Uzimisele na Ukuzivumelanisa Nobujamo?
1. Amatjhuguluko enzeka ephasini enza kutlhogeke senze liphi itjhentjho?
1 Ku-1 Korinte 7:31, iBhayibheli imadanisa iphasi nomdlalo wetjhatjhalazi nabadlali abatjhentjhanako. Amatjhuguluko enzeka ephasini enza kutlhogeke bona ngezinye iinkhathi senze itjhentjho eendleleni zethu zokutjhumayela, ehlelweni lethu nendlela esithula ngayo isigijimi. Uzimisele na ukuzivumelanisa nobujamo?
2. Kubayini kufuze sizivumelanise nobujamo bona sikhambisane nehlangano?
2 Iindlela Zakho Zokutjhumayela: Ibandla lobuKrestu belisolo lizivumelanisa nobujamo. UJesu nekathuma abafundi bakhe kokuthoma, wabatjela bona bangaphathi iinkhwama zomphako namtjhana zemali. (Mat. 10:9, 10) Nokho, ngokukhamba kwesikhathi watjhentjha iinlayezwezo acabangela ihloyo egade bazokuqalana nayo nomsebenzi omnengi wokutjhumayela bona ufikelele nakwamanye amasimu. (Luk. 22:36) Eminyakeni elikhulu edlulileko, ihlangano kaJehova beyisebenzisa iindlela ezihlukahlukeneko zokutjhumayela—ngokwesibonelo, amakarada wokufakaza, iintetjhi zokurhatjha neenkoloyi ezineempikara—ngokuvumelana nalokho ebekutlhogeka ngesikhatheso. Namhlanje, njengombana eendaweni ezinengi bayindlala abantu emakhaya, kugandelelwe khulu bona senze okungeziweko ekonzweni yomuzi nomuzi ngokufakaza tjhatjhalazi nangokungakahlelwa. Khe sakhuthazwa nokobana sitjhumayele emzini nomuzi ntambama nengabe abantu basemsebenzini emini. Lokha ikoloyana kaJehova yezulwini yenza amatjhuguluko inga-kghani ukhambisana nayo?—Hez. 1:20, 21.
3. Ukuzivumelanisa nobujamo kungasisiza njani bona siphumelele khudlwana esiminethu?
3 Itjumayelwakho: Esikhathinesi, khuyini etshwenya abantu endaweni yangekhenu? Kghani ngezomnotho? Zomndeni? Izipi? Kuyasiza ukwazi ngemiraro ekhona yobujamo evamileko esimini yethu bona silungiselele itjumayelo efaneleko. (1 Kor. 9:20-23) Abaninimuzi nebaveza okubatshwenyako, kunokubanikela ipendulo ekha phezulu begodu siragele phambili netjumayelo esiyilungiseleleko, qala bona kungaba kuhle kangangani bona sizivumelanise nobujamo sicoce nabo ngokubatshwenyako.
4. Kubayini kufuze sirhabe ukuzivumelanisa nobujamo?
4 Msinyana “ubujamo” bephaseli buzokuphela bese kuthoma iintlayiseko ezikulu. ‘Isikhathi esiseleko sifitjhani.’ (1 Kor. 7:29) Ngalokho, qala bona kuqakatheke kangangani ukuzivumelanisa nobujamo ngaphandle kokuriyada, senze okunengi esikhathini esincani esiselekwesi!