Tjengisa Bona Uyasithokoza Isipho Esikuphila

Kunezinto ezinengi ezikarisako esingazenza begodu sizithabele ngombana siyaphila. Nanyana siqalene nemiraro kunezinto esingazithabela ekuphileni. Singatjengisa njani bona siyasithokoza isipho esikuphila? Ngiliphi ibanga eliqakatheke khulu lokwenza njalo?

1. Kubayini kufuze sithokoze ukuthi siyaphila?

Kufuze sikuthokoze ukuphila esiphiwe khona ngombana kusisipho esibuya kuBabethu onethando uJehova. “Umthombo wokuphila,” udale koke okuphilako. (IRhubo 36:9) “Unikela boke abantu ukuphila nokuphefumula nazo zoke izinto.” (IzEnzo 17:25, 28) UJehova usinikele esikutlhogako bona siphile. Ngaphezu kwalokho, wenza sikghone ukuthabela ukuphila.—Funda izEnzo 14:17.

2. Singamtjengisa njani uJehova ukuthi siyamthokoza ngesipho esikuphila?

UJehova wakutlhogomela kusukela ngesikhathi ummakho azithwala wena. UDavida wasetjenziswa nguZimu nakazakuthandaza, athi: “Amehlwakho angibone ngaphambi kobana ngibelethwe.” (IRhubo 139:16) Ukuphila kwakho kuligugu kuJehova. (Funda uMatewu 10:29-31.) Kuzomzwisa ubuhlungu nange omunye azibulala namkha abulale omunye umuntu.a (Eksodusi 20:13) Godu singamzwisa ubuhlungu uJehova nange sizifaka engozini kungatlhogeki namkha singalandeli iinqophiso zokuphepha, sifake ukuphila kwabanye engozini. Lokha nasizitlhogomelako begodu sihloniphe nokuphila kwabanye, sitjengisa ukuthi siyasithokoza isipho esikuphila.

FUNDA NGOKUNGENELELEKO

3. Tlhogomela ipilwakho

Sathembisa uJehova bona sizokuhlala senza intandwakhe, kungebangelo sisebenzisa ukuphila kwethu koke bona simlotjhe. Kuba ngasuthi sinikela imizimbethu bona ibe mhlatjelo kuZimu. Funda kwebeRoma 12:1, 2, bese nicoca ngemibuzo le:

• Khuyini okufuze ikukhuthaze bona utlhogomele ipilwakho?

• Ungakwenza njani lokho?

4. Nanyana yini oyenzako tlhogomela, khona kungeze kwaba nomuntu olimalako namkha ofako

IBhayibheli lisikhuthaza bona silise imikghwa eyingozi. Dlala IVIDIYO ubone ezinye izinto ongazenza bona uphephe.

IVIDIYO: Nanyana Yini Oyenzako Qiniseka Bona Iphephile (8:34)

Funda izAga 22:3, bese nicoca ngokuthi khuyini wena nabanye eningayenza bona niphephe . . .

• ekhaya

• emsebenzini

• nanidlalako

• nawutjhayelako namkha ukhwele isithuthi

5. Hlonipha ukuphila komntwana ongakabelethwa

UDavida wahlathulula ukuthi uJehova unendaba nakho koke okwenzeka emntwaneni ongakabelethwa. Funda iRhubo 139:13-17, bese nicoca ngombuzo lo:

• Ngendlela uJehova aqala ngayo izinto, inga-kghani ukuphila komntwana kuthoma lokha nakabelethwako namkha kusukela ummakhe nakaba sidisi?

Imithetho uJehova ayinikela ama-Israyeli beyivikela abomma abasidisi nabantwana abangakabelethwa. Funda u-Eksodusi 21:22, 23, bese nicoca ngemibuzo nasi:

• UJehova umqala njani umuntu obulala umntwana ongakabelethwa angakahlosi?

• Uzizwa njani lokha umuntu nakenza lokho ngehloso?b

• Indlela uZimu aqala ngayo indaba le ikwenza uzizwe njani?

Dlala IVIDIYO.

IVIDIYO: Hlonipha Ukuphila NjengoZimu (5:00)

Umma ohlonipha ukuphila naye angagandeleleka bona arhulule umbungu. Funda u-Isaya 41:10, bese nicoca ngemibuzo le:

• Nangabe umma ugandeleleka bona arhulule umbungu, kufuze alifumane kuphi isizo? Kubayini?

ISIRHUNYEZO

IBhayibheli lisifundisa bona sithande isipho uJehova asiphe sona esikuphila, sisihloniphe besisivikele. Lokhu kuhlanganisa ukuphila kwethu nekwabanye.

Buyekeza

• Kubayini ukuphila kwabantu kuqakathekile kuJehova?

• UJehova uzizwa njani ngomuntu obulala omunye ngehloso?

• Khuyini okuthandako ngesipho esikuphila?

HLOLA OKUNGENZASI

Singamthokoza njani uJehova ngesipho esikuphila asiphe sona?

Ingoma 141—Ipilo Iyikarisomraro (2:41)

Fumana ipendulo yombuzo lo, Inga-kghani uZimu uzomlibalela umma orhulule umbungu?

“Lithini IBhayibheli Ngokurhulula Umbungu?” (Isihloko esiku-jw.org)

Kuthiwani nange umuntu afuna ukuzibulala? Funda ngokuthi iBhayibheli lingamsiza njani?

“Ngifuna Ukufa, iBhayibheli Lingangisiza Njani Nangifikelwa Micabango Yokuzibulala?” (Isihloko esiku-jw.org)