NKHANI YOPHUNZILA N.° 15
NYIMBO N.° 30 Atata ŵangu, Mulungu wangu, shamwali wangu
“Kuvwendela kwa Mulungu ni chinthu chiweme” kuli sewo!
“Koma kuli newo, kuvwendela kwa Mulungu ni chinthu chofunika ngako.”—SAL. 73:28.
CHOLINGA CHA NKHANI INO
Munkhani ino, tiwone vatingachite kuti tivwendele ngako kwa Yehova komasoti madaliso ŵatingafwane.
1-2. (a) Kansi n’chinji chatufunikila kuchita kuti tinkhale paushamwali uweme na munthu muyakine? (b) Kansi tiphunzile chinji munkhani ino?
KANSI mwewo muli na muyanu wapantima? Kansi n’chinji chekuyavyani kuti mutang’ishe ushamwali wanu na yove? N’vowonekelatu kuti mwenzepatula nthawe kuti mutandale naye, mweziŵa mavuto ŵawakumana nawo pamoyo wake, komasoti mweziŵa vinthu vakukonda na vakuzondana navo. Mweziŵasoti minkhalidwe yake iweme yamene yekukopani kuti mukomukonkheja. Vamene ivi vekuyavyani kuti mukomukonda.
2 Kuti munkhale paushamwali uweme na munthu muyakine pofunikila nthawe komasoti khama. N’chimozi-mozisoti keno tufuna kunkhala paushamwali na Yehova Mulungu. Tufunika kupatula nthawe kuti timuziŵe luweme komasoti kumukonda ngako. Munkhani ino, tikambilane vatingachite kuti tivwendele ngako kwa Yehova komasoti madaliso ŵatingafwane. Koma poyamba, tiyeni tikambilane vokhuza kuwama kovwendela kwa Yehova wamene ni shamwali wasu muweme ngako.
3. Ndaŵa yanji tufunikila kuganizila vokhuza mapindu ŵatufwana tikavwendela kwa Yehova? Pelekani chisanzo.
3 N’vosakaikisha kuti mwewo muvomekeja kuti kuvwendela kwa Yehova ni chinthu chiweme. Koma kuganizila ngako vokhuza kuwama kwake niye kungatipase mphamvu kuti tipitilije kuvwendela ngako kuli yove. (Sal. 63:6-8) Mwachisanzo, tuziŵa kuti kulya vakulya vopasa thanzi, kuchita masoŵela otang’isha muŵili, kupumula mokwanila, komasoti kumwa manzi okwanila n’koyavya ngako. Koma olo n’tetyo, ŵanthu anyinji oganizilalini ngako vokhuza kuwama kwa vinthu vamene ivi, ndipo owaya-waya kusamalila thanzi yawo. Koma keno tuganizila pafupi-pafupi vokhuza mwatupindulila keno tusamalila thanzi yasu, vingativutelini kuti tipitilije kuisamalila. Molingana na vamene ivi, kuziŵa tyala kuti kuvwendela kwa Yehova ni kuweme n’kosakwanila, koma tufunikilasoti kuganizila mapindu ŵake. Vamene ivi vingatiyavye kuti tipitilije kuvwendela ngako kuli Shamwali wasu wamene uyu.—Sal. 119:27-30.
4. Kansi munthu elemba Salimo 73:28, enena kuti tyani?
4 Ŵelengani Salimo 73:28. Munthu elemba Salimo 73 enze Mulevi wamene esankhiwa kuti akoimba nyimbo pa kachisi wa Yehova. Payakine yove enze etumikila Yehova mokhulupilika kwa vyaka vinyinji. Koma olo n’tetyo, yove enzewona kuti n’kofunika kulikumbusha yeka komasoti ŵanthu ayakine kuti “kuvwendela kwa Mulungu” chenze chinthu chofunika ngako kuli yove komasoti kuli ayake. Kansi pali mapindu otyani ochitila vamene ivi?
“KUVWENDELA KWA MULUNGU” KULETA CHISANGALALO
5. (a) Ndaŵa yanji kuvwendela kwa Yehova kutiyavya kunkhala osangalala? (b) Kansi nzelu zakupeleka Yehova zingakuyavyeni tyani pa moyo wanu komasoti kukutetezani? (Miyambo 2:6-16)
5 Tikavwendela ngako kwa Yehova, tunkhalasoti osangalala ngako. (Sal. 65:4) Mfundo yamene iyi niyachendi ndipo pali vifukwa vinyinji. Chifukwa chimozi n’chakuti tupindula ngako keno tukonkheja mfundo zanzelu zupezeka m’Baibolo yamene ni Mawu a Mulungu. Nzelu zamene izi zutiteteza ku minkhalidwe iipa komasoti ku machimo akulu-akulu. (Ŵelengani Miyambo 2:6-16.) N’chifukwa chake Baibolo yunena kuti: “Wosangalala ni munthu wamene ofwana nzelu, komasoti munthu wamene ophunzila vinthu vamene vingamuyavye kunkhala wozindikila.”—Miy. 3:13.
6. Kansi n’chinji chechitisha kuti wamasalimo aleke kunkhala wosangalala?
6 N’chendi kuti olo azishamwali a Yehova okumana na vinthu vokhumudwisa nthawe ziyakine. Munthu elemba Salimo 73, enze eleka kusangalala chifukwa chakuti enzeganizila vinthu vofokesha. Yove ekhumudwa komasoti enzechitila djelasi ŵanthu aipa amene enzetumikilalini Mulungu, chifukwa enzewona kuti vinthu vuŵayendela luweme. Yove eyamba kuganiza mophoniyeka kuti ŵanthu achiwawa komasoti olikuja niye olemela ngako, onkhala na thanzi iweme komasoti otamanalini nthawe zonse. (Sal. 73:3-7, 12) Wamasalimo eyamba kuvutika ngako muntima mwake, ndipo eyamba kuwona kuti khama yenzechita potumikila Yehova yenzeve pindu iliyonse. Yove elaŵila mokhumudwa kuti: “Shuwa, natuŵisha ntima wangu paliye pindu, ndipo nasamba mmanja mwangu paliye pindu powonesha kuti nine wosaphoniya.”—Sal. 73:13.
7. Kansi n’chinji chatingachite tikakhumudwa? (Onani soti chithunzi .)
7 Olo kuti wamasalimo wamene uyo enze ekhumudwa ngako, echitapo kanthu kuti achinje maganizo ŵake. Yove eluta ‘kuyaloŵa mmalo opatulika aulemelelo a Mulungu,’ ndipo kwamene uko Yehova emuyavya kuti achinje maganizo ŵake aipa. (Sal. 73:17-19) Yehova wamene ni Shamwali wasu muweme ngako, oziŵa sewo tikakhumudwa. Tikamusenga kuti atisogolele nokonkheja vakutiuja kupitila m’Mawu ŵake komasoti mumpingo, tizafwane mphamvu zamene zingatiyavye kupilila tikakhumudwa. Olo tikasokonezeka maganizo chifukwa cha nkhaŵa, Yehova otitonthoja notiyavya kuti ntima wasu unkhale pansi.—Sal. 94:19.a
Mulevi elemba Salimo 73, ali pulu “m’malo opatulika aulemelelo a Mulungu” (Onani ndime 7.)
“KUVWENDELA KWA MULUNGU” KUNGATIYAVYE KUNKHALA NA MOYO UWEME PALI PANO NDIPO KUTIPASA CHIYEMBEKEZO
8. Kansi kuvwendela kwa Mulungu kungatiyavyesoti munjila zotyani zofunika ngako?
8 Kuvwendela kwa Mulungu n’kuwemesoti munjila ziŵili ziyakine zamene ni zofunika ngako. Njila yoyamba, kutiyavya kunkhala na moyo watanthauzo. Njila yachiŵili, kutang’isha chiyembekezo chasu chakusogolo. (Yer. 29:11) Tiyeni tikambilane momvwika luweme vokhuza njila zamene izi.
9. Kansi kuvwendela kwa Mulungu kutiyavya tyani kunkhala osangalala?
9 Kuvwendela kwa Yehova kuyayva kuti moyo wasu unkhale watanthauzo. Masiku ŵano, ŵanthu anyinji amene okana kuti kuli Mulungu, oganiza kuti moyo uliye tanthauzo iliyonse ndipo kusogolo ŵanthu azasile pano pachalo. Koma mfundo zatuphunzila m’Mawu a Mulungu zutisimikijila kuti Mulungu “aliko chendi ndipo opeleka mphoto kuli ŵanthu amene omusakila-sakila na ntima wonse.” (Ahe. 11:6) Olo palipano, sewo tili na moyo wosangalala ngako chifukwa chakuti tuchita vinthu vechitilengela Mulungu kuti tikochita—vamene ni kutumikila Atata ŵasu akululu, Yehova.—Deut. 10:12, 13.
10. Kansi Yehova oŵalonjeza chinji ŵanthu amene omudalila? (Salimo 37:29)
10 Ŵanthu anyinji aliye chiyembekezo ngacho-ngacho chakusogolo. Ove chakuziŵa ni kukata ntchito, kulungula, kuvyala ŵana nokonzekela nthawe yauchikulile yamene angakwanishelinisoti kukata ntchito. Ove oziŵalini vinthu viweme vakulonjeza Mulungu kusogolo. Koma mosiyana na ove, sewo tuziŵa kuti Yehova osamalila atumiki ŵake. (Sal. 25:3-5; 1 Tim. 6:17) Sewo tukhulupilila Mulungu wamene ni shamwali wasu. Komasoti tukaikilalini kuti azakwanilishe vinthu vakutilonjeza. Pali vinthu vinyinji ngako viweme vatuyembekezela kusogolo, ngako-ngako mwayi wolambila Mulungu kosasila m’Paladaiso.—Ŵelengani Salimo 37:29.
11. Kansi n’chinji chuchitika tikankhala paushamwali na Mulungu, ndipo tingachite tyani kuti tikomukondwelesha?
11 Kuvwendela kwa Mulungu ni chinthu chiweme kuli sewo munjila ziyakinesoti zinyinji. Mwachisanzo, Yehova olonjeza azishamwali ŵake kuti akoŵakhululukila machimo ŵawo akalapa. (Yes. 1:18) Chifukwa cha vamene ivi, tupitilijalini kuliimba mulandu chifukwa cha machimo ŵetichita kuvuli. (Sal. 32:1-5) Komasoti tili na mwayi wochita vinthu vakukondwela navo Yehova. (Miy. 23:15) Tukaikilalini kuti pali madaliso ayakine ŵamungaganizileko mwewo ŵatufwana chifukwa chakuti tili paushamwali uweme na Mulungu. Koma, kansi mungachite tyani kuti mupitilije kuvwendela kwa Mulungu?
VAMUNGACHITE KUTI MUPITILIJE “KUVWENDELA KWA MULUNGU”
12. Kansi mwechita vinthu votyani kuti muvwendele kwa Mulungu?
12 Keno mwewo nimwe Nkhilisitu wobatizika, niye kuti mwachita kale mbali ikulu kuti muvwendele kwa Yehova. Muziŵa mfundo zinyinji za chonadi chokhuza Yehova Mulungu komasoti Yesu Khilisitu, mwilapa machimo ŵanu, mumukhulupilila ngako Mulungu, komasoti muyeja-yeja kuchita vinthu mokatijana na chifunilo chake. Koma olo n’tetyo, kuti tivwendele ngako kwa Mulungu tufunika kupitilija kuchita vamene ivi.—Akol. 2:6.
13. Kansi nivinthu vitatu votyani vamene vingatiyavye kuti tipitilije kuvwendela kwa Yehova?
13 Kansi n’chinji chingatiyavye kuti tipitilije kuvwendela kwa Yehova? (1) Tufunika kupitilija kuŵelenga komasoti kuphunzila Baibolo. Keno tuphunzila Baibolo tufunikalini tyala kukhutila na mfundo zitontho-zitontho, koma tikophunzilasoti mfundo zikulu-zikulu zokhuza Mulungu. Tikoyeja-yeja kumvwisha luweme vakufuna Yehova kuli sewo nolola kuti mfundo zili m’Mawu ŵake zikotisogolela. (Aife. 5:15-17) (2) Tikotang’isha chikhulipililo chasu poganizila maumboni anyinji amene owonesha kuti Mulungu otikonda. (3) Tufunika kupitilija kuzondana na vinthu vasakondwela navo Yehova komasoti kupewa kutandala na ŵanthu amene ochita vinthu vamene ivo.—Masal. 1:1; 101:3.
14. Mokatijana na 1 Akolinto 10:31, kansi nivinthu votyani vatingachite kuti tikokondwelesha Yehova pamoyo wasu wansiku na nsiku? (Onanisoti vithunzi.)
14 Ŵelengani 1 Akolinto 10:31. Tufunika kuyeja-yeja mwakhama kuti tikochita vinthu vakukondwela navo Yehova. Kuchita vamene ivi kutanthauza vinyinji, osati tyala kulalikila komasoti kupezeka pa misonkhano. Vinthu viweme vakukondwela navo Yehova vupamikijaposoti vinthu vatuchita pamoyo wasu wansiku na nsiku. Mwachisanzo, Yehova osangalala ngako akatiwona tuchita vinthu vonse mwachilungamo komasoti tili na ntima wopasa. (2 Ako. 8:21; 9:7) Yove ofunasoti kuti sewo tikolemekeza ngako mphaso ya moyo. Tuvwendela ngako kwa Mulungu wamene etipasa moyo keno tuchita vinthu mwachikati-kati pankhani ya kulya, kumwa, komasoti kusamalila thanzi yasu mwanjila yoyenelela. Khama yatuchita kuti tikokondwelesha Yehova, olo pankhani zitontho-zitontho yuchitisha kuti Yehova akotikonda.—Luk. 16:10.
Kukonkheja malamulo apa nsewu, kusamalila thanzi yasu pochita masoŵele otang’isha muŵili, kulya vakulya vopasa thanzi komasoti kulondela luweme alwendo, ninjila ziyakine zatingakondweleshele Yehova (Onani ndime 14.)
15. Kansi Yehova ofuna kuti tikochita tyani vinthu na ŵanthu ayakine?
15 Yehova ni muweme ntima kuli ŵanthu olungama komasoti osalungama. (Mat. 5:45) Yove ofuna kuti nase tikochita vinthu moganizila ayakine. Mwachisanzo, sewo ‘tulaŵililalini vinthu viipa munthu aliyense ndipo tukondalini kukangana, . . . Koma nise ofasa kuli ŵanthu onse.’ (Tito 3:2) Pokumbukila mfundo yamene iyi, tupewa kunyoza ŵanthu ayakine pachifukwa tyala chakuti okhulupilila vinthu vosiyana na sewo. (2 Tim. 2:23-25) Tuvwendelasoti ngako kwa Yehova ponkhala aweme ntima nthawe zonse komasoti kuchita vinthu moganizila wanthu onse.
TINGAPITILIJE “KUVWENDELA KWA MULUNGU” OLO KUTI TAPHONIYESHA VINTHU VIYAKINE
16. Kansi munthu elemba Salimo 73 eyamba kumvwa tyani pepapita nthawe?
16 Nthawe ziyakine, mungayambe kuganiza kuti Mulungu angakukondenilini chifukwa chakuti mwephoniyesha vinthu viyakine. Monga nimwatawonela, vinthu volingana na vamene ivi niye vechitikila munthu wamene elamba Salimo 73. Yove elaŵila modandaula kuti: “Mendo ŵangu echingosala patontho kuluŵila, mendo ŵangu echingosala patontho kuteleleka.” (Sal. 73:2) Yove enena yeka kuti ntima wake ‘wemuŵaŵa’ ndipo echita vinthu ‘viliye nzelu’ vamene vechitisha kuti ankhale “monga ni nyama yosaganiza” pamenso pa Yehova. (Sal. 73:21, 22) Kansi yove eyamba kuliwona kuti ni munthu watyala-tyala ndipo Yehova angamukondelini?
17. (a) Olo kuti enze efoka ngako, kansi wamasalimo enzechita tyani? (b) Kansi tingaphunzile chinji kufumila pa chisanzo chake? (Onanisoti vithunzi.)
17 Keno wamasalimo enzeganiza kuti Yehova wamutaya, niye kuti maganizo amene awo aliyenkhalishe. Vuwoneka kuti vinthu peviipa ngako, yove eziŵa kuti ofunikila kuvwendela ngako kwa Mulungu mokatijana na mwechinenela kuti: “Koma lomba newo nili na mwewo [Yehova] nthawe zonse. Mwanikata kwanja yangu ngayo. Munisogolela na malangizo ŵanu ndipo pavuli pake muzanipase ulemelelo.” (Sal. 73:23, 24) Nasesoti tufunika kudalila Yehova wamene ni mwala wasu kuti atitang’ishe tikafoka olo tikakhumudwa. (Masal. 73:26; 94:18) Olo tikapatuka panjila ya chonadi kwanthawe itontho, tingakwanishe kujokela kwa Yehova chifukwa tukaikilalini kuti yove “niwokonzeka kukhululuka.” (Sal. 86:5) Tufunika kuvwendela kwa Yehova, ngako-ngako vinthu vikaipa ngako pamoyo wasu.—Sal. 103:13, 14.
Tikafoka mwauzimu, tufunika kuvwendela kwa Yehova pochita vinthu vinyinji vokhuza kulambila (Onani ndime 17.)
PITILIJANI “KUVWENDELA KWA MULUNGU” KOSASILA
18. Ndaŵa yanji tinganene kuti kuvwendela kwa Yehova kuliye polekejela?
18 Kuvwendela kwa Yehova komasoti kumuziŵa luweme kuliye polekejela. Baibolo yunena kuti njila za Yehova, nzelu zake komasoti kuziŵa kwake vinthu “ni vovuta kuvimvwisha.”—Alo. 11:33.
19. Kansi lemba ya Salimo yutisimikijila chinji?
19 Lemba ya Salimo 79:13 yunena kuti: “Sewo ŵanthu ŵanu komasoti mbelele zamuŵetela tizakutembejeni kosasila. Ndipo tizalengeze kuti mwewo muwamila kutamandiwa kumibadwo-mibadwo.” Namwesoti mukokhulupilila kuti muzalondele madaliso osasila mukapitilija kuvwendela kwa Mulungu. Wamasalimo enena kuti: “Mulungu ni mwala wantima wangu komasoti choloŵa changu kosasila”, ndipo mwewo mungakwanishe kumukonkheja.—Sal. 73:26.
NYIMBO N.° 32 Nkhalani okhulupilika kwa Yehova!
a Ŵanthu amene olimbana na nkhaŵa komasoti chisoni kwa nthawe itali mosalekeja, angafunikile thandizo yachipatala. Kuti muziŵe vinyinji onani Nsanja ya Olonda N.° 1 2023.