MAVUTO AMULI ICHI CHALO

4 | Mukoteteza chiyembekezo chanu

CHIFUKWA CHAKE NIVOFUNIKA

Nkhaŵa zamene zuwela chifukwa cha mavuto amuli ichi chalo zingakhuze ŵanthu m’njila zosiyana-siyana. Ŵanthu anyinji amene okhuziwa na mavuto amene aŵa, onkhala aliye chiyembekezo ndipo olaŵila kuti vinthu vingachinjelini. Lomba kansi ochita votyani?

Ayakine ofunalini olo patontho kuganizila vakusogolo.
Ayakine akumwa walwa komasoti kukatishila ntchito mankhwala osokoneza tomfwe kuti aluŵeko mavuto.
Ayakine owona kuti vingankhale luweme kungokufwa ndipo okonsha kuti “Kansi moyo uli na phindu yanji?”

Vamufunikila kuziŵa

Mavuto ayakine ŵamukumana nawo angankhale akanthawe ndipo angasile nthawe iliyonse.
Olo vingankhale kuti mavuto ŵamukumana nawo angasile lini, pali vinthu viyakine vamungachite kuti mupilile.
Baibolo yutipasa chiyembekezo chodalilika—yunena kuti mavuto onse ŵatukumana nawo palipano azasile.

Vamungachite palipano

Baibolo yunena kuti: “Osati mukodela nkhaŵa za mailo chifukwa mailo yamene iyo izankhelesoti navodesa nkhaŵa vake. Mavuto a nsiku iliyonse niwokwanila pansiku yamene iyo.”—Mateyo 6:34.

Mukosilisha nkhaŵa za nsiku iliyonse payeka. Osati mukodela nkhaŵa vamailo mpaka kufwika pokangiwa kuchita vinthu vofunika valelo.

Kudela nkhaŵa vinthu viipa vamene vuwoneka monga kuti vingachitike, kungangokuyangijilani nkhaŵa ndipo kungakuchitisheni kuyamba kukaikila kuti mavuto kusogolo uku azasile.

KANSI MUNGACHITE TYANI KUTI MUPILILE?—Mfundo zamene zingakuyavyeni

MUKOGANIZILA VINTHU VIWEME

Baibolo yunena kuti: “Masiku wonse a munthu wokumana na mavuto onkhala aipa. Koma munthu wamene ali na ntima wosangalala ochita phwando nthawe zonse.” (Miyambo 15:15) Keno munkhalila kuganizila vinthu viipa mungakwanishe lini kufwana njila yosilijila mavuto ŵanu. Koma kuganizila vinthu viweme kungakuyavyeni kuti mufwane njila yosilijila mavuto ŵamukumana nawo.

Osati mukonkhalila kumvwishila olo kulolela nkhani.
Nsiku iliyonse ikosila mukolemba vinthu viŵili olo vitatu vamungatembeje.
Mukolemba ndandanda ya vinthu vamufuna kuchita nsiku yamene iyo. Keno muli na mapulani ya vinthu vikulu-vikulu mukovigaŵa kuti vinkhale vitontho-vitontho na cholinga chakuti mukokwanisha kuwona vamwakwanishako kale kuchita kusila kwa nsiku iliyonse.

MUKOLOLA KUTI AYAKINE AKOKUYAVYANI

Baibolo yunena kuti: “Wolipatula. . . ochita vosiyana na nzelu zonse zopindulisha.” (Miyambo 18:1) Pamweka mungakwanishe lini kufuma mu chisengu chonoka, koma keno munthu muyakine angakuyavyeni mungakwanishe.

Mukosenga ayanu olo mkwanu kuti akuyavyeni.
Mukofwana njila zamungayavyile ŵanthu ayakine. Kuyavya ŵanthu ayakine kungakuchitisheni kuti mukowona mavuto ŵanu moyenelela.
Keno muwona kuti mavuto azasile lini ndipo muwona soti kuti moyo ni wosafunika niye kuti mufunika kuyawonana na dokota. Nthawe ziyakine kunkhala na nkhaŵa ngako ni chizindikilo chakuti muli lini bwino ndipo mwina mulwala matenda ovutika maganizo. Ŵanthu anyinji oyavyiwa akaluta ku chipatala.a

a Magazini ya Ukani! Yusankhila lini ŵanthu thandizo ya mankhwala.

Baibolo yupeleka chiyembekezo chodalilika

Wolemba masalimo muyakine epemphela kwa Mulungu kuti: “Mawu ŵanu ni laiti yosanikila mendo ŵangu, na kuŵala kosanikila njila yangu.” (Salimo 119:105) Kansi Baibolo yamene ni—mawu a Mulungu—yuchita tyani vamene ivi?

Tikoyende usiku, laiti yutiyavya kuwona patingakande. Molingana na laiti, m’Baibolo muli malangizo anzelu amene angatiyavye tikopanga vosankha vovuta.

Kungweleŵela kutiyavya kuti tikowona kwatikuya. Molingana na vamene ivi Baibolo yutiyavya kuziŵa vinthu vikuti vichitike kusogolo.

Baibolo ni buku yopatulika yamene yufotokoza mweuyambila moyo wa ŵanthu. Yufotokozasoti zachiyembekezo chodalilika cha vinthu vikuti vichitike kusogolo. Yufotokoza kuti:

Mwamene

Mweyayambila mavuto: Baibolo yunena kuti “Uchimo weloŵa m’chalo kupitila muli munthu mmozi, ndipo uchimo wamnene uyo weleta imfwa. Tetyo imfwa yamene iyo ifalikila kuli ŵanthu wonse chifukwa onse echimwa.”—Aloma 5:12.

Chifukwa

Chifukwa chake ulamulilo wa ŵanthu wakangiwa kusilisha mavuto ŵasu: Baibolo yunena kuti “munthu wofumila kulito aliye ulamulilo wosankha yeka njila ya moyo wake.” (Yeremiya 10:23) Umboni wa vamene ivi nikuwona mwakupakila mavuto muli ichi chalo.

Vamene

Vati azachite Mulungu kuti awamye ichi chalo: Baibolo yunena kuti “yove azapukute misozi yonse mmenso mwawo, ndipo pazankhalelini soti imfwa. Pazankhalelini kulila, olo kumimila, olo kumvwa kuŵaŵa.” —Chivumbuluso 21:4.