2 | ‘Induduzo Evela EmiTlolweni’

IBHAYIBHELI ITHI: “Zoke izinto ezatlolwa ekadeni, zatlolelwa bona zisifundise ukuthi ngokukghodlhelela kwethu nangenduduzo evela emiTlolweni sibe nethemba.”—ROMA 15:4.

Lokho Kutjho Ukuthini?

IBhayibheli linamezwi aduduzako angasinikela amandla begodu asisize sikghodlhelele nasinemicabango engakhiko. Umlayezo weBhayibheli usinikela nethemba lokuthi boke ubuhlungu buzokuphela.

Kungakusiza Njani Lokhu?

Ngezinye iinkhathi soke siyagandeleleka; kodwana labo abanokugandeleleka komkhumbulo nokutshwenyeka qobe langa batshwenywa kuzizwa kabuhlungu. IBhayibheli lingabasiza njani?

IBhayibheli linamezwi amanengi aduduzako angasisiza sisuse imicabango engakhiko. (Filipi 4:8) Lingazalisa imikhumbulwethu ngezinto eziduduzako nezivuselelako ezingasisiza silawule indlela esizizwa ngayo.—IRhubo 94:18, 19.
IBhayibheli lingasisiza sihlule imicabango yokuzizwa singasililitho.—Lukasi 12:6, 7.
Iindaba ezinengi eziseBhayibhelini zisiqinisekisa ngokuthi asisisodwa begodu uZimu, uMdalethu uyizwisisa kuhle indlela esizizwa ngayo.—IRhubo 34:18; 1 Jwanisi 3:19, 20.
IBhayibheli lithembisa ukuthi uZimu uzokuqeda izinto ezisizwisa ubuhlungu. (Isaya 65:17; IsAmbulo 21:4) Lokha nasiqalene nemizwa egandelelako, isithembiswesi singasinikela amandla wokuragela phambili.

Indlela IBhayibheli Elisiza Ngayo U-Jessica

Indlela Ukugandeleleka Komkhumbulo Okungithinta Ngayo

“Nangineminyaka ema-25, ngaqalana nobujamo obubuhlungu khulu begodu abodorhodere bafumana ukuthi nginokugandeleleka komkhumbulo. Bengitshwenywa mikhumbulo engalawulekiko yezinto ezibuhlungu ezenzeka kade. Abodorhodere bangisiza ngazwisisa ukuthi ukugandeleleka komkhumbulo enginakho bekubangelwa micabango engakhiko nezinto ezibuhlungu ezenzeka ekuphileni kwami. Ngaphezu kweenhlahla ezifaneleko abanginikela zona, bengitlhoga abodorhodere bangisize ngibone bengilungise imicabango engakalungi.”

Indlela IBhayibheli Elingisiza Ngayo

“Lokha nangigandeleleke khulu, bengisaba khulu, ngitshwenyeke ngokudluleleko begodu ngibhalelwe kulala. Kanengi ebusuku bengigandelelwa micabango ebengingakghoni ukuyilawula. Njengombana iRhubo 94:19 lihlathulula, uZimu angasiduduza begodu asivuselele nasigandelelwa kutshwenyeka. Nje-ke bengibeka iBhayibhelami nencwadi engitlola kiyo imitlolo ekhuthazako hlanu kombhedami. Nangingakghoni ukulala, bengifunda amavesi weBhayibheli ngivumele imicabango kaZimu bona ingiduduze.

“IBhayibheli lisikhuthaza bona silahle imicabango engakhambisani nalokho esikwaziko ngoZimu. Nangigandelelekileko, bengiqiniseka ukuthi angisililitho, akunamuntu ongithandako begodu akunanto engikghona ukuyenza. Kodwana ngafunda ukuthi imicabango enjalo iphikisana neBhayibheli, eliveza uZimu njengoBaba onethando nesirhawu begodu onendaba nomuntu ngamunye. Kancanikancani, ngathoma ukulawula imicabangwami kunokuyivumela bona ingilawule. Ngafunda ukuziqala ngendlela uZimu angiqala ngayo. Leli bekuligadango eliqakathekileko lokulisa ukuziqala ngendlela engakafaneli.

“Ngiqale phambili esikhathini lapho yoke imicabango engakhiko nelimazako seyitjhabalele unomphela. Ukwazi ukuthi imiraro yomkhumbulo izokuphela ingasikade kunginikela amandla wokukghodlhelela begodu ngiqale phambili esikhathini esizako, lapho ngingekhe ngisagandeleleka khona.”