AmaKrestu Nepi—Lithini IBhayibheli?

Njengombana sibonile epini ye-Ukraine, abarholi bezekolo abanengi bakhuthaza abantu bona bathathe ihlangothi kwezepi. Tjheja indlela abarholi bezekolo abasekela ngayo amahlangothi womabili:

• “Sihlonipha besithokoza khulu amasotja avikele inarhawo i-Ukraine kilabo ababasahlelako . . . Iinhliziyo zethu, imithandazwethu esuka ehliziyweni nesekelo lethu, kuzokuhlala kunani.”—NgokweMetropolitan Epiphanius I yeKyiv, ibikwa yi-The Jerusalem Post, Matjhi 16, 2022.

• “Ophethe iSondo leRussian lobu-Orthodox wahlela umhlangano wekolo okhethekileko namasotja weRussia ngoSondo, wawakhuthaza bona avikele inarhawo ‘njengombana eRussia kungibo kwaphela abangakghona,’ iMoscow nayisaraga nejima layo lokusahlela i-Ukraine.”—Reuters, Apreli 3, 2022.

Kghani amaKrestu kufuze aye epini? Lithini iBhayibheli?

Lokho iBhayibheli elikutjhoko

IBhayibheli lithi labo abalandela uJesu Krestu ngeqiniso abazibandakanyi kwezepi.

• “Buyisela isabulakho endawenayo ngombana boke abasebenzisa isabula bazokubhubha ngesabula.”—Matewu 26:52.

  Kghani umuntu osekela ipi namkha olwa epini uyawalalela amezwi kaJesu?

• “Ngininikela umyalo omutjha, wokuthi nithandane; njengombana nami nginithandile, nani thandanani. Boke bazokwazi ngalokhu ukuthi nibafundi bami nanithandanako.”—Jwanisi 13:34, 35.

  Kghani umuntu othatha ihlangothi kwezepi, unalo ithando uJesu athi abafundi namkha abalandeli bakhe bazokubonakala ngalo?

Ukufumana imininingwana engeziweko funda isihloko esithi, “Ingabe Impi Iyahambisana NobuKristu?”

AmaKrestu nepi namhlanjesi

Kghani kuyakghoneka bona amaKrestu angayi epini namhlanjesi? Iye. IBhayibheli labikezela ukuthi esikhathini sethu, esibizwa ngokuthi ‘mimihla yokuphela,’ kuzokuba nabantu kizo zoke iintjhaba abangekhe ‘bafunde ipi,’ ngokuvumelana neemfundiso zakaJesu.—Isaya 2:2, 4.

• Ukufumana okwengeziweko funda umlandelande weenhloko zesiThala ezithi, “UZimu Uyiqala Njani Ipi?”

Ingasikade uJehova,a “uZimu wokuthula,” uzokusebenzisa urhulumendakhe wezulwini ukusindisa abantu “ekugandelelweni nenturhwini.”—Filipi 4:9; IRhubo 72:14.

• Ukuthi njani, bukela ividiyo ethi, Uyini UmBuso KaZimu?