Joromiya

42 Nje-ke zoke iinduna zamabutho noJorhanani+ indodana kaKhareyarhi, uJezaniya indodana kaHotjhaya nabo boke abantu kusukela komncani kuya komkhulu, batjhidela 2 bathi kuJoromiya umphorofidi: “Sibawa ulalele isibawo sethu somusa, usithandazele kuJehova uZimakho, nebantwini boke abaseleko, ngombana kusele abambalwa+ njengombana ubona. 3 Kwanga uJehova uZimakho angasitjela indlela okufuze sikhambe ngayo nokuthi kufuze senzeni.”

4 UJoromiya umphorofidi wabaphendula wathi: “Nginizwile begodu ngiyanithandazela kuJehova uZimenu ngokwalokho enikubawileko; ngizonitjela woke amezwi uJehova aniphendula ngawo. Angekhe nginifihlele litho.”

5 Baphendula uJoromiya bathi: “Kwanga uJehova angaba ngufakazi weqiniso nothembekileko, asijezise nangabe asenzi ngokwendlela uJehova uZimakho asiyale ngayo asebenzisa wena. 6 Nanyana kukuhle namkha kukumbi, sizokulalela ilizwi lakaJehova uZimethu esikuthumela kuye bona kusikhambele kuhle ngombana silalela ilizwi lakaJehova uZimethu.”

7 Nje-ke ngemva kwamalanga alitjhumi ilizwi lakaJehova lafika kuJoromiya. 8 Nje-ke wabiza uJorhanani indodana kaKhareyarhi nazo zoke iinduna zamabutho ebezinaye nabo boke abantu kusukela komncani kuya komkhulu.+ 9 Wathi kibo: “Nakhu uJehova uZimu ka-Israyeli akutjhoko, lo eningithumele kuye bona ngiyonibawela umusa kuye: 10 ‘Naningahlala enarheni le ngizonakha angekhe nginibhuruze, ngizonitjala angekhe nginiruthule, ngombana ngizozisola* ngehlekelele enginibangele yona.+ 11 Ningasabi ngebanga lekosi yeBhabhiloni, eniyisabako.’+

“‘Ningasabi ngebanga layo,’ kutjho uJehova, ‘ngombana nginani bona nginisindise begodu nginihlenge esandleni sayo. 12 Ngizokuba nomusa kini+ begodu izokuba nomusa kini inibuyisele enarhenenu.

13 “‘Kodwana nanithi, “Awa angeze sihlale enarheni le!” Begodu ningalaleli ilizwi lakaJehova uZimenu 14 ngokuthi nithi, “Awa sizokuya enarheni yeGibhide+ lapho singekhe sibone khona ipi namkha sizwe itjhada lephondo namkha silambele uburotho; lapho kulapho sizokuhlala khona,” 15 yeke lalela ilizwi lakaJehova, wena oseleko wakwaJuda. Nakhu uJehova wamabutho, uZimu ka-Israyeli akutjhoko: “Nangabe nakanjani uzimisele ukuya eGibhide uyokuhlala khona, 16 isabula oyisabako izokufumana lapho enarheni yeGibhide, indlala oyisabako izokulandela eGibhide begodu uzokufela lapho.+ 17 Boke abantu abazimisele ukuyokuhlala eGibhide bazokufa ngesabula, ngendlala nangesibetho.* Akakho namunye kibo ozokusinda namkha aphunyurhe ehlekeleleni engizobalethela yona.”’

18 “Ngombana nakhu uJehova wamabutho, uZimu ka-Israyeli akutjhoko: ‘Njengombana itukuthelwami nelaka lami lathululelwa ezakhamuzini zeJerusalema,+ ngokufanako ilaka lami lizokuthululelwa kini nangabe nizokuya eGibhide, nizokuba siqalekiso, into ethusako, into yokuthukwa, nehlazisako+ begodu angeze nisayibona indawo le.’

19 “UJehova ukhulume ngokujamelene nani, nina abaseleko bakwaJuda. Ningayi eGibhide. Kufuze nazi ngokuqinisekileko bona namhlanjesi nginiyelelisile 20 ukuthi imitjhaphwenu izonibangela bona nife. Ngombana ningithumele kuJehova uZimenu, nathi, ‘Sibawa usithandazele kuJehova uZimakho, usitjele koke uJehova uZimethu akutjhoko, sizokwenza.’+ 21 Namhlanjesi nginitjelile kodwana angekhe nililalele ilizwi lakaJehova uZimenu namkha nenze nanyana yini angithumele bona nginitjele yona.+ 22 Nje-ke yazini ngokuqinisekileko bona nizokufa ngesabula, ngendlala nangesibetho enarheni enifuna ukuyokuhlala kiyo.”+