Ngubani IKosi YomBuso KaZimu?

• Ikhethwe nguZimu. “Ngimi obeke ikosi . . . ngikunikele bezizwe babe lilifa lakho, nemikhawulo yephasi ibe sisabelo sakho.”—IRhubo 2:6, 8.

• Yindlalifa yeKosi uDavida. “Sibelethelwe umntwana, siphiwe indodana . . . ukuze umbuso wenabe nokuthula kungapheli esihlalweni sakaDavida nembuswenakhe.”—Isaya 9:6, 7.

• Izakubelethelwa eBhethe-Lehema. “Kodwana wena, Bhethe-Lehema . . . , phakathi kwakho kuzakuphuma othileko ozakuba mbusi.”—Mikha 5:1, 3, 5:2, 4, NW.

• Izakulahlwa babantu bebayibulale. “Yanyazeka beyalahlwa babantu. . . . Yalinyazwa ngebanga leemphambeko zethu, yaphihlizwa ngenca yamacalethu.”—Isaya 53:3, 5.

• Yavuswa kwabafileko begodu yaphazinyuliswa. Angekhe “ungilahlele endaweni yabafileko namkha uvumele othembekileko wakho abone ithuna. . . . Nokwenama kungesidleni sakho isiphelani.”—IRhubo 16:10, 11.

UJesu Krestu—Uyakufanelekela Ukubusa

Emlandweni, munye kwaphela umuntu okwenzeka kuye zoke izinto ezibalwe ngehla, nguJesu Krestu. Ingilozi yatjela unina kaJesu uMariya yathi: “UZimu uzomnikela isihlalo sobukhosi sakaDavida uyise . . . begodu umBuswakhe angekhe uphele.”—Lukasi 1:31-33.

UJesu angekhe abuse asephasini. Kunalokho uzokuba yiKosi yomBuso kaZimu, abuse abantu asezulwini. Kubayini sithi uzokuba yiKosi elunge ukuzidlula zoke? Akhesibone ukuthi wenzani nakasephasini.

• UJesu bekabathanda abantu. UJesu wasiza boke abantu, abancani nabakhulu kungakhathaliseki bona bavela kuphi nokuthi bamhlobo bani. (Matewu 9:36; Markosi 10:16) Ngesikhathi indoda ebeyinobulepheru imrabhela ithi: “Nangabe uyathanda, ungangihlambulula,” uJesu wayirhawukela wayilapha.—Markosi 1:40-42.

• UJesu wasifundisa bona singamthabisa njani uZimu. Wathi: “Angekhe naba ziingqila zakaZimu nezobuGwili.” Waraga wathi zoke izinto esifuna abantu bazenze kithi nathi kufuze sizenze kibo. Ngaphezu kwalokho, watjengisa ukuthi uZimu akanandaba nezinto esizenzako kwaphela kodwana unendaba nanokuthi sizizwa njani begodu sicabangani. Yeke bona sithabise uZimu kufuze sitjheje indlela esicabanga ngayo. (Matewu 5:28; 6:24; 7:12) Wagandelela ukuthi nasifuna ukuhlala sithabile kufuze sifunde ukuthi uZimu ufunani bese siyayenza.—Lukasi 11:28.

• UJesu wasifundisa ukuthi kutjho ukuthini ukuthanda abantu. Amezwi kaJesu nezenzo zakhe bezithinta iinhliziyo zabantu. “Iinqubuthu zarareka khulu ngendlela afundisa ngayo, ngombana bekazifundisa njengomuntu onelawulo.” (Matewu 7:28, 29) Wabafundisa ukuthi, “bathande izitha zabo.” Wathandazela nabantu ababanesandla ekubulaweni kwakhe wathi: “Baba, balibalele, ngombana abakwazi abakwenzako.”—Matewu 5:44; Lukasi 23:34.

UJesu uyakufanelekela ukubusa iphasi ngombana unomusa begodu uyabatlhogomela abantu. Uzokuthoma nini ukubusa?