asisekelo?
2 Amathuluswethu Asisekelo Wokufundisa: Ngaphandle kweBhayibheli, ngimaphi amanye amathulusi ekufuze siwasebenzise? Ithulusi eliyihloko esinalo lokufundisa amaqiniso ngeBhayibheli yincwadi ethi, Khuyini Kwamambala Okufundiswa YiBhayibhili? Nasele siqede ukufunda incwadi le nomfundi, sisebenzisa ethi, “Hlala Ethandweni LakaZimu” ukumfundisa bona asebenzise iinkambisolawulo zeBhayibheli ekuphileni kwakhe. Yeke, kufuze sibe nekghono ekusebenziseni iincwadi ezimbilezi. Kufuze siphathe neencwajana ezithileko emathulusinethu wokufundisa. Incwadi eyihloko ekuthomeni iimfundo zeBhayibheli, yincwadi ethi, Iindaba Ezimnandi Ezivela KuZimu! Nakhibe isimethu inabantu abalinganiselweko ekufundeni namkha abakhuluma ilimi esineencwadi ezincani zalo namkha esinganazo, nakunjalo singasebenzisa ethi, Lalela uZimu Uphile Ngokungapheliko. Incwajana esisekelo yokunqophisa abafundi ehlanganweni, ngethi, Bobani Abenza Intando KaJehova Namhlanjesi? Amavidiyo alisizo ekwenzeni abafundi, ngethi, Kubayini Kufuze Ufunde IBhayibheli?, Kwenzekani EWolweni LomBuso?, nethi, Does God Have a Name?, la mathulusi ekufuze sifunde ukuwasebenzisa kuhle.
3. Iinhloko ezizokulandela zeKonzwethu YomBuso zizosisiza ukuthi senzeni?
3 Iinhloko ezilandelako zeKonzwethu YomBuso zizosisiza sibe namakghona wokusebenzisa iincwadi ezisisekelo emathulusinethu wokufundisa. Njengombana sizimisela ukusebenzisa amathulusi la ngekghono, sizabe silalela iseluleko esiphefumulelweko esithi: “Uzeluse wena kanye nefundiso yakho, uphikelele ezintwenezo ngombana ngokwenza lokho uzazisindisa wena nabakuzwako.”—1 Thim. 4:16.