Kansi pa Webusaiti yasu tingafwanepo chinji?

Yesu Khilisitu ewuja ophunzila ŵake kuti: “Oneshani kungweleŵela kwanu pamenso pa ŵanthu, kuti awone ntchito zanu ziweme na kuti alemekeze Atata ŵanu ŵakululu.” (Mateyu 5:16) Kuti tichite vamene ivi, tuseŵenzesha vinthu vamakono, kuyangijilapo Intaneti. Webusaiti ya jw.org niye adilesi yasu yovomelejeka ya pa Intaneti, yamene ili na nkhani zokhuza vikhulupililo va Mboni za Yehova na ntchito yawo. Kansi tingafwanepo chinji?

Mayankho a m’Baibolo ŵakukonsha ŵanthu anyinji. Mungafwane mayankho a makonsho ofunika ngako yakukonsha ŵanthu. Mwachisanzo, kapepala ka uthenga kakuti Kansi matamano azasile? na kakuti Kansi akufwa azauke? tupezeka pa Intaneti m’vilaŵilo vopitilila pa 600. Mungafwanesoti Baibulo la Dziko Latsopano m’vilaŵilo vupitilila pa 130 na mabuku ayakine oyavya kumvwishisha Baibolo, kuyangijilapo buku yakuti Zimene Baibulo Limaphunzitsa komasoti magazini anyowani a Nsanja ya Olonda na Galamukani! Mungaŵelenge olo kumvwishila vofalisa vamene ivi pa Intaneti olo kuvitola mumpangidwe wa MP3, PDF olo EPUB. Mungapulinte olo mapedji oŵelengeka kuti mupase munthu wachidwi m’chilaŵilo chake. Palisoti mavidiyo a vofalisa m’vilaŵilo va manja vosiyana-siyana. Mungatole masewelo a m’Baibolo a mawu tyala, masewelo ayakine a m’Baibolo na nyimbo zosangalasa zomvwishila pa nthawi iliyonse yamufuna.

Nkhani zachendi zokhuza Mboni za Yehova. Pa webusaiti yamene iyi oikaposoti nkhani zanyowani na mavidiyo owonesha mwayuyendela ntchito yasu pachalo chonse, vinthu vuchitikila Mboni za Yehova na ntchito yasu yopeleka thandizo pakachitika soka. Mungapezesoti chiziŵiso chokhuza misonkhano iti ichitike kusogolo na ma adilesi ya maofesi a nthambi.

Mwa kukatishila ntchito njila zamene izi, tuwosha kungweleŵela kwa chendi cha m’Baibolo ku madela akutali pachalo chonse. Ŵanthu a m’madela osiyana-siyana, kuyangijilapo a ku Antarctica, opindula. Pemphelo yasu ni yakuti “mawu a Yehova apitilije kufalikila mofulumila” pachalo chonse kuti Mulungu alemekezeke.​—2 Atesalonika 3:1.

• Kansi webusaiti ya jw.org yuyavya tyani ŵanthu anyinji kuphunzila Baibolo?

• Kansi muli na nkhani iliyonse yamufuna kuwona pa webusaiti?