Ndaŵa yanji muwamila kupitilija kuphunzila za Yehova?

1. Kansi mungapindule tyani keno mupitilija kuphunzila Baibolo?

Mosakaikisha, viphunziso voyambilila va Baibolo vamwaphunzila vatang’isha chikondi chanu kwa Mulungu. Komalomba muwamila kupitilija kuchita vinthu vingakuyavyeni kukulisha chikondi chanu. (1 Petulo 2:2) Kuti muzafwane umi wosasila zudalila kuti mupitilije kuphunzila malizu ŵake.—Ŵelengani Yohane 17:3; Yuda 21.

Mukamuziŵa luweme Mulungu, chichetekelo chanu chiŵe chotang’a, soti chikuyavyeni kumutemwesha Mulungu. (Aheberi 11:1, 6) Komasoti chichetekelo chanu chikuyavyeni kulapa na kuchinja umi wanu.—Ŵelengani Machitidwe 3:19.

2. Kansi mungayavye tyani ŵanthu ayakine mukamuziŵa luweme Mulungu?

Mwanthawe zonse, mufune kuujako ayanu vamwaphunzila, chikomo chakuti tonse tutemwa kuujako ayasu uthenga uweme. Mukapitilija kuphunzila Baibolo muzaziŵe mwamungayikatishile ntchito pofotokozela ayanu vamukhulupilila polaŵila za Yehova komasoti polaŵila za uthenga uweme.—Ŵelengani Aroma 10:13-15.

Ŵanthu anyinji poyamba kuujako ayawo uthenga uweme, otatika mwa kuujako a m’banja mwao olo ayawo. Koma mukochita vamene ivi mochenjela. M’malo moŵauja kuti chipembezo chawo n’chawenye, aujeni vechipanga Mulungu. Komasoti, tikokumbuka kuti nthawe zinyinji ŵanthu ochita chidwi na mankhalidwe ŵasu kuposha vatulaŵila.—Ŵelengani 2 Timoteyo 2:24, 25.

3. Kansi mungaŵe pa ushamwali wotyani na Mulungu?

Kuphunzila malizu ŵa Mulungu kungakuyavyeni kukula mwauzimu. M’kupita kwa nthawe mungaŵe pa ushamwali uweme ngako na Yehova, komasoti munkhale mu umba yake yamene ni banja yokatijana.—Ŵelengani 2 Akorinto 6:18.

4. Kansi mungachite tyani kuti mupitilije kukula mwauzimu?

Mungakule mwauzimu mukapitilija kuphunzila za Mulungu. (Aheberi 5:13, 14) Sengani wa Mboni za Yehova kuti akuyavyeni kuphunzila Baibolo, pokatishila ntchito buku ya Zimene Baibulo Limaphunzitsa. Mukaphunzila vinyinji m’malizu ŵa Mulungu, muŵe na umi uweme komasoti wopindulisha.—Ŵelengani Salimo 1:1-3; 73:27, 28.

Uthenga uweme ufumila kwa Yehova Mulungu wa chinthemwa. Mungavwendele pafupi na Mulungu povwendela kuli ŵanthu ŵake. (Aheberi 10:24, 25) Keno mupitilije kumutemwesha Yehova, mukafwane umi wosasila. Kuvwendela kuli Mulungu niye chinthu chiweme ngako chamungachite.—Ŵelengani 1 Timoteyo 1:11; 6:19.