“La Mazwi . . . Kumelwe Abe Senhliziyweni Yakho”

Ababelethi bafaniswa nabelusi. Kufuze batlhogomele abantwababo kuhle, okungaba lula ngabo ukuthi bahlahlathe begodu bahlaselwe. (IzA. 27:23) Ababelethi bangayizalisa njani indimabo? Kufuze benze isikhathi sokucoca nabantwababo qobe langa ukwenzela bona bakwazi okuseengqondweni neenhliziyweni zabo. (IzA. 20:5) Yeke, ababelethi kufuze bakhe ngezinto ezingatjhiko ukuqinisa ikholo labantwababo. (1 Kor. 3:10-15) Ividiyo ethi, “La Mazwi . . . Kumelwe Abe Senhliziyweni Yakho” igandelela ukuqakatheka kokwenziwa kokukhulekela komndeni kwaqobe. Ibukeleni njengomndeni, ngemva kwalokho bese nicoca ngemibuzo elandelako le.

(1) Khuyini eyadosela umndeni wakwaMngoma wathoma ukunganaki izinto ­ezingokomoya? (2) Kubayini uMzalwana uMngoma igadango lakhe lokuthoma lokwenza ukukhulekela komndeni linga khenge liphumelele? (3) Ngiyiphi ikambisolawulo engokomTlolo eyenza ube nethuba elihle lokuphumelela ekukhuliseni abantwana? (Dut. 6:6, 7) (4) Khuyini engenza umndeni ube nokukhulumisana okuhle? (5) Ngikuphi ukuzidela okufuze kwenziwe babelethi ebantwaneni babo? (6) UMzalwana noDade Hadebe baba namuphi umthelela omuhle emndenini wakwaMngoma? (IzA. 27:17) (7) Ngikuphi okufuze kwenziwe yihloko yomndeni kusese ngaphambili ukwenzela ukuthi ukukhulekela komndeni kuphumelele? (8) Khuyini eyenziwa Mzalwana uMngoma ukuthi enze izinto zibe ngcono emndeninakhe? (9) Kubayini ukungatjhentjhatjhentjhi isikhathi kuqakathekile ekukhulekeleni komndeni? (Efe. 6:4) (10) Ngiziphi ezinye izinto ezisebenzako ekukhulekeleni komndeni? (11) Ukuba nomoya ophasi kwakaMzalwana uMngoma kodwana waqinisa lapho ebekufuze aqinise khona nakasiza uMalusi, kwamsiza njani ukuthi akwazise ukuqakatheka kokwenza okulungileko? (Jor. 17:9) (12) UMzalwazana noDade Mngoma babonisana njani noRebecca ukumsiza ukuthi enze isiqunto esifaneleko malungana nobuhlobo bakhe noJustin? (Mar. 12:30; 2 Thim. 2:22) (13) UMzalwana noDade Mngoma balitjengisa njani ikholo labo nabenza amatjhuguluko emaphilwenabo? (14) Ividiyo le igandelela njani itlhogeko ngeenhloko zemindeni ukuthi zondle imindenazo ngezinto ezikomoya? (15) Njengehloko yomndeni uzimisele ukwenzani?

OKUFUZE KUTJHEJWE ZIINNHLOKO ZEMINDENI: Idrama le yesikhathi sethu yethulwa emihlanganweni yesifunda ngo-2011. Ngesikhatheso, watjheja na lapho okufuze uthuthukise khona ekukhulekeleni komndenakho? Kuthiwani-ke nje? Nangabe kunamatjhuguluko okufuze enziwe, sibawa uthandaze ngokudephileko bona wenze amatjhuguluko azokuzuzisa umndenakho ngokungapheliko.​—Efe. 5:15-17.