3 | Zuza Eembonelweni ZeBhayibheli

IBHAYIBHELI LIKHULUMA . . . Ngamadoda nabafazi abathembekileko ‘abanamazizo afana nawethu.’—JAKOPO 5:17.

Lokho Kutjho Ukuthini?

EBhayibhelini sifunda ngeendaba zamambala zamadoda nabafazi ebebanemizwa ehlukahlukeneko. Njengombana sifunda okwenzeke kibo, sizokufumana omunye onobujamo obufana nebethu.

Kungakusiza Njani Lokhu?

Soke sifuna ukwazi ukuthi abanye bayayizwisisa indlela esizizwa ngayo. Lokhu kuliqiniso khulukhulu nasinokugandeleleka komkhumbulo. Nasifunda ngeendaba zamambala zabantu ekukhulunywa ngabo eBhayibhelini, singafumana ukuthi ubujamo ebebaqalene nabo bufana nobujamo bethu begodu bebacabanga bebazizwe ngendlela esizizwa ngayo. Umphumela walokho uba kukuthi siyalemuka bona akusingithi kwaphela esiqalana namatshwenyeko begodu lokho kusenza singazizwa sisodwa.

IBhayibheli likhuluma ngezinto ezatjhiwo ngilabo ebebazizwa bangasililitho begodu batshwenyekile. Khewazizwa ngasuthi ufuna ukufa wathi, ‘sekwanele’? UMosi, u-Eliya noDavida bakhe bazizwa njalo.—Numeri 11:14; 1 AmaKhosi 19:4; IRhubo 55:4.
IBhayibheli lisitjela ngomma igama lakhe nguHana, owezwa “ubuhlungu khulu” ngebanga lokuthi bakangakghoni ukuba nabantwana begodu umrharidzwenakhe bekasolo amnyefula.—1 Samyela 1:6, 10.
IBhayibheli lisitjela ngendoda igama layo nguJobho, eyaqalana nobujamo ekungenzeka siqalene nabo. Nanyana bekanokukholwa okuqinileko kuJehova, waqalana nokugandeleleka okukhulu bewathi: “Ngiyakuhloya ukuphila kwami; angisafuni ukuphila.”—Jobho 7:16.

Nasifunda ngeembonelo zabantu ekukhulunywa ngabo eBhayibhelini abaqalana ngokuphumelelako nemizwa engakhiko, nathi singafumana amandla wokuqalana namatshwenyekwethu.

Indlela IBhayibheli Elisiza Ngayo U-Kevin

Indlela Ukuba Ne-Bipolar Okungithinta Ngayo

“Ngafumana ukuthi ngine-bipolar nasele ngiyokuba neminyaka ema-50. Ngezinye iinkhathi ngizizwa ngasuthi ngingaqalana nananyana yini ekuphileni. Kodwana ngezinye iinkhathi ngizwa ngasuthi ukuphila akusizi ngalitho.”

Indlela IBhayibheli Elingisiza Ngayo

“Omunye umuntu ekukhulunywa ngaye eBhayibhelini owazizwa njengami mpostoli uPitrosi. Wenza imitjhapho eyamenza wazizwa angasililitho. Kunokobana adzimelele emitjhaphweni leyo, uPitrosi wazihlanganisa nabangani ebebanendaba naye. Ngelanga engingazizwa kuhle ngalo ngebanga le-bipolar, imitjhaphwami iyangigandelela ingenze ngizizwe ngingasililitho. NjengoPitrosi, ngifunde ukuthi kufuze ngilinge ukuhlala ngitjhidelene nabangani bami abafuna ukungisiza ngiragele phambili nokuphila kwami.

“Esinye isibonelo esingiduduzako somuntu ekukhulunywa ngaye eBhayibhelini ngeseKosi uDavida. Kanengi bekazizwa agandelelekile ngebanga lobujamo bakhe begodu azisola ngemitjhapho ayenzileko. Ngizizwa njengaye ngombana ngezinye iinkhathi ngenza namkha ngitjho izinto engizisola ngazo. Amezwi kaDavida afumaneka kuRhubo 51 angiduduza khulu. Evesini 3, uthi: ‘Ngiyazi kuhle imitjhaphwami, nesono sami siphambi kwami qobe.’ Amezwi la ahlathulula indlela engizizwa ngayo nangigandeleleke khulu, njengombana kungaba budisi ukuziqala ngendlela efaneleko. Amezwi kaDavida akuvesi 10 athi: ‘Maye! Zimu, nginikela ihliziyo emsulwa, ungenze ngihlale ngifisa ukwenza okuhle.’ Ngisebenzisa indlela efanako bona ngibawe uJehova angisize ngizizwe ngcono. Nakulivesi 17 liyangiduduza. Lithi: ‘Maye! Zimu, angeze uyilahle ihliziyo ephukileko nezisolako.’ Iveseli lingiqinisekisa ngokuthi uZimu uyangithanda.

“Nangidzimelela eembonelweni eziseBhayibhelini nakilokho uJehova anginikele khona, ngiqinisa ithemba lami ngengomuso. Iinthembiso zeBhayibheli ziba ngezamambala kimi begodu lokho kungisiza ukuthi ngiragele phambili.”