Lithini IBhayibheli Ngokutjhada Nokungatjhadi?

Kwamanye amasiko abantu bakholelwa ukuthi umuntu angeze athabe ngaphandle kokuthi atjhade. Nanyana kunjalo, akusuye woke umuntu otjhadileko othabileko begodu akusiwo woke umuntu ongakatjhadi ongakathabi. IBhayibheli lithi kokubili ukutjhada nokungatjhadi zizipho ezivela kuJehova.

1. Kuzuzisa ngani ukungatjhadi?

IBhayibheli lithi: “Nanyana ngubani otjhadako wenza kuhle, kodwana nanyana ngubani ongatjhadiko uzokwenza ngcono.” (Funda yoku-1 kwebeKorinte 7:32, 33, 38.) Umuntu ongakatjhadi “uzokwenza ngcono” njani? AmaKrestu angakatjhadi akutlhogeki atshwenyeke ngokutlhogomela umlinganawo. Yeke athabela itjhaphuluko enengi. Ngokwesibonelo, abanye bakghona ukwenzela uJehova izinto ezinengi, benza izinto ezibathabisako njengokuya kwenye inarha bona bayokutjhumayela iindaba ezimnandi. Ngaphezu kwalokho, baba nesikhathi esinengi sokutjhidelana noJehova.

2. Ngiziphi iinzuzo zokutjhada ngokomthetho?

Ukutjhada kuneenzuzo ezihlukileko. IBhayibheli lithi “Ababili bangcono kunoyedwa.” (UMtjhumayeli 4:9) Lokhu kuliqiniso kumaKrestu asebenzisa iinkambisolawulo zeBhayibheli emtjhadwenawo. Abantu abatjhade ngokomthetho benza isifungo sokuthandana, sokuhloniphana nesokwazisana. Lokho kubenza bazizwe bavikele ukudlula abantu abahlala ndawonye bangakatjhadi. Umtjhado wenza isisekelo esivikelekileko sokukhulisa abantwana.

3. UJehova uthini ngomtjhado?

UJehova nakathomisa umtjhado wokuthoma wathi: “Indoda izokutjhiya uyise nonina inamathele kumkayo.” (Genesisi 2:24) UJehova ufuna bona indoda nomkayo bathandane begodu bahlale ndawonye nabasaphilako. Uvumela ukutlhala kwaphela nange omunye afebile. Ebujamwenobo, uJehova uvumela umlingani onganamlandu bona azikhethele ukuthi ufuna ukutlhala na.a (Matewu 19:9) UJehova akasifuni isithembu emaKrestwini.—1 Thimothi 3:2.

FUNDA NGOKUNGENELELEKO

4. Sisebenzise kuhle isipho sokungatjhadi

UJesu waqala ukungatjhadi njengesipho. (Matewu 19:11, 12) Funda uMatewu 4:23, bese nicoca ngombuzo lo:

• UJesu wasisebenzisa njani isipho sokungatjhadi bona alotjhe uBabakhe begodu asize nabanye?

AmaKrestu angakatjhadi angathaba ngokusebenzisa isipho sawo sokungatjhadi. Dlala IVIDIYO, bese nicoca ngombuzo olandelako.

IVIDIYO: AmaKrestu Angakatjhadi Athembekileko (3:11)

• AmaKrestu angasisebenzisa njani isipho sawo sokungatjhadi?

Kghani bewazi?

IBhayibheli ayibeki bona umuntu kufuze atjhade nakanangakhi. Nanyana kunjalo, ikhuthaza bona umuntu alinde bekube kulapho “sekadlule iminyaka yobutjha,” isikhathi lapho iinkanuko zamabhayi zingamenza bona angenzi iinqunto ezihle.—1 Korinte 7:36.

5. Khetha kuhle umlingani womtjhado

Ukukhetha umlingani womtjhado, siqunto esiqakatheke khulu ongasenza. Funda uMatewu 19:4-6, 9, bese nicoca ngombuzo lo:

• Kubayini umKrestu kungakafuzi agijimele ukutjhada?

IBhayibheli lingakusiza wazi bona khuyini okufuze uyiqale emlinganini womtjhado. Into eqakatheke khulu kuqala umlingani womtjhado othanda uJehova.b Funda yoku-1 kwebeKorinte 7:39 neyesi-2 kwebeKorinte 6:14. Bese nicoca ngemibuzo le:

• Kubayini kufuze sitjhade umKrestu esikholwa naye kwaphela?

• Ucabanga bona uJehova uzozizwa njani nasitjhada nomuntu ongamthandiko?

6. Qala umtjhado njengoJehova

Kuma-Israyeli wekadeni, amanye amadoda bewatlhala abafazi bawo ngebanga lokubamarhamaru. Funda uMalaki 2:13, 14, 16, bese nicoca ngombuzo lo:

• Kubayini uJehova ahloya ukutlhala okungakhambelani nemitlolo?

Dlala IVIDIYO, bese nicoca ngombuzo olandelako.

IVIDIYO: Umtjhado—Isibopho Esingapheliko (4:30)

• Nange utjhade nomuntu ongakholwako, khuyini ongayenza bona umtjhadwakho uphumelele?

7. Phila ngokuvumelana neenkambiso zakaJehova zomtjhado

IVIDIYO: Ungaphila Ngeenkambiso ZakaJehova Zomtjhado (4:14)

Funda amaHebheru 13:4, bese nicoca ngemibuzo le:

• Ucabanga bona iinkambiso zakaJehova ngomtjhado ziyasebenza? Kubayini?

UJehova ulindele bona amaKrestu atjhade ngokomthetho begodu atlhale ngokomthetho, njengombana lokho kufunwa borhulumende eenarheni ezinengi. Funda uTitosi 3:1, bese nicoca ngombuzo lo:

• Nangabe utjhadile, uyaqiniseka na bona umtjhadwakho ungokomthetho?

ISIRHUNYEZO

Ukutjhada nokungatjhadi, zizipho ezivela kuJehova. Abantu abatjhadileko nabangakatjhadi bangathaba begodu baneliseke nabaphila ngokuvumelana nentando kaJehova.

Buyekeza

• Umuntu angasisebenzisa njani isipho sakhe sokungatjhadi?

• Kubayini iBhayibheli lithi kufuze utjhade nomKrestu okunye naye?

• IBhayibheli lithi ngiliphi ibanga elingokomtlolo lokutlhala?

HLOLA OKUNGENZASI

Bukela amavidiyo amabili azokusiza wenze iinqunto ezihle malungana nokuthandana nokutjhada.

Ukulungiselela Umtjhado (11:53)

Funda ukuthi kubayini omunye umfowethu acabanga bona lokho uJehova amuphe khona kudlula lokho akudelileko.

Bengithemba Bona Uzokufunda Iqiniso (1:56)

Ngiziphi izinto umuntu okufuze acabange ngazo ngaphambi kokuqunta ukutlhala namkha ukuhlala ngokuhlukana?

“Hlonipha ‘Lokho UZimu Akuhlanganisileko’” (IsiThala, Disemba 15, 2018)