UJesu Ufundisa Abalandeli Bakhe Ukuthandaza

Yoke into ebeyenziwa baFarisi, bebayenzela ukubukwa. Bebathi nabenza umusa ebantwini, bawenzele ukubonwa babantu. Bebathanda ukuthandaza epepeneneni benzela ukubukisa. Bebabamba nemithandazo emide ngehloko basolo bayiphindaphinda emasinagogini nemakhoneni weendlela lapho ebebazokubonwa babantu khona. Yeke abantu barareka khulu, nabezwa uJesu abatjela ukuthi: ‘Ningathandazi njengabaFarisi. Bebacabanga ukuthi bazokuthabisa uZimu ngokutjho kwabo amezwi amanengi, kanti bekungasi njalo. Umthandazo yinto ephakathi kwakho noJehova. Akukafaneli usolo ubuyelela into efanako kanengi. UJehova ufuna umtjele indlela ozizwa ngayo ehliziywenakho.’

‘Yeke kufuze nithandaze nganasi indlela: “Babethu osezulwini, igama lakho alicwengiswe. UmBuswakho awuze. Intandwakho ayenzeke nephasini njengombana yenzeka ezulwini.”’ UJesu wabatjela nokuthi bathandazele nokudla kwelanga ngalinye, ukulitjalelwa kwemitjhapho nezinye izinto ezibandakanya ipilo yomuntu.

Wabatjela nokuthi: ‘Ningathomi nilise ukuthandaza. Ragelani phambili nibawa izinto ezihle kuJehova uBaba. Woke umbelethi ufuna ukupha umntwanakhe izinto ezihle. Akhesithi indodanakho ikubawa uburotho ungayipha ilitje na? Nange ikubawa ifesi ungayipha inyoka na?’

UJesu wabahlathululela isifundo salokho wathi: ‘Nange nina nikwazi ukupha abantwabenu izipho ezihle, kangangani-ke ngoBabenu uJehova, angabhalelwa kunipha umoya ocwengileko? Into eniyitlhogako kubawa kwaphela.’ Uyasilandela na iseluleko sakaJesu? Ngiziphi izinto ovane uzithandazele?