INDLELA YOKUHLULA IHLOYO

3 | Khupha Ihloyo Emkhumbulwenakho

IBhayibheli Ithi:

“Nilise ukubunjwa liphaseli kodwana nitjhugululwe ngokwenza butjha iingqondo zenu bona nizibonele ngokwenu okuhle nokwamukelekako nokuyintando kaZimu epheleleko.”—ROMA 12:2.

Lokho Kutjho Ukuthini:

Indlela esicabanga ngayo iqakathekile kuZimu. (Joromiya 17:10) Kufuze senze okungaphezu kokulisa ukukhuluma amezwi nezenzo ezinehloyo. Ukuba nehloyo kuthoma engqondweni nehliziyweni. Nje-ke kufuze sisuse nanyana ngiyiphi ihloyo esinayo eengqondweni zethu namkha endleleni esizizwa ngayo. Lokhu kuzosisiza ‘sitjhuguluke’ kwamambala sibalekele ukuba nehloyo.

Lokho Ongakwenza:

Cabangisisa ngendlela ocabanga ngayo nozizwa ngayo ngabanye khulukhulu labo abavela kwezinye iintjhaba. Zibuze: ‘Ngibaqala njani? Kghani indlela engibaqala ngayo iya ngalokho engikwaziko ngabo? Namkha ngiyabandlulula?’ Lisa ukubukela amamuvi namkha zokuzithabisa ezinehloyo nenturhu.

IliZwi lakaZimu lingasisiza sihlule ihloyo eseengqondweni neenhliziyweni zethu

Akusilula ngaso soke isikhathi ukuhlolisisa imicabangwethu nendlela esizizwa ngayo ngendlela efaneleko. Kodwana iliZwi lakaZimu lingasisiza ‘sihlukanise imicabango neenhloso zehliziyo.’ (Hebheru 4:12) Yeke ragela phambili ufunda iBhayibheli. Madanisa lokho elikufundisako nendlela ocabanga ngayo, wenze koke okusemandlenakho bona indlela ocabanga ngayo ikhambisana nalokho okufundiswa liBhayibheli. IliZwi lakaZimu lingasisiza sihlule ihloyo ‘edzinyeleliswe ngokuqinileko’ emkhumbulweni neenhliziyweni zethu.—2 Korinte 10:4, 5.

Indaba Eyenzekileko—U-STEPHEN

Watjhugulula Indlela Acabanga Ngayo

U-Stephen nomndenakhe bakhe batlhaga ngebanga lokuhloywa makhuwa. Ngebanga lalokho, isiqhema sepolotiki esilwela amalungelo wabantu saba nomthelela kuye. Ngokukhamba kwesikhathi, wabandakanyeka ebulelesini obenziwa ngebanga lehloyo. U-Stephen uthi: “Ngezinye iinkhathi mina nabangani bami besibukela amafilimu atjengisa indlela abantu abanzima ebebahlunguphazwa ngayo e-United States. Lokho kwasibilisa khulu besasahlela amakhuwa ebewabukele imuvi lapho. Ngemva kwalokho, saya endaweni ekuhlala kiyo amakhuwa sayokufuna amakhuwa esingawabetha.”

Indlela yokucabanga ka-Stephen yatjhuguluka khulu nakathoma ukufunda iBhayibheli naboFakazi bakaJehova. Uyakhumbula: “Ngebanga lokuthi ngabandlululwa khulu, kwangirara ukubona indlela aboFakazi bakaJehova abaphathana ngayo. Ngokwesibonelo, lokha uFakazi olikhuwa nakaya ngaphetjheya, watjhiya abantwana bakhe bona batlhogonyelwe mndeni wabantu abanzima. Godu umndeni wamakhuwa wathatha isokana lomuntu onzima ebelitlhoga indawo yokuhlala.” U-Stephen wabona ukuthi aboFakazi bamndeni othandanako, lokhu kwamsiza wazwisisa ukuthi bazalisa isithembiso sakaJesu sokuthi abalandeli bakhe bazokuthandana ngokusuka ehliziyweni.—Jwanisi 13:35.

Khuyini eyasiza u-Stephen bona alise ukuhloya abanye abantu? Wasizwa mtlolo wamaRoma 12:2. Uraga nokuthi: “Ngathoma ukubona ukuthi kufuze ngitjhugulule indlela engicabanga ngayo. Bekufuze ngilise ukuba nenturhu, ngifunde nokuthi ukuba nokuthula yindlela engcono yokuphila.” Sekuminyaka ema-40, u-Stephen alisa ukuhloya abantu.