Endaweni ye-Utsi, bekunendoda elotjha uJehova. Ibizo layo bekunguJobho. Bekanjingile, anomndeni omkhulu. Bekanomusa begodu bekabasiza abanye abantu, njengabomma abahlongakalelwe madoda nabantwana abangana babelethi. Umbuzo kukuthi yena bengekhe na, abe nemiraro njengombana bekabenzela okuhle abanye?

UJobho bekangazi kodwana uSathana uDeveli bekamqalile. UJehova wathi kuSathana: ‘Uyitjhejile na incekwami uJobho? Akekho onjengaye ephasini. Uyangilalela begodu wenza nokuhle.’ USathana waphendula: ‘Vele uJobho uyakulalela ngombana uyamvikela bewumbusise. Umuphe inarha nefuyo. Kuthathe koke lokho, ubone ukuthi angekhe na alise ukukulotjha.’ UJehova wathi: ‘Qala usesandleni sakho, kwaphela ungathathi ukuphila kwakhe.’ Kubayini uJehova alisa uSathana bona alinge uJobho? Bekaqiniseka ukuthi uJobho angekhe amlahle.

USathana walinga uJobho ngezinto ezinengi. Kokuthoma, wathumela amaTjheba bona ayokweba iinkomo nabodumbana bakhe. Kwalandela ngokuthi umlilo utjhise izimvu zakaJobho. Isiqhema samaKasidi seba amakamelakhe. Iinsebenzi ebezitlhogomela iinlwanezi zabulawa. Ngemva kwalokho kwafika iindaba ezibuhlungu khulu. Boke abantwana bakaJobho bafela ngendlini lokha nayizakuwela phezu kwabo basathabele isidlo esikhethekileko. Ihliziyo kaJobho yaba buhlungu khulu kodwana akhenge alise ukulotjha uJehova.

USathana bekafuna uJobho ezwe ubuhlungu khulu yeke wabangela bona abe namathumba umzimba woke, uJobho wezwa ubuhlungu kwamanikelela. Bekangazi ukuthi kubayini izintwezi zenzeka kuye. Nanyana kunjalo, waraga nokulotjha uJehova. UZimu wakubona koke lokhu, wathokoza khulu ngoJobho.

Wabuya godu uSathana, nje wathumela amadoda amathathu bona ayokulinga uJobho. Athi kuye: ‘Kufuze bona wonile walinga ukufihla. Ngikho uZimu akujezisa kangaka.’ UJobho wathi: ‘Angikenzi litho elimbi.’ Kodwana wathoma ukucabanga bona uJehova nguye obangela yoke imiraro le, wathi uZimu akangithandi.

Isokana elingu-Elihu belilalele buthule njengombana kukhulunywa. Labeka lobubodlhana nalo lathi: ‘Koke lokho ebenikutjho akukalungi. UJehova mkhulu ngendlela engekhe sayicabanga. Angeze enza into embi. Ubona koke begodu uyabasiza abantu ngemiraro abanayo.’

Kusesenjalo uJehova wakhuluma noJobho. Wathi kuye: ‘Bewukuphi lokha nangenza izulu nephasi? Kubayini uthi Mina angikalungi? Uyakhuluma kodwana awazi ukuthi kubayini kwenzeka izintwezi.’ UJobho wavuma ukuthi utjhaphile bewathi: ‘Ngimi onephoso. Ngizwile ngawe, kodwana nje ngiyakwazi. Ayikho into engaphezu kwamandlakho. Ngibawa ukulitjalelwa ngalokho engikutjhwileko.’

Nakuphela isilingo, uJehova wenza uJobho waphila tswe, wamnikela nenala yezinto ukudlula ekuthomeni. UJobho waphila isikhathi eside wathabela nepilo. UJehova wabusisa uJobho ngokulalela kwakhe nalokha kubudisi. Inga-kghani wena uzokufana noJobho, ulotjhe uJehova nanyana usebudisini?

EGibhide, umndeni kaJakopo bewaziwa ngokuthi ma-Israyeli. Ngemva kobana uJakopo noJosefa bahlongakale, uFaro omutjha wathoma ukubusa. Bekasaba bona ama-Israyeli azokuba namandla ukudlula amaGibhide. Ngalokho wabangela bona ama-Israyeli abe ziingqila. Wawaforomisa iintina ngekani, wawakatelela nokuthi asebenze budisi emasini. Kodwana bekuthi amaGibhide nakawatlhorisa, ama-Israyeli ande ngesibalo. Ngebanga lokuthi uFaro bekangakuthandi lokhu, wakhupha umlayo wokobana kubulawe abasana abamasana wakwa-Israyeli. Ucabanga ukuthi kwawathusa kangangani lokho ama-Israyeli?

Umfazi womIsrayeli ibizo lakhe elinguJokobedi bekanesana elihle lomsana. Bona alivikele, walifaka ngemantjini, wayolifihla emlanjeni iNayili hlangana nemihlanga. Udadwabo lomntwana, uMiriyamu, wahlala eduze nomlambo loyo, afuna ukubona ukuthi kuzokwenzekani.

Indodakazi kaFaro yeza izokuhlamba emlanjeni, nayithi mehlo suka naku umantji. Ngaphakathi bekunomntwana alila, yeke yamrhawukela. UMiriyamu wabuza: ‘Ngingakufumanela umma ongakumunyisela umntwana?’ Indodakazi kaFaro nayivumako, uMiriyamu weza nommakhe, uJokobedi. Indodakazi kaFaro yathi kuye: ‘Thatha umntwana lo ungimunyisele yena, ngizokubhadala.’

Kwathi umntwana nakakhulakhulako, uJokobedi wambuyisela endodakazini kaFaro, owamthiya ibizo elithi Mosi begodu wamkhulisa njengendodanakhe. UMosi wakhula amntwana wekosini begodu bekafumana nanyana yini ayifunako. Kodwana uMosi azange amlibale uJehova. Bekazi ukuthi kuhlekuhle yena umIsrayeli ingasi umGibhide. Ngikho-ke akhetha ukulotjha uJehova.

Nakaneminyaka ema-40, uMosi wakhetha ukusiza abantu bekhabo. Kwathi nakabona umGibhide abetha isigqila esimIsrayeli, uMosi wabetha umGibhide loyo kabuhlungu wambulala. Wafihla isidumbeso ngehlabathi. Kuthe bona uFaro asifumane, walinga ukubulala uMosi. Kodwana uMosi wabalekela enarheni yakwaMidiyani. UJehova wamtlhogomela nakalapho.