Indlela Ipi Nenturhu Ezizokuphela Ngayo

UZIMU UZOKUPHELISA ABORHULUMENDE BABANTU

UZimu uzokuphelisa aborhulumende babantu epini iBhayibheli eliyibiza ngokuthi yi-Arimagedoni.a (IsAmbulo 16:16) Ngesikhatheso, ‘amakhosi wephasi loke’ azokubuthana ndawonye “epini yelanga elikhulu lakaZimu uMninimandla Woke.” (IsAmbulo 16:14) I-Arimagedoni yipi kaZimu ezokuqeda zoke izipi.

UZimu uzokujamiselela aborhulumende babantu ngomBuswakhe namkha urhulumendakhe ozokubusa usezulwini begodu ongekhe utjhatjalaliswe. (Danyela 2:44) UZimu ukhethe iNdodanakhe uJesu Krestu bona ibe yiKosi yomBuso lo. (Isaya 9:​6, 7; Matewu 28:18) Urhulumende lo mBusob uJesu afundisa abalandeli bakhe ngawo bona bawuthandazele. (Matewu 6:​9, 10) Boke abantu bazokubumbana ngaphasi korhulumende munye, uJesu oyiKosawo.

Ngokungafani nababusi babantu, uJesu angekhe asebenzise igunya lakhe ukuzizuzisa yena. Ngebanga lokuthi unobulungiswa begodu akakhethi, akunamuntu ozokutshwenyeka ngokuthi akatjhejwa ngebanga lobuhlanga namkha lapha avela khona. (Isaya 11:​3, 4) Abantu angekhe kutlhogeke balwele amalungelwabo namkha ukuphathwa kuhle Kubayini? Ngombana uJesu uzokwanelisa ihlalakuhle yomuntu ngamunye. “Uzokuhlangula abatlhagako abalilela isizo, kunye nabangasililitho nananyana ngubani onganamsizi. . . . Uzobahlangula ekugandelelweni nenturhwini.”—IRhubo 72:​12-14.

UmBuso kaZimu uzokuphelisa iinkhali ephasini. (Mikha 4:3) Uzokususa nabantu abambi abangafuni ukulisa ukulwa nalabo abaphazamisa ukuthula kwabanye. (IRhubo 37:​9, 10) Woke umuntu, kungaba yindoda, umfazi namkha umntwana uzozizwa avikelekile nanyana kukuphi lapha aya khona ephasini.—Hezekiyeli 34:28.

UmBuso kaZimu nasele ubusa iphasi, woke umuntu uzokuthabela ukuphila okumnandi. Uzokuqeda imiraro ebangela ukuthi abantu balwe njengokutlhaga, indlala nokungabi neendawo zokuhlala. Woke umuntu uzokuba nokudla okwaneleko nokunepilo begodu uzokuthabela ukuba nendawo ehle nefuthumeleko.—IRhubo 72:16; Isaya 65:​21-23.

UmBuso kaZimu uzokuqeda boke ubuhlungu obubangelwe yipi. Lokhu akuhlanganisi kwaphela ukulimala emzimbeni kodwana kuhlanganisa nokulimala emkhumbulweni nokwamazizo abantu abaqalana nakho ngebanga lezinto ezimbi ezenzeke epini. Kuzokuvuswa ngitjho nalabo abahlongakeleko babuye baphile. (Isaya 25:8; 26:19; 35:​5, 6) Imindeni izokubumbana godu nezinto ezimbi ezenzekako angekhe zisakhunjulwa zizokuba yingcenye ‘yezinto zaphambilini ezidlulileko.’—IsAmbulo 21:4.

UZIMU UZOKUQEDA ISONO

UmBuso kaZimu uzokwenza abantu babumbane balotjhe kwaphela uZimu weqiniso uJehovac, “uZimu wethando nokuthula.” (2 Korinte 13:11) Abantu bazokufunda ukuhlala ndawonye ngokuthula. (Isaya 2:​3, 4; 11:9) Boke abasebenzisa abakufundako bazokutjhatjhululwa emiphumeleni yesono.—Roma 8:​20, 21.

UZIMU UZOKUSUSA USATHANA NAMADIMONAKHE

UmBuso kaZimu uzokuqeda abahlohlozela ipi, uSathana namadimonakhe. (IsAmbulo 20:​1-3, 10) Nabangasekho, “ukuthula kuzokuba kukhulu.”—IRhubo 72:7.

Ungaqiniseka ukuthi isithembiso sakaZimu sokuqeda ipi nenturhu sizokwenzeka. Unamandla nesifiso sokuqeda ipi.

• UZimu unokuhlakanipha namandla atlhogekako ukuqeda ipi nenturhu. (Jobho 9:4) Akunalitho angabhalelwa ukuyenza.—Jobho 42:2.

• UZimu uyakuhloya ukubona abantu batlhaga. (Isaya 63:9) Godu “uyamhloya umuntu othanda inturhu.”— IRhubo 11:5.

• UZimu uhlala akwenza akuthembisileko; akawaleyi amala.—Isaya 55:​10, 11; Titosi 1:2.