Ubujamo Bezulu Obutjhisako Obuyingozi Hlangana Nehlobo Laka-2023—Lithini IBhayibheli?

Abantu ephasini loke bakghodlhelelela ubujamo bezulu obutjhisa khulu kunanini ngaphambili nezinye iinhlekelele ezibangwa mazinga aphezulu wokutjhisa. Tjheja imibiko elandelako:

• “Lo bekunguJuni otjhisa khulu solo abantu bathoma ukutlola amazinga wokutjhisa ephasini loke, eminyakeni eli-174 eyadlulako.”—Ngokwe-National Oceanic and Atmospheric Administration, U.S. Department of Commerce, kaJulayi 13, 2023.

• “I-Italy, i-Spain, i-France, i-Germany ne-Poland ziqalene nobujamo bezulu obutjhisako, kulindeleke ukuthi kutjhise kufikela ku-48°C eenhlengeleni ze-Sicily ne-Sardinia – la mazinga wokutjhisa aphezulu khulu akhe aba khona eYurobhu.”—Ngokwe-European Space Agency, kaJulayi 13, 2023.

• “Njengombana iphasi lifuthumala, silindele izulu elinengi nelinamandla elizokubanga iinkhukhula.”—Ngokwaka-Stefan Uhlenbrook, umnqophisi we-hydrology, water and cryosphere at the World Meteorological Organization, kaJulayi 17, 2023.

Inga-kghani ukwanda kwemibiko yobujamo bezulu obutjhisa khulu iyakutshwenya? Cabanga ngalokho okutjhiwo yiBhayibheli malungana nesihloko esiqakathekilekwesi.

Kghani ubujamo bezulu obuyingozi buzalisa isiphorofido seBhayibheli?

Iye. Ukutjhisa okukhulu kwephasi loke neminye imihlobo yobujamo bezulu obuyingozi, kukhambisana kuhle nezenzakalo iBhayibheli elathi zizokwenzeka ngesikhathi sethu. Ngokwesibonelo, uJesu waphorofida ukuthi sizokubona ‘imibono esabekako’ namkha “izinto ezingakajayeleki nezithusako.” (Lukasi 21:11; Good News Translation) Ukukhuphuka kwamazinga wokutjhisa ephasini loke kwenze abanengi basaba ukuthi abantu bazokwenza iphasi lingasahlaleki.

Inga-kghani iphasi lizokuba yindawo engahlalekiko?

Awa. UZimu wadala iphasi bona sihlale kilo ngokungapheliko; angekhe avumele abantu balitjhabalalise. (IRhubo 115:16; UMtjhumayeli 1:4) Kuhlekuhle, uthembise ‘ukutjhabalalisa labo abatjhabalalisa iphasi.’—IsAmbulo 11:18.

IBhayibheli litjengisa ukuthi uZimu angakghona begodu uzolivikela iphasi eenhlekeleleni zebhoduluko.

• “[UZimu] uthulisa isiwuruwuru; namagagasi welwandle ayathula.” (IRhubo 107:29) UZimu unamandla wokulawula ibhoduluko. Angakghona ukulungisa imiraro yebhoduluko eyenza abantu batlhage ngebanga lobujamo bezulu obuyingozi.

• “Utlhogomela iphasi, ulenze lithele inala begodu linothe.” (IRhubo 65:9) Ngesibusiso sakaZimu, iphasi lizokuba yipharadesi.

Bona ufunde okungeziweko ngesithembiso seBhayibheli sebhoduluko elilungisiweko, qala isihloko esithi, “Who Will Save the Earth?”