UMosi no-Aroni baya kuFaro bayomtjela umlayezo kaZimu: ‘Nawungatjhaphululi abantu bami, ngizokwehlisela iimbawu enarheni.’ Iwomakazi leembawu lagubuzesa iGibhide yoke, kwabanjingileko nabadobha phasi. Indawo yoke beyizele iimbawu. Kodwana endaweni yeGotjheni, lapho ebekuhlala ama-Israyeli bekungekho nasinye. Kusukela esibethweni sesine nezalandelako besezithinta amaGibhide kwaphela. UFaro warabhela wathi: ‘Bawani uJehova asuse iimbawezi. Abantu bakho bangakhamba.’ Kodwana kwathi uJehova nakazisusako, uFaro watjhugulula umkhumbulo. Kghani uFaro bekazakhe afunde isifundo?

UJehova wathi: ‘Nangabe uFaro akabatjhaphululi abantu bami, iinlwana zeGibhide zizokugula bezife.’ Ngelanga elilandelako, iinlwana zathoma ukugula bezafa. Kodwana iinlwana zama-Israyeli akhenge zife. Nanyana kunjalo uFaro waqinisa ihlokwakhe, azange alalele.

Ngemva kwalokho, uJehova watjela uMosi bona abuyele kuFaro arhatjhe umlotha emoyeni. Umlotha lo waphenduka ithuli elaba phezu kweGibhide yoke. Ithuli labangela abantu neenlwana zeGibhide bona zibe namathumba abhibhidlhako. Nanyana kunjalo, uFaro wala ukutjhaphulula ama-Israyeli.

UJehova wathi uMosi abuyele kuFaro. Ambuze ukuthi: ‘Usaqinise ihloko ngokutjhaphulula abantu bami? Kusasa, kuzakuba nesinanja kiyo yoke inarha.’ Elangeni elilandelako uJehova wehlisa isinanja sikhambisana nombani nomlilo. Bekusiwuruwuru ebesingakhenge khesibe khona eGibhide. Konakala yoke imithi neentjalo kodwana ingasi zeGotjheni. UFaro wathi: ‘Bawani uJehova athulise koke lokhu! Ngemva kwalokho ningakhamba.’ Kwathi nakuthula isinanja, uFaro watjhugulula umkhumbulo.

UMosi wathi: ‘Njenganje iintethe zizokudla iintjalo eziseleko, ezingakonwa sinanja.’ Iingidigidi zeentethe zadla zaqeda woke amasimu nemithi. UFaro warabhela wathi: ‘Bawani uJehova asuse iintethezi.’ Kodwana nangemva kobana uJehova azisuse zoke iintethe, uFaro waqinisa ihloko.

UJehova wathi kuMosi: ‘Lulela isandla sakho emkayini.’ Ngemva kwalokho, kwaba mnyama. Amalanga amathathu woke, amaGibhide bekangaboni litho. Kodwana bekukhanya ngeendlini zama-Israyeli.

UFaro wathi kuMosi: ‘Wena nabantu bakho ningakhamba. Kodwana tjhiyani iinlwana zenu.’ UMosi wathi: ‘Kufuze sikhambe nazo khona sizokwenzela uZimu umhlatjelo ngazo.’ UFaro wakwata khulu. Warhuwelela wathi: ‘Suka kimapha! Nangingakubona godu ngizokubulala nya.’

UMosi wathembisa uFaro bona angekhe asaphinde eze azombona. Kodwana ngaphambi kobana akhambe, watjela uFaro wathi: ‘Phakathi kobusuku namhlanje, woke amazibulo eGibhide azokufa, ukusuka endodaneni kaFaro ukuya emadodaneni weengqila, woke azokufa.’

UJehova wathi ama-Israyeli awabe nesidlo esikhethekileko. Wathi: ‘Bulalani imvana namkha imbuzana eduna enomnyaka, nizese iingazi zayo egosenini yomnyango walapho nikhona. Kufanele nigome inyama ebaswe emlilweni, niyitjhebe ngoburotho obunganasibiliso. Kufuze nimbathe amapatlagwanenu, nilungele ukukhamba. Ebusukwinobu, ngizonitjhaphulula.’ Ungayicabanga na indlela ama-Israyeli athaba ngayo?

Phakathi nobusuku, ingilozi kaJehova yangena kiyo yoke imizi yeGibhide. Izibulo lalapho kunganatshwayo leengazi emnyango, belihlongakala. Bese kuthi ingilozi nayibona umuzi onetshwayo leengazi emnyango, ingangeni emzini loyo. Woke umndeni wamaGibhide, anjingileko nanganalitho, woke afelwa bantwana. Kodwana akukho namunye umntwana omIsrayeli owafako.

Ngitjho nendodana kaFaro, nayo yahlongakala. Kilokhu uFaro wabhalelwa kukghodlhelela. Wavele watjela uMosi no-Aroni wathi: ‘Khambani! Khambani niyokulotjha uZimenu. Thathani izimvu neembuzi zenu, nikhambe!’

Ama-Israyeli aphuma ngobusuku obunenyezi asuka eGibhide, akhamba ngokwemindeni. Bekumadoda nabafazi kunye nabantwana abazii-600 000. Godu kwaba nesiqubuthu sabantu abavela kwezinye iintjhaba esakhamba nawo bona naso siyokulotjha uJehova. Ekugcineni u-Israyeli watjhaphuluka!

Ukuze bakhumbule bona uJehova wabatjhaphulula njani, bebaba nesidlo esikhethekileko qobe mnyaka. Besibizwa ngokuthi yiPhasika.