Ibhoksi Lemibuzo

◼ Abantwana kufuze bafundeni bona bakhulele ekuvuthweni ngokomoya?

Ababelethi abamaKrestu benza lukhulu bona bakhulise abantwababo ‘ngefundiso nomyalo weKosi [uJehova].’ (Efe. 6:4) Ngokwesibonelo, ababelethi bafumene bona kuyazuzisa ukufunda umtlolo welanga nabantwababo qobe ekuseni. Ekukhulekeleni komndeni nangezinye iinkhathi, imindeni ingabukela beyicoce ngevidiyo ndawonye, idembe isihloko esithileko kwezithi Intsha Iyabuza, idlale idrama yendaba eseBhayibhelini, namkha iphrakthize okuthileko. Nokho, bona abantwana ‘baragele phambili ekuvuthweni,’ kufuze bafundiswe namaqiniso weBhayibheli adephileko.​—Heb. 6:1.

Cabanga ngalokho esikufundisa abantu esihlangana nabo esimini. Ekukhambeleni kokuthoma namkha nasenza ibuyelo, ngokuvamileko silwela ukuthomisa isifundo seBhayibheli ngencwadi ethi Khuyini Kwamambala Okufundiswa YiBhayibhili? Ngemva kokuyifunda yoke incwadi leyo, sifunda ethi ‘Hlalani Ethandweni LakaZimu.’ Kubayini? Incwadi ethi Okufundwa yiBhayibhili inikela umfundi ilwazi lemiTlolo elisisekelo. Incwadi ethi ‘Ethandweni LakaZimu’ ibafundisa indlela yokusebenzisa iinkambisolawulo zeBhayibheli ekuphileni kwangamalanga. Ukufunda zombili iincwadezi kusiza abasand’ ukuhlanganyela bona ‘badzimelele’ kuKrestu begodu ‘baqine ekukholweni.’ (Kol. 2:​6, 7) Iincwadezi ngeze zabazuzisa na abantwabakho? Nabo batlhoga ukufundiswa ngesihlengo, umBuso nangobujamo babahlongakeleko. Nabantwana kufuze bazi ukuthi kubayini uZimu avumela umtlhago nendlela yokubona amalanga wokuphela wephaseli. Kufuze bakholiseke bona aboFakazi bakaJehova baneqiniso. Godu ilutjha kutlhogeka lizwisise iinkambisolawulo zeBhayibheli nokuthi lingakubandula njani ‘ukusebenza komkhumbulwalo.’ (Heb. 5:14) Liqiniso, ababelethi kufuze bacabangele ubudala nezinga lokuzwisisa labantwababo. Nokho, abantwana abanengi banekghono lokufunda amaqiniso weBhayibheli adephileko ngitjho nanyana basesebancani tle.​—Luk. 2:​42, 46, 47.