Zekolo Nepi E-Ukraine—Lithini IBhayibheli?

Akhesitjheje okulandelako malungana nabadosiphambili bezekolo kunye nepi e-Ukraine:

• “Umdosiphambili WeSondo Le-Orthodox e-Russia, uPatriarch Kirill, khenge atjho litho elitjengisa ukusola iRussia ngokusahlela kwayo. . . . Isondo lakhe liragele phambili nokurhatjha iindaba ezimamala nge-Ukraine begodu uPutin usebenzise iindabezo bona avikele ukusahlela.”—EUobserver, Matjhi 7, 2022.

• “UPatriarch Kirill . . . uthumele umlayezo oqinileko osekela ukusahlela kweRussia i-Ukraine—waveza ukuthi ipi le iyingcenye yokulwisana nesono.”—AP News, Matjhi 8, 2022.

• “Kwathi ngoMvulo, umdosiphambili weSondo lobu-Orthodox e-Ukraine uMetropolitan Epiphanius I we-Kyiv, wabusisa abantu bakhe bona ‘bayokulwa neRussia’ . . . Godu waveza ukuthi ukubalala amasotja weRussia akusisisono.”—Jerusalem Post, Matjhi 16, 2022.

• “Thina [mKhandlu wamaSondo neenHlangano zeKolo, (UCCRO)] siyawasekela amasotja we-Ukraine nabo boke abayivikelako. Siyababusisa emzamwenabo yokuvikela i-Ukraine ekusahlelweni begodu siyabathandazela.—Isitatimende se-UCCROa, Febherbari 24, 2022.

Ucabangani? Ingakghani iinkolo ezithi zisekela uKrestu kufuze zikhuthaze amalungazo bona aye epini? Lithini iBhayibheli?

Umlando Wezekolo Kezepi

Umlando utjengisa ukuthi kanengi zekolo bezithuthukisa bezikhulumele kuhle ipi, khisibe ngapha zenza ngasuthi zifuna ukuthula. Sele kudlule amatjhumi weminyaka aboFakazi bakaJehova baveza ubuzenzisi bezekolo. Akhesiqale nanzi iimbonelo ezavela eencwadini zethu:

• Isihloko esithi “IziMpi Zenkolo—‘kuzikhohlisa Okusabekayo’” siveza indlela iSondo lamaRoma Katolika elinomlando ngayo ngokurhayilwa kwabantu okwenziwa egameni lakaZimu nelakaKrestu.

• Isihloko esithi, “ISondo LobuKatolika Le-Afrika” siveza isibonelo sendlela zekolo ezibhalelwe ngayo ukuvikela izipi ezibe khona ngebanga lamasiko nokubulalana ngokwehlanga.

• Iinhloko ezithi “Ingabe Kufanele Kusolwe Inkolo?, Indima Yekolo Ezimpini Zabantu” nesithi, “Inkolo Ithatha Uhlangothi” zihlathulula indlela abafundisi bamaKatolika, bama-Orthodox nabamaPhrothestani abasekele ngazo womabili amahlangothi eempini ezinengi.

Inga-kghani amasondo wobuKrestu kufuze asekele ipi?

Lokho uJesu akufundisako: “Kufuze uthande umakhelwanakho njengombana uzithanda wena.” (Matewu 22:39) “Ragelani phambili nithanda izitha zenu.”—Matewu 5:44-47.

Okwatjhiwo nguJesu: “UmBuswami awusiyingcenye yephaseli. Ngathana umBuswami bewuyingcenye yephaseli, abalandeli bami bebazokulwa bona nginganikelwa.” (Jwanisi 18:36) “Boke abasebenzisa isabula bazokubhubha ngesabula.”—Matewu 26:47-52.

Tjheja okulandelako: Nange amaKrestu angakhenge alwe bona avikele uJesu, ngiliphi ibanga elenza bona alwe namhlanjesi? Funda isihloko esithi, “Ingabe Impi Iyambisana NobuKristu?” ukubona ukuthi amaKrestu wekadeni asilandela njani isibonelo sakaJesu kunye neemfundiso zakhe ngokuthembeka.

Kuzokwenzakalani ngeenkolo ezithuthukisa ipi?

IBhayibheli lifundisa ukuthi uZimu uyawalahla amasondo athi ajamele uJesu, khisibe ngapha awazilandeli iimfundiso zakhe.—Matewu 7:21-23; Titosi 1:16.

• Incwadi yesAmbulo itjengisa ukuthi uZimu uthi iinkolo ezinjalo, zimlandu ngebanga lokuhlongakala kwabo “boke ababuleweko ephasini.” (IsAmbulo 18:21, 24) Bona ufumane ukuthi kubayini, funda isihloko esithi, “Liyini IBhabhiloni Elikhulu?”

• UJesu waveza ukuthi zoke iinkolo uZimu angazamukeliko zizokurhayilwa ngebanga lemisebenzazo emimbi, njengombana nomuthi obolile oveza iinthelo ezibolileko, “uyaquntwa uphoswe emlilweni.” (Matewu 7:15-20) Funda isihloko esithi, “Ukuphela Kwenkolo Yamanga Kuseduze!”

Photo credits, left to right: Photo by Sefa Karacan/Anadolu Agency/Getty Images; Maxym Marusenko/NurPhoto via Getty Images