Ukuphila Nokugula Okungalaphekiko​—Kghani IBhayibheli Lingasisiza?

Ipendulo yeBhayibheli

Iye. UZimu unendaba neenceku zakhe ezigulako. Nalikhuluma ngenceku kaZimu ethembekileko, iBhayibheli lithi: “UJehova uzomsekela embhedenakhe nakagulako.” (IRhubo 41:3) Nangabe uphila nokugula okungalaphekiko, amagadango amathathu alandelako angakusiza:

1. Thandazela amandla wokukghodlhelela. Ungafumana “ukuthula kwakaZimu okudlula koke ukuzwisisa,” okungakwenza ungasatshwenyeki khulu.—Filipi 4:6, 7.

2. Qala izinto ngendlela efaneleko. IBhayibheli lithi: “Ihliziyo enamileko iyintatha ehle, kodwana umphefumulo oqobekileko womisa amathambo.” (IzAga 17:22, IBhayibheli Elicwengileko) Linga ukuba mumuntu othabileko, njengombana lokho kungekhe kukwenze uqalane neenkhathi ezibudisi kwaphela kunalokho kuzokwenza nobujamo bakho bepilo bubengcono.

3. Yiba nethemba ngengomuso. Ithemba eliqinileko lingakusiza uthabe nanyana uqalene nokugula okungalaphekiko. (Roma 12:12) IBhayibheli labikezela ukuthi kuzokuba nesikhathi lapho kunganasakhamuzi “esizokuthi: ‘Ngiyagula.’” (Isaya 33:24) UZimu uzokulapha ukugula okungalaphekiko okubhalela zezokwelapha zanamhlanjesi. Ngokwesibonelo, iBhayibheli lihlathulula indlela ukuguga okuzoqedwa ngayo nalithi: “Inyamakhe ayibe yitja kuneyomntwana; abuyele emihleni yamandla wobutjha bakhe.”—Jobho 33:25.

Tjheja nakhu: Nanyana aboFakazi bakaJehova balamukela isizo elivela kuZimu, bayaya nakibodorhodere nabaqalene nokugula okungalaphekiko bona bafumane isizo. (Markosi 2:17) Nanyana kunjalo, asinamithetho ekhethekileko yendlela umuntu ekufuze alatjhwe ngayo; umuntu omunye nomunye kufuze azikhethele indlela afuna ukulatjhwa ngayo.