Siyini Isifundo SeBhayibheli Esinikelwa BoFakazi BakaJehova?
AboFakazi bakaJehova banehlelo lesifundo seBhayibheli elingakusiza wazi okufundiswa liBhayibheli. Ihlelo lethu lingakusiza:
Uthabele ukuphila
Ube mngani kaZimu
Ubone lokho iBhayibheli elisifundisa khona ngengomuso
Ekhasineli uzokufunda ngokuthi
Nangamukela isifundo seBhayibheli, kghani lokho kutjho ukuthi kufuze ngibe nguFakazi kaJehova?
Ngingabamema na abanye bona bahlanganyele nami esifundwenesi?
Ninaso na isifundo seBhayibheli ngaphandle kokuthi ngifundelwe mumuntu?
Kwenziwani esifundweni seBhayibheli?
Kuzokuba nomuntu ozokusiza ujayelane neBhayibheli, ngokuya ngeenhloko. Uzokufunda ngomlayezo oseBhayibhelini kancanikancani nokuthi lingakusiza njani, nisebenzisa incwadi ethi, Thabela Ukuphila Ngokungapheliko! Ukufunda okungeziweko bukela ividiyo elandelako.
Kghani kufuze ngisibhadele isifundo seBhayibheli?
Awa. AboFakazi bakaJehova balandela isinqophiso uJesu asinikela abafundi bakhe esithi: “Nifumene ngesihle, yiphani ngesihle.” (Matewu 10:8) Ukungezelela kilokho, akunamali okufuze uyikhuphe bona ufumane iBhayibheli nencwadi yokufunda ethi, Thabela Ukuphila Ngokungapheliko!
Sithatha isikhathi esingangani isifundwesi seBhayibheli?
Isifundwesi nasele siphelele sineemfundo ezima-60. Ukuthi ufunda isikhathi esingangani kuya ngawe kodwana abantu abanengi bathabela ukuqeda isifundo sinye namkha ezingeziweko qobe veke.
Ngithoma njani?
1. Zalisa iforomo ku-inthanethi. Sizokusebenzisa imininingwanakho oyifake lapho kwaphela bona uthintwe ngomunye waboFakazi bakaJehova.
2. Umuntu ozokufundela uzokuthinta. Uzokuhlathululela bona khuyini ongayilindela esifundweni sakho seBhayibheli begodu uzokuphendula yoke imibuzo okungenzeka ube nayo.
3. Wena nofunda naye nizokwenza amahlelo. Ningafunda bunqopha, ngomtato, ngethungelelwano levidiyo, ngeposi namkha nge-email. Isifundo singathatha pheze i-iri kodwana singaba ngaphezu kwe-iri namkha ngaphasi, kuye ngobujamo bakho.
Kghani ngingathoma ngokulinga qangi?
Iye. Bona wenze njalo, zalisa iforomo lesifundo nge-inthanethi. Umuntu ozokufunda naye nakakuthintako, mazise ukuthi ufisa ukulinga isifundo seBhayibheli qangi ukubona ukuthi uyasithabela na. Umuntu ozokufunda naye uzokuthoma ngokusebenzisa incwajana ethi, Thabela Ukuphila Ngokungapheliko! ethoma ngokwethula iimfundo ezintathu, ezizokusiza ubone ukuthi uyasithabela na isifundwesi.
Nangamukela isifundo seBhayibheli, kghani lokho kutjho ukuthi kufuze ngibe nguFakazi kaJehova?
Awa. AboFakazi bakaJehova bayakuthabela ukufundisa abanye ngeBhayibheli kodwana abakateleli muntu bona abe sekolwenabo. Kunalokho, ngehlonipho bafundisa lokho okutjhiwo liBhayibheli, bayalemuka bona umuntu ngamunye unelungelo lokuzikhethela bona khuyini afuna ukuyikholelwa.—1 Pitrosi 3:15.
Ngingasebenzisa lami iBhayibheli?
Iye, ungasebenzisa nanyana ngiyiphi itjhugululo yeBhayibheli oyithandako. Nanyana sithabela ukusebenzisa itjhugululo yeBhayibheli yemiTlolo eCwengileko ngebanga lokuthi izwisiseka lula begodu inembile, siyatjheja ukuthi abantu abanengi bakhetha ukusebenzisa itjhugululo abayijayeleko.
Ngingabamema na abanye bona bahlanganyele nami esifundwenesi?
Iye. Ungamema umndenakho woke namkha abangani bakho.
Kuthiwani nange khengafunda iBhayibheli naboFakazi bakaJehova esikhathini esidlulileko? Kghani ngingafunda godu?
Iye. Kuhlekuhle, kungenzeka usithabele isifundo samva nje ukudlula sesikhathini esidlulileko ngombana sihlelwe ngendlela ethinta ukuphila kwabantu namhlanjesi. Ngokungafani nesifundo seBhayibheli sesikhathi esidlulileko, sanje sisebenzisa khulu amavidiyo.
Ninaso na isifundo seBhayibheli ngaphandle kokuthi ngifundelwe mumuntu?
Iye. Nanyana abafundi abanengi bazwisisa ngcono nange kunothileko obafundelako, abanye bakhetha ukuthoma ngokuzifundela bona ngokwabo. Ikhasi lamaThulusi wesiFundo sethu seBhayibheli litjengisa amathulusi wasimahla angakusiza njengombana uzifundela wena iBhayibheli. Naka amanye wamathulusi angaba lisizo:
Amavidiyo WeBhayibheli. Amavidiyo amafitjhani la ahlathulula iimfundo eziqakathekileko ezifundiswa liBhayibheli.
Imibuzo YeBhayibheli Iyaphendulwa. Iinhlokwezi ziphendula imibuzo eminengi emalungana neBhayibheli.
Amavesi WeBhayibheli Ayahlathululwa. Ingcenye le ihlathulula amavesi amanengi weBhayibheli aziwako.