Kubayini Kufuze Sihloniphe Igunya?

1, 2. (a) Ngibuphi ubudisi esiqalana nabo nekuziwa endabeni yokuhlonipha igunya? (b) Ngimiphi iimbuzo esizoyicabangela?

WAKHE wambona umntwana omncani bona uba njani nebambawe bona enze into angafuni ukuyenza? Ungabona ubuso bomsanyana loyo busilingekile. Uyalizwa ilizwi lababelethi bakhe, begodu uyazi bona kufuze ahloniphe igunya labo. Kodwana nje, akafuni ukulalela. Ukusilingeka kwakhe kutjengisa iqiniso soke esiqalene nalo.

² Ukuhlonipha igunya akusibulula ngaso soke isikhathi. Ngezinye iinkhathi ukufumana kubudisi ukuhlonipha labo abanegunya kuwe? Nengabe kunjalo, awusiwedwa epini le. Siphila esikhathini lapho ukuhlonipha igunya kwehla khona. Nokho, iBhayibhili ithi kufuze sibe nehlonipho kilabo abanegunya kithi. (Izaga 24:21) Eqinisweni, ukwenza njalo kuqakathekile nengabe sifuna ukuhlala ethandweni lakaZimu. Ngokuvamileko-ke, kuphakama iimbuzo. Kubayini kubudisi kangaka ngathi ukuhlonipha igunya? Kubayini uJehova asibawa bonyana senze njalo, begodu khuyini ezosirhelebha bona silalele? Emaswapheleni, ngiziphi iindlela esingatjengisa ngazo ukuhlonipha igunya?

KUBAYINI KUBUDISI UKUHLONIPHA IGUNYA

3, 4. Isono nokungapheleli kwathoma njani, begodu kubayini ukuba nesono kwethu kwenza kube budisi ngathi ukuhlonipha igunya?

³ Kancani akhe sicabange amabanga amabili enza kube budisi kangaka ngathi ukuhlonipha labo abasegunyeni. Kokuthoma, sinesono; kwesibili, abantu abasegunyeni nabo banesono. Isono nokungapheleli kwabantu kwathoma esikhathini eside esadlulako, emva le esimini ye-Edeni lokha u-Adamu no-Efa bavukela igunya lakaZimu. Ngalokho isono sathoma ngokuhlubuka. Kusukela lapho, sabelethwa sitjhigamele ekuvukeleni.—Genesisi 2:15-17; 3:1-7; AmaRhalani 51:5; KwebeRoma 5:12.

⁴ Ngebanga lokuba nesono kwethu, msinyana inengi lethu lingazikhakhazisa begodu liziphakamise, kungilapho ukuthobeka kuyifanelo engakavami ekufuze siberege budisi bona siyihlawulele begodu siyibulunge. Ngitjho nangemva kweemnyaka yekonzo yokuthembeka kuZimu singaba nekani sizikhakhazise. Isibonelo, cabangela indaba kaKora, ngokuthembeka owakakarela ebantwini bakaJehova naphezu kobudisi obukhulu. Namtjhana kunjalo, warhalela isikhundla esiphezulu ngokudelela wenza abantu bavukela uMosisi, indoda enesineke egade iphila ngesikhatheso. (Numeri 12:3; 16:1-3) Godu cabanga ngeKosi u-Uziya, ukuzikhakhazisa kwakhe okwamenza wangena etempelini lakaJehova wenza ikonzo ecwengileko ebekufuze yenziwe bapristi kwaphela. (2 IMilando 26:16-21) Amadoda anjalo anikelwa isibetho esibuhlungu ngokuhlubuka kwawo. Nokho, iimbonelo zawo ezimbi ziziinkhumbuzo eziberegako kithi soke namhlanjesi. Kufuze silwe nokuzikhakhazisa okwenza kube budisi ngathi ukuhlonipha igunya.

5. Abantu abanesono baliberegisa njani kumbi igunya labo?

⁵ Ngakelinye ihlangothi, abantu abanesono abaseenkhundleni kunengi abakwenzileko okutjengisa ukungalihloniphi igunya. Abanengi banelunya, begodu baphatha abanye kumbi. Eqinisweni, umlando ufakazela ukuberegiswa kumbi kwamandla wokubusa. (Funda UMtjhumayeli 8:9) Isibonelo, uSawula gade ayindoda elungileko nethobekileko lokha uJehova nekamkhetha bona abe yikosi. Nokho, wavumela ukuzikhakhazisa nomona; ngemva kwalokho watlhorisa indoda elungileko uDavidi. (1 Samuweli 9:20, 21; 10:20-22; 18:7-11) UDavidi waba ngenye yamakhosi alungileko u-Israyeli akhe waba nawo, nokho waberegisa igunya lakhe kumbi lokha nakeba umfazi ka-Uriya umHeti begodu wathumela indoda enganamlandu leyo ngaphambili epini bona ibulawe. (2 Samuweli 11:1-17) Kwamambala, ukuba nesono kwenza kube budisi ngabantu bona baberegise igunya labo kuhle. Begodu nengabe laba abasegunyeni abamhloniphi uJehova, bawaberegisa kumbi khulu amandlabo. Ngemva kokuhlathulula indlela abanye abopapa bamaKhatholiki abathoma ngayo ukurhatjhekisa ukutlhoriswa, isikhulu sakarhulumende weBrithani satlola: “Amandla ngokuvamileko ayonakalisa, begodu amandla amakhulu onakalisa khulu.” Sinalokhu emkhumbulweni, akhe sicabangele umbuzo othi: Kubayini kufuze sihloniphe igunya?

KUBAYINI KUFUZE SIHLONIPHE IGUNYA?

6, 7. (a) Ithando ngoJehova lisitjhukumisela bona senzeni, begodu kubayini? (b) Kutjho ukuthini ukuthobeka, begodu sikutjengisa njani?

⁶ Ibanga elibhedere lokuhlonipha igunya lithando—ithando ngoJehova, ngabanye abantu, nethando ngathi ngokwethu. Ngombana sithanda uJehova ngaphezu kwananyana yini, sifuna ukwenza ihliziyo yakhe ithabe. (Funda Izaga 27:11; Markosi 12:29, 30) Siyazi bona ubukhosi bakhe, ilungelo lakhe lokubusa izulu nephasi, babekelwa iselele ephasini solo kwathoma ukuvukela e-Edeni begodu inengi lesintu laba ngehlangothini lakaSathana labhala ukuzithoba ekubuseni kwakaJehova. Siyakuthabela ukusekela ubukhosi bakaJehova. Nesifunda amezwi akarisako weSambulo 4:11, athabisa iinhliziyo zethu. Qala bona kusepepeneneni kangangani bona uJehova Mbusi ofaneleko wezulu nephasi! Sisekela ubukhosi bakaJehova, simukele ukubusa kwakhe ekuphileni kwethu kwelanga nelanga.

⁷ Ukuhlonipha uJehova sikwenza lapho sizwisisa khona ibanga lokwenza njalo—kodwana siyathobeka namtjhana sikufumana kubudisi ukwenza njalo. Silalela ngombana simthanda. Nokho, kuzokuba neenkhathi lapho ukulalela kuzokuba budisi khona kithi. Ngeenkhathi ezinjalo, sifana nomsanyana loya esikhulume ngaye ekuthomeni, kufuze sifunde ukuthobeka. Siyakhumbula bonyana uJesu wazithoba entandweni kaYise ngitjho namtjhana ukwenza njalo bekubudisi khulu. Wathi kuYise: “Ingasingentando yami kodwana ngentando yakho.”—Luka 22:42.

8. (a) Ukuthobela igunya lakaJehova ngokuvamileko kuhlanganisani namhlanjesi, begodu khuyini etjengisa amazizo kaJehova kilokhu? (b) Khuyini engasirhelebha bona silalele isinqophiso begodu samukele nesiyalo? (Qala ibhoksi elithi, “Lalela Isiluleko Wamukele Isilayo.”)

⁸ Kuliqiniso, uJehova akakhulumi nomuntu nomuntu namhlanjesi, uberegisa iLizwi lakhe nabajameli abababantu ephasini. Esikhathini esinengi sitjengisa ukuzithoba egunyeni lakaJehova ngokuhlonipha abantu ababekileko, abavumele bona babe negunya phezu kwethu. Nesivukela abantwabo—isibonelo, ngokwala ukwamukela isinqophiso nokulungisa kwabo koMtlolo—sizobe sizwisa uZimethu ubuhlungu. Lokha ama-Israyeli nekanghonghoyilako begodu avukela uMosisi, uJehova waqala ukuvukela kwabo njengokuvukela yena.—Numeri 14:26, 27.

9. Kubayini ithando ngabanye abantu lisitjhukumisela bona sihloniphe igunya? Tjengisa.

⁹ Sitjengisa ukuhlonipha igunya ngombana sithanda abanye abantu. Kubayini singatjho njalo? Akhe uzicabange ulisotja epini. Ukuphumelela, ngitjho nokuphuluka epini, kuyame ekubambisaneni kwamasotja, ngokulalela nokuhlonipha abalawuli. Nengabe awubalaleli abalawulabo ngokuvukela, woke amanye amasotja onawo angazifumana asengozini. Kuliqiniso, amabutho wabantu abangela umonakalo omkhulu ephasini namhlanjesi. Nokho, uJehova unamabutho enza okuzuzisa abantu. IBhayibhili ibiza uZimu amakhulukhulu weenkhathi bona “nguJehova wamabutho.” (1 Samuweli 1:3) UnguMlawuli weembunjwa ezihlukahlukeneko zomoya ezinengi ezinamandla. Ngezinye iinkhathi uJehova ufanisa iinceku zakhe ezisephasini nebutho. (AmaRhalani 68:11; Ezekiyeli 37:1-10) Nengabe sivukela abantu uJehova abanikele igunya phezu kwethu, sizobe sibeka amasotja angokomoya esinawo engozini. Nengabe umKrestu uvukela abadala ababekiweko, nabanye ebandleni bangatlhaga. (1 KwebeKorinte 12:14, 25, 26) Nomntwana nekavukelako, kutlhaga umndeni woke. Ngalokho sitjengisa ithando ngabanye abantu ngokuhlawulela ihlonipho nomoya webambisano.

10, 11. Kubayini ikhanuko yethu enqophileko yokuzizuzisa isitjhukumisela bona silalele igunya?

¹⁰ Godu sihlonipha igunya ngombana lokho kuzuzisa thina. UJehova nekasibawa bona sihloniphe igunya, kanengi usitjela neenzuzo esizozifumana ngokwenza kwethu njalo. Isibonelo, utjela abantwana bonyana balalele ababelethi babo bona baphile kuhle isikhathi eside. (Duteronomi 5:16; Kwebe-Efesu 6:2, 3) Usitjela bona silalele abadala ebandleni ngombana ukubhalelwa ukwenza njalo kuzokulimaza ubuhlobo bethu noJehova uZimu. (KumaHebheru 13:7, 17) Begodu usitjela bona silalele amagunya wababusi ngombana lokho kuzosivikela.—KwebeRoma 13:4.

¹¹ Awuvumi bonyana ukwazi kobana kubayini uJehova afuna silalele kusirhelebha bona sihloniphe igunya? Kwanje akhe sicabange bona singaba njani nehlonipho ngegunya eendleleni eenthathu eziyihloko ekuphileni.

IHLONIPHO EMNDENINI

12. Ngiyiphi indima uJehova ayabele indoda nobaba emndenini, begodu indoda ingayizalisa njani indima leyo?

¹² UJehova ngokwakhe wenza ilungiselelo lomndeni. UJehova nguZimu wokuhlophiseka, wahlophisa umndeni bona uberegisane ngokuphumelelako. (1 KwebeKorinte 14:33) Wabeka indoda nobaba bona ibe yihloko yomndeni. Indoda itjengisa ihlonipho kiloyo oyiHloko yayo, uJesu Krestu, ngokulingisa indlela uJesu aberegisa ngayo ubuhloko bakhe ebandleni. (Kwebe-Efesu 5:23) Ngalokho, indoda akukafuzi bona ibhalelwe ukuthwala umthwalo wayo, kodwana kufuze iwuthwale njengendoda; begodu akukafuzi bona ibe nelunya namtjhana bukhuni kunalokho kufuze ibe nethando, icabangele, begodu ibe nomusa. Iyakhumbula bona igunya layo limediwe—alidluli igunya lakaJehova.

13. Umfazi ongumma angawuzalisa njani umthwalo wakhe emndenini ngendlela ethabisa uJehova?

¹³ Umfazi nomma kufuze abe mrhelebhi wendodakhe namtjhana umphelelisi. Naye unikelwe umthwalo othileko emndenini, njengombana iBhayibhili ikhuluma “ngomlayo kanyoko.” (Izaga 1:8) Liqiniso, igunya lakhe lingaphasi kwelendodakhe. Umfazi omKrestu utjengisa ihlonipho ngegunya lendodakhe ngokuyirhelebha bona izalise indima yayo njengehloko yomndeni. Akayinyazi, ayenzise izinto ezifunwa nguye namtjhana athathe ubuhloko bayo. Kunalokho, uyayisekela abambisane nayo. Nengabe akavumelani nesiqunto sayo, ngehlonipho uzokuveza amazizo wakhe, kodwana uhlala athobekile. Nengabe indodakhe ayisilo ikholwa, angaqalana nobujamo obubudisi, nokho ukuthobeka kwakhe kungenza indodakhe bona nayo ifune uJehova.—Funda 1 KaPitrosi 3:1.

14. Abantwana bangaliletha njani ithabo kubabelethi babo nakuJehova?

¹⁴ Abantwana bathabisa uJehova nebalalela uyise nonina. Baletha idumo nethabo ebabelethini babo. (Izaga 10:1) Emndenini onombelethi oyedwa, abantwana baberegisa umlayo ofanako wokulalela, batlhogomela bona umbelethi wabo kungenzeka ukutlhoga khulu ukusekela kwabo nehlonipho. Emndenini lapho woke amalungu azalisa indima yawo ayabelwe nguZimu, kuba nokuthula nethabo. Lokhu kuletha ithabo kuMthomi wayo yoke imindeni, uJehova uZimu.—Kwebe-Efesu 3:14, 15.

IHLONIPHO EBANDLENI

15. (a) Singatjengisa njani bona sihlonipha igunya lakaJehova ebandleni? (b) Ngimuphi umyalo ongasirhelebha bona silalele laba abadosa phambili ebandleni? (Qala ibhoksi elithi, “Lalelani Abadosi Phambili Benu.”)

¹⁵ UJehova ukhethe iNdodanakhe bona ibe Mbusi phezu kwebandla lobuKrestu. Ngakelinye ihlangothi, uJesu ukhethe “inceku ethembekileko ehlakaniphileko” bona itlhogomele iintlhogo ezingokomoya zabantu bakaZimu ephasini. (Matewu 24:45-47) ISihlopha eSibusako saboFakazi bakaJehova sijamele isigaba senceku. Njengemabandleni wobuKrestu wekhulu lokuthoma, abadala namhlanjesi bafumana iinqophiso neenluleko eSihlopheni eSibusako, kungaba ngokunqophileko namtjhana ngabajameli baso, njengababonisi abakhambako. Nengabe umuntu nomuntu uhlonipha igunya labadala abamaKrestu, sizobe silalela uJehova.—Funda KumaHebheru 13:17.

16. Kubayini singathi abadala bakhethwe ngomoya ocwengileko?

¹⁶ Abadala neenceku ezikhonzako abakapheleli. Nabo bayayenza iimtjhapho njengathi. Namtjhana kunjalo, abadala ‘zizipho ezibabantu,’ ababekwe bona barhelebhe ibandla lihlale liqinile ngokomoya. (Kwebe-Efesu 4:8) Abadala bakhethwe mumoya ocwengileko. (IZenzo 20:28) Kubayini sitjho njalo? Ngombana amadoda anjalo kufuze abe neemfanelo ezitlolwe eLizwini lakaZimu eliphefumulelweko qangi. (1 KuThimothi 3:1-7, 12; KuTitosi 1:5-9) Ngaphezu kwalokho, abadala abakhetha umzalwana bathandazela isinqophiso somoya kaJehova ocwengileko ngokuthembeka.

17. Ezabelweni zebandla, kubayini abafazi abamaKrestu ngezinye iinkhathi kufuze bathwale ehloko?

¹⁷ Ngezinye iinkhathi kungenzeka bona ebandleni bangabi khona abadala neenceku ezikhonzako bonyana baphathe izabelo ngokuvamileko ezabelwa bona, ezinjengokuphatha imihlangano yekonzo yesimini. Ebujamweni obunjalo, abanye abazalwana ababhabhadisiweko bangaphatha imihlangano leyo. Nengabe abekho abazalwana abanjalo, abodade abafanelekako abamaKrestu bangaphatha imihlangano leyo. Nokho, lokha umfazi nekenza isabelo kanengi esenziwa mzalwana obhabhadisiweko, kufuze athwale ehloko.a (1 KwebeKorinte 11:3-10) Ifuneko le ayibehlisi abafazi. Kunalokho, ibanikela ithuba lokutjengisa ihlonipho elungiselelweni lakaJehova lobuhloko, kokubili ekhaya nebandleni.

UKUHLONIPHA AMAGUNYA WABABUSI

18, 19. (a) Singayihlathulula njani ikambisolawulo eKwebeRoma 13:1-7? (b) Siyitjengisa njani ihlonipho ngababusi abasiphetheko?

¹⁸ AmaKrestu wamambala ngokutjheja alalela ikambisolawulo etlolwe KwebeRoma 13:1-7. (Funda.) Njengombana ufunda indinyana leyo, uzokubona bona “amagunya aphakemeko,” NW okukhulunywa ngawo lapho babusi abasiphetheko. UJehova nekasavumela ababusaba bona babe khona, benza umberego oqakathekileko, babulunga ukuhlophiseka ngesilinganiso esithileko nangokurhelebha abantu ngezinto abazitlhogako. Sitjengisa ihlonipho emagunyeni la ngokuthobela umthetho. Siyaqiniseka bona sibhadela umthelo, siwazalisa kuhle amaforomo urhulumende awafunako, begodu nokulalela nanyana ngiyiphi imithetho ebandakanya thina, imindeni yethu, irhwebo, namtjhana izinto esinazo. Namtjhana kunjalo, asiwathobeli amagunya nekasibawa bona singamlaleli uZimu. Kunalokho, siphendula ngendlela abapostoli bekadeni abaphendula ngayo: “Kujamele bona simhloniphe uZimu kunabantu.”—IZenzo 5:28, 29; qala ibhoksi elithi: “Ligunya Lakabani Ekufuze Ngililalele?.”

¹⁹ Godu sitjengisa ihlonipho ngababusi abasiphetheko ngendlela esiphilisana ngayo nabanye. Ngezinye iinkhathi, singaberegisana ngokunqophileko neenkhulu zakarhulumende. Umpostoli uPowula waberegisana nababusi abanjalo abanjengeKosi uHerodi Agripa noMbusi uFestusi. Amadoda la gade onakele khulu, kodwana uPowula wakhuluma nawo ngehlonipho. (IZenzo 26:2, 25) Nathi silingisa isibonelo sakaPowula, kungakhathaliseki bona isikhulu esikhuluma naso simbusi omkhulu namtjhana lipholisa lendawo. Esikolweni, amaKrestu asesematjha alinga ngamandla ukutjengisa ihlonipho enjalo kumathitjhere, abaphathi besikolo nabantu abaqatjhiweko. Kuliqiniso, asihloniphi labo abamukela iinkolelo zethu kwaphela; siyahlonipha nalokha siberegelana nalabo abaphikisa aboFakazi bakaJehova. Mbala, abangakholwako nabo kufuze babone bona siyahlonipha.—Funda KwebeRoma 12:17, 18; 1 KaPitrosi 3:15.

20, 21. Ngiziphi ezinye iimbusiso ezifumaneka ngokuthobela kwethu igunya?

²⁰ Asingarhorhi iinyawo nekuziwa endabeni yokuba nehlonipho. Umpostoli uPitrosi watlola: “Hloniphani woke umuntu.” (1 KaPitrosi 2:17) Abantu nebabona bona sibahlonipha ngokusuka ehliziyweni, bangakareka khulu. Khumbula bona ifanelo le ayikakavami namhlanjesi. Ukuba nayo, ngenye indlela yokutjengisa bona silalela umlayo kaJesu othi: “Umkhanyo wenu kufanele ukhanye phambi kwabantu, khona bazobona izinto ezihle enizenzako badumise uBaba wenu osezulwini.”—Matewu 5:16.

²¹ Ephasini elisebumnyameneli, abantu abaneenhliziyo ezilungileko badosekela ekukhanyeni kweqiniso. Ngalokho ukuba kwethu nehlonipho ekhaya, ebandleni nendaweni esihlala kiyo kungakara abanye begodu kubenze bona bakhambe nathi ekukhanyeni. Qala bona yingomuso elithabisa kangangani lelo! Nokho, ngitjho nanyana lokho kungenzeki, kunento esiqiniseka ngayo. Ukuhlonipha kwethu abanye abantu kuthabisa uJehova uZimu begodu kusirhelebhe bona sihlale ethandweni lakhe. Lokhu kutjho umtlomelo omkhulu kithi.